Sálmmaid girji 78

Guldal, álbmogan, mu oahpahusa,

gullet mii mus lea dadjamuššan.

₂Mun rabastan njálmmi ja sártnun

viisodaga sániid,

čilgen dološ áiggi árvádusaid.

₃Maid mii leat gullan ja oahppan,

maid min áhčit leat muitalan midjiide,

₄dan mii eat čiega mánáineamet.

Boahtti buolvvaide mii muitalit

Hearrá gudni ja fámu,

daid oavdduid maid son lea dahkan.

₅Son attii báhkkomiiddis Jakobii

ja iežas lága Israelii,

ja gohčui min áhčiid

oahpahit daid mánáidasaset,

₆vai maŋit buolvvat dovddašedje daid,

ja mánát geat riegádit,

muitalivčče daid iežaset mánáide.

₇Dalle sii dorvvastivčče Ipmilii

eaige vajáldahtáše su daguid,

muhto doahttalivčče su báhkkomiid

₈eaige šattaše áhčiideaset

láhkásažžan

– nággáris ja gážžáris sohkan,

geaid váibmu lei behtolaš,

geaid vuoigŋa ii bisson

oskkáldassan Ipmilii.

₉Efraimlaččain ledje

dávggit vearjun,

muhto soahtebeaivvi sii báhtaredje.

₁₀Sii eai doallan Ipmila lihtu,

muhto biehttaledje doallamis

su lága.

₁₁Sii vajáldahtte su stuorra daguid,

daid oavdudaguid

maid son lei diktán sin oaidnit.

₁₂Egypta eatnamis,

Soana duolbadasas

son dagai oavdudaguid

sin áhčiid čalmmiid ovddas.

₁₃Son luddii meara

ja doalvvui sin rastá,

son buođui čáziid seaidnin.

₁₄Son divttii balvva

oahpistit sin beaivet

ja dola čuovgga ihkku.

₁₅Son luddii bávttiid meahcis,

attii sin juhkat

stuorra čiekŋalasaid čázi.

₁₆Son divttii ádjagiid golgat bávttis,

čáziid golggiidit eatnun.

₁₇Almmatge sii ain suddudedje,

meahcis sii nággárušše

Alimusa vuostá.

₁₈Eaktodáhtos sii geahččaledje Ipmila,

go gáibidedje borramuša hálloseaset.

₁₉Sii sárdno Ipmila vuostá ja dadje:

“Sáhttábat Ipmil lágidit

borramuša meahccái?

₂₀Son časkkii gal bávtti,

ja čáhci golggai,

jogažat dulve badjel ravddaid,

muhto sáhttágo son maiddái

addit midjiide láibbi

ja skáhppot bierggu iežas álbmogii?”

₂₁Go Hearrá gulai dan,

de son moaráhuvai.

Dolla buollái Jakoba gaskkas,

moarri badjánii Israela vuostá,

₂₂danne go sii eai luohttán Ipmilii,

eai dorvvastan su veahkkái.

₂₃Son gohčui balvvaid ja

rabastii almmi uvssaid,

₂₄ divttii manna gahččat arvvi láhkái

álbmogii biebmun,

attii sidjiide almmi gortni.

₂₅Olbmot besse borrat

eŋgeliid láibbi,

Ipmil vuolggahii sidjiide

biepmu nu ahte sii gallánedje.

₂₆Almmis son divttii

nuortabiekka vuolgit,

fámuinis son bijai lullebiekka bossut.

₂₇Son divttii sin ala gahččat bierggu

dego gavjja,

almmi lottiid nugo meara sádduid.

₂₈Son gahčahii daid gasku sin siidda,

sin gođiid birra,

₂₉ja sii borre ja gallánedje,

son attii sidjiide masa sii háliduvve.

₃₀Muhto ovdal go sii ledje

borran gallás,

go sis lei ain borramuš njálmmis,

₃₁de Ipmila moarri buollái sin vuostá.

Son gottii sin gievrramusaid,

časkkii eatnamii Israela nuorra olbmáid.

₃₂Dattetge sii ain suddudedje,

eai sii jáhkkán su oavdudaguide.

₃₃Nu son divttii sin beivviid

nohkat duššálašvuođas,

sin eallinjagit jávke nugo jiella.

₃₄Go son dal gottii sis muhtumiid,

de sii ohcaledje su,

jorgaledje ja ohce Ipmila.

₃₅Sii muitájedje ahte Ipmil lea sin bákti,

ahte Alimus Ipmil lea sin lonisteaddji.

₃₆Muhto sii dohkkestuvve sutnje

sániideasetguin,

gielástalle su njuokčamiinniset.

₃₇Váimmusteaset sii eai lean

vuoiggalaččat su guovdu,

eai bisson oskkáldassan su lihttui.

₃₈Dattetge Ipmil lea váibmoláđis,

son attii sidjiide

sin suttuid ándagassii.

Dávjá son doalahalai iežas moari

iige diktán suhtu badjánit.

₃₉Son muitái ahte sii ledje

dušše olbmot,

dušše jiella mii manná meattá

iige máhca.

₄₀Dávjá sii nággárušše

su vuostá meahcis,

moraštahtte su ávdin eatnamis.

₄₁Ain ođđasis sii geahččaledje Ipmila,

moaráhuhtte Israela Basi.

₄₂Eai sii muitán su fámolaš gieđa

dan beaivvi go son lonistii sin vašálaččas,

₄₃go son dagai mearkkaid Egyptas

ja oavdudaguid Soana duolbadasas.

₄₄Son nuppástuhtii sin jogaid varran,

sii eai sáhttán juhkat ádjagiin.

₄₅Son vuolggahii borruid gáskit sin,

cubbuid billistit sis buot.

₄₆Son attii sin šattuid divrriide,

sin eatnama šattuid rásselohkuide.

₄₇Son billistii sin viidnemuoraid

čuorbmasiiguin,

sin meahccefiikonmuoraid

ráššoarvviin.

₄₈Son divttii buohcuvuođaid

áŧestit sin omiid,

rohttudávdda časkit sin ealuid.

₄₉Son vuolggahii sin vuostá

buolli moaris,

suhtu ja moari ja áŧestusa,

oasehisvuođa áirasiid stuorra joavkku.

₅₀Son ráhkadii geainnu moarrásis,

ii seastán sin jápmimis,

muhto attii sin heakka

rohttudávdda háldui.

₅₁Son časkkii buot Egypta

vuosttašriegádeddjiid,

olbmá givrodaga álgošattuid Hama gođiin.

₅₂Muhto iežas álbmoga son luittii

vuolgit dego sávzzaid,

láidestii sin dego ealu meahcis.

₅₃Go son láidii sin, de sii ledje oadjebasat,

eai sii dárbbašan ballat mastege,

muhto mearra govččai

sin vašálaččaid joavkku.

₅₄Son buvttii sin bassi eatnamasas,

dan várrái maid su olgeš giehta lei fidnen.

₅₅Son ájii álbmogiid sin ovddas,

juogadii sin eatnama árbin

ja divttii Israela čearddaid

ássat gođiineaset.

₅₆Muhto sii vuostálaste Ipmila,

sii nággárušše suinna, Alimusain,

eai doahttalan su gohččumiid.

₅₇Sii jorraledje

ja ledje oskkáldasmeahttumat

nugo sin áhčitge,

sii adde vuollái dego loažžan dávgi.

₅₈Sii moaráhuhtte su

go oaffarušše dieváineaset,

dahke su áŋgirin iežaset ipmilgovaiguin.

₅₉Ipmil oinnii dan ja moaráhuvai,

son hilggui Israela ollásit.

₆₀Son hilggui ássansajis Šilos,

dan goađi maid lei ceggen olbmuid gaskii.

₆₁Son divttii fámus mearkka

šaddat fáŋgavuhtii,

attii bassi árkkas vašálačča gihtii.

₆₂Son attii álbmogis miehki háldui,

son moaráhuvai opmodahkasis.

₆₃Dolla duššadii nuorra olbmáid,

nuorra nieiddat eai šat ožžon

headjalávlagiid,

₆₄báhpat gahčče miehkkái,

leaskkat eai beassan doallat váidalusaid.

₆₅Dalle Hearrá gohccái

dego olmmoš gohccá nahkáriin,

nugo soahteolmmái moriha

juhkanvuođastis.

₆₆Son ájii sin vašálaččaid báhtarussii,

dagahii sidjiide agálaš heahpada.

₆₇Hearrá hilggui Josefa soga,

Efraima čeardda son ii válljen,

₆₈muhto son válljii Juda čeardda

ja Sionvári maid son ráhkistii.

₆₉Dohko son huksii bassibáikkis

allagin dego albmi,

nanusin dego eanan,

maid son lea vuođđudan agálaš áigái.

₇₀Son válljii Davida, bálvaleaddjis,

vieččai su sávzzaidgárddis,

₇₁válddii su bohčči sávzzaid luhtte

geahččat iežas álbmoga Jakoba,

ráđđet Israela, iežas opmodaga.

₇₂Ja David geahčai dan

vuoiggalaš váimmuin,

láidii dan hárjánan gieđain.