Sálmmaid girji 94

₁Hearrá, don leat Ipmil

gii mávssahat. Loaiddas ovdan

hearvásvuođas, mávssaheami Ipmil!

₂Čuožžil, eatnama duopmár,

mávssat čeavlás olbmuide!

₃Man guhká, Hearrá,

man guhká don divttát

ipmilmeahttumiid ávvudit?

₄Man guhká sii ožžot rámppastaddat,

golggahit njálmmis julges sániid?

₅Hearrá, sii cuvkejit du álbmoga,

sordet du opmodaga.

₆Leaskkaid ja vierrásiid sii goddet,

oarbásiid sii sorbmejit.

₇Sii dadjet: “Ii Hearrá oainne dan,

Jakoba Ipmil ii fuomáš.”

₈Smiehtastehket,

álbmoga jierpmeheamit!

Goas dii mielaheamit jierbmabehtet?

₉Son guhte dagai bealji,

iigo son gulaše?

Son guhte hábmii čalmmi,

iigo son oainnáše?

₁₀Son guhte bagada álbmogiid,

son guhte máhttáha olbmuid,

iigo son ráŋggáštivčče?

₁₁Hearrá dovdá olbmuid jurdagiid,

son diehtá ahte dat leat duššálaččat.

₁₂Ávdugas dat gean don, Hearrá,

bagadat,

dat geasa don oahpahat iežat lága.

₁₃Don attát sutnje ráfi bahás beivviid,

go hávdi juo roggojuvvo ipmilmeahttumii.

₁₄Hearrá ii hilggo álbmogis

iige guođe iežas opmodaga.

₁₅Vuoigatlaččat ožžot fas vuoigatvuođa,

ja buot rehálaččain lea boahtteáigi.

₁₆Gii bealušta mu bahás olbmuid vuostá,

gii veahkeha mu vearredahkkiid gieđas?

₁₇Jos Hearrá ii livčče mu veahkki,

de dalle mun fargga

veallášin jaskatvuođas.

₁₈Jos mun dajan: “Mu juolgi juorbu”,

de du oskkáldasvuohta, Hearrá,

doarju mu.

₁₉Go ráfehis jurdagat

lassánit mu siskkildasas,

de du jeđđehus illudahttá mu.

₂₀Don it doarjjo vearálaš duopmáriid,

daid geat dahket vearrivuođa

lága nammii.

₂₁Sii searvvadit vuoigatlačča vuostá

ja dubmejit vigiheami jápmimii.

₂₂Muhto Hearrá lea mu ladni,

Ipmil lea mu dorvobákti.

₂₃Son mávssaha sidjiide

sin vearrivuođa,

son časká sin sin bahávuođa geažil.

Hearrá, min Ipmil, duššada sin.