Almmustus 20

₁Ja mun oidnen almmis boahtimin vuolás eŋgela geas lei gieđas čiekŋalasa čoavdda ja stuorra láhkkit. ₂Son dohppii guovddi, dan boares gearbmaša mii lea beargalat ja Sáhtán, ja bijai dan láhkkiide duhát jahkái, ₃bálkestii dan čiekŋalassii ja lohkkadii ja seailidii uvssa dan maŋis. Gearpmaš ii šat beasa čádjidahttit álbmogiid, ovdal go duhát jagi leat vássán. De dat luitojuvvo luovos oanehis áigái.

₄Mun oidnen truvnnuid, ja daidda geat čohkánedje truvnnuide, addojuvvui dubmenváldi. Mun oidnen daid olbmuid sieluid geat ledje steavliduvvon Jesusa duođaštusa ja Ipmila sáni dihte, daid geat eai lean rohkadallan beađu ja dan gova eaige lean váldán dan mearkka gálloseaset eaige giehtaseaset. Sii eallájedje ja ráđđejedje oktan Kristusiin duhát jagi. ₅Eará jábmit eai šaddan fas eallin ovdal go duhát jagi ledje vássán.

Dát lea vuosttaš bajásčuožžileapmi. ₆Ávdugasat ja basit dat geain lea oassi vuosttaš bajásčuožžileapmái! Nuppi jápmimis ii leat fápmu sidjiide, muhto sii leat Ipmila ja Kristusa báhpat ja ráđđejit oktan Kristusiin duhát jagi.

₇Go duhát jagi leat dievvan, de Sáhtán luitojuvvo luovos giddagasastis, ₈ja dat vuolgá fillet álbmogiid máilmmi njealji čiegas. Dat čádjidahttá Goga ja Magoga ja čohkke álbmogiid soahtái, ja daid veagat leat dego ábi sáttočalmmit. ₉Dat mannet eatnama alladuolbadassii ja birastahttet bassi olbmuid soahtesiidda ja ráhkistuvvon gávpoga. Muhto almmis gahččá dolla, ja dat duššada daid buohkaid. ₁₀Beargalat mii lei fillen daid álbmogiid, bálkestuvvo dolla- ja riššajávrái nugo maiddái beahtu ja vearreprofehta, ja doppe dat biinniduvvojit ijatbeaivái, álo ja agálaččat.

₁₁Ja mun oidnen stuorra vilges truvnnu ja su gii das lea čohkkámin. Su muođuid ovddas báhtaredje eanan ja albmi, eaige dat lean šat. ₁₂Mun oidnen maiddái jábmiid, stuorráid ja smávváid, čuožžumin truvnnu ovddas. Girjjit rabastuvvojedje, rabastuvvui maiddái eallima girji, ja jábmit dubmejuvvojedje dan mielde mii girjjiide lei čállojuvvon, iešguhtege daguidis mielde. ₁₃Áhpi attii jábmiidis, Jápmin ja Jábmiidáibmu adde jábmiideaset, ja sii buohkat dubmejuvvojedje daguideaset mielde. ₁₄Jápmin ja Jábmiidáibmu bálkestuvvojedje dollajávrái. Dát lea nubbi jápmin, dollajávri. ₁₅Juohkehaš gean namma ii lean čállojuvvon eallima girjái, bálkestuvvui dan dollajávrái.