Sakarja 6

₁Go mun fas geahčastin, de mun oidnen njeljiid vovnnaid mat ihte guovtti vári gaskka. Dat várit ledje veaikevárit. ₂Vuosttaš vovnnaid gesse rukses heasttat, nuppiid čáhppes heasttat, ₃goalmmádiid vilges heasttat ja njealjádiidgis girjjat heasttat. Dat buot ledje gievrras heasttat. ₄Mun jerren eŋgelis guhte sártnui muinna: “Mat dát leat, hearrá?” ₅Eŋgel vástidii: “Dat leat almmi njeallje biekka mat vulget maŋŋil go leat čužžon oppa eatnama hearrá ovddas. ₆Dat vovnnat maid čáhppes heasttat gesset, vulget davvieatnama guvlui, dat vovnnat maid vilges heasttat gesset, vulget oarjjás ja dat vovnnat maid girjjat heasttat gesset, vulget lulás.”

₇Buot duot gievrras heasttat vuolggestuvve mannat miehtá eatnama. Son celkkii: “Mannet miehtá eatnama!” Ja dat manne miehtá eatnama. ₈Son čuorvvui munnje: “Ane muittus daid heasttaid mat vulge davás. Dat diktet mu vuoiŋŋa boahtit dohko.”

₉Hearrá sátni bođii munnje:

₁₀Mana Jošia, Sefanja bártni, vissui. Doppe don deaivvat Heldaja, Tobia ja Jedaja geat leat boahtán Babylonis. ₁₁Váldde golli ja silbba maid sii leat buktán, duddjo dain kruvnnu ja bija dan bajimusbáhppa Josua, Jehosadaka bártni, oaivái. ₁₂Cealkke sutnje: Ná cealká Hearrá, Almmiveagaid Ipmil: Olmmái gean namma lea Vesá, badjána dán eatnamis, ja son hukse Hearrá tempela. ₁₃Duođaid, son hukse Hearrá tempela, oažžu gonagasárvvu ja čohkká ráđđejeaddjin truvnnustis. Maiddái báhpas lea truvdnu, ja dan guoktá gaskkas lea ovttamielalašvuohta. ₁₄Báhcos kruvdnu Hearrá tempelii Heldaja, Tobia, Jedaja ja Jošia, Sefanja bártni, muitun.

₁₅Olbmot bohtet guhkkin hukset Hearrá tempela. Dalle dii ipmirdehpet ahte Hearrá, Almmiveagaid Ipmil, lea vuolggahan mu din lusa. Dat dáhpáhuvvá jos dii duođaid guldalehpet Hearrá, din Ipmila, jiena.