Sefanja 1

₂Mun duššadan visot,

mun rohtten visot eret eatnama alde,

cealká Hearrá.

₃Mun duššadan olbmuid ja omiid,

almmi lottiid ja meara guliid.

Mun divttán ipmilmeahttumiid gahččat

ja duššadan olbmuid eatnama alde,

cealká Hearrá.

₄Mun lokten gieđa Juda vuostá

ja buot Jerusalema ássiid vuostá.

Dán báikkis mun jávkadan

visot Baala bálvalusa

ja daid báhpaid muittu

geat bálvalit eahpeipmiliid.

₅Mun duššadan daid geat dáhkiid alde

rohkadallet almmiveaga,

daid geat rohkadallet Hearrá

muhto vurdnot Milkoma nammii,

₆daid geat leat gáidan Hearrás,

daid geat eai oza Hearrá

eaige jeara sus ráđi.

₇Oro jávohaga Hearrá Ipmila ovddas,

dasgo Hearrá beaivi lea lahka.

Hearrá lea ráhkadan oaffarnjuovalmasaid

ja basuhan gussiidis.

₈Oaffarmállásiid beaivvi mun, Hearrá,

ráŋggáštan oaivámuččaid

ja gonagasa bártniid ja buohkaid geat

gárvodit vierroeatnamiid olbmuid láhkái.

₉Dan beaivvi mun ráŋggáštan buohkaid

geat eai arvva duolmmastit šielbmái,

muhto arvet gal deavdit hearráset viesu

veahkaválddiin ja behttosiin.

₁₀Dan beaivvi, cealká Hearrá,

gullo čuorvvas Guollepoarttas,

váidaleapmi Ođđagávpogis

ja stuorra ruoškkas dieváin.

₁₁Váidalehket, dii geat

ássabehtet Njuvdinlihtis,

danne go buot gávpeolbmát duššaduvvojit

ja buohkat geat vihkkejit silbbaid,

jávkaduvvojit.

₁₂Dan áigge mun, Hearrá,

dutkkan Jerusalema dárkilit čuovggain.

Mun ráŋggáštan daid

geat čohkkájit doppe juhkanvuođas,

daid geat dadjet váimmusteaset:

“Ii Hearrá daga ii buori iige bahá.”

₁₃Sin opmodat stajiduvvo,

sin viesut billistuvvojit.

Vaikko sii leat huksen viesuid,

de sii eai beasa ássat dain,

vaikko sii leat gilván viidnegárddiid,

de sii eai beasa juhkat daid viinni.

₁₄Lahka lea Hearrá stuorra beaivi,

dat lahkana, dat boahtá gáhča.

Gullet! Bahča lea Hearrá beaivvi,

dalle roahkkadis soahteolmmáige

bárgu jitnosit.

₁₅Dat beaivi lea moari beaivi,

heađi ja áŧestusa beaivi,

billašumi ja heavahusa beaivi,

moskku ja seavdnjadasa beaivi,

balvva ja mierkká beaivi,

₁₆dorvečuodjama

ja soahtečuorvasiid beaivi.

Dat boahtá ladnegávpogiid vuostá,

alla toartnaid vuostá.

₁₇Mun áŧestan olbmuid

nu ahte sii čádjádallet

dego čalmmeheamit.

Mu vuostá sii leat suddudan,

danin sin varra golgá eatnamii

dego bázahas,

sin siskilušat nugo muhkki.

₁₈Sin silbbat ja gollit

eai sáhte gádjut sin

Hearrá moari beaivvi.

Su áŋgirvuođa dolla duššada oppa eatnama.

Son loahpaha fáhkkestaga

buot eatnama ássiid,

suorganemiin sii duššet.