Sefanja 3

₁Vuoi nággáris

ja duolvaduvvon gávpoga,

veahkaválddálaš gávpoga!

₂Ovttage dat ii doahttalan,

ii oahppan bagadusas.

Dat ii luohttán Hearrái,

ii jorgalan Ipmilis beallái.

₃Dan oaivámuččat

leat dego čeargu ledjonat,

dan duopmárat dego gumppet

– eai dat guođe dávttige iđedassii.

₄Dan profehtat leat rámppas,

behtolaš olbmát,

dan báhpat dahket eahpebassin

dan mii lea bassi

ja rihkkot Hearrá lága.

₅Muhto Hearrá,

guhte lea vanhurskkis, ássá doppe,

son ii daga vearrivuođa.

Juohke iđida son addá duomus,

ii dat báze boađekeahttá go čuvggoda.

Muhto vearredahkki ii dovdda heabu.

₆Mun lean duššadan álbmogiid,

daid ladnetoartnat leat hádjosan.

Mun lean dahkan gáhtaid ávdimin,

ii oktage vádjol daid,

mun lean stajidan gávpogiid,

daidda ii báhcán oktage,

ii oktage olmmoš.

₇Mun jurddašin:

“Dál don, Jerusalem, vissásit balat mus

ja válddát vuostá bagadusa

itge badjelgeahča mu ráŋggáštusa.”

Muhto sii suddudedje ain áŋgireappot.

₈Dan dihte vurdet mu, cealká Hearrá,

vurdet dan beaivvi

go mun čuožžilan duođaštit.

Mun lean mearridan čohkket álbmogiid,

mun rávkkan riikkaid du vuostá

vai beasan gurret daidda moarrán,

buot mu buolli vaši.

Mu buolli áŋgirvuohta

duššada oppa eatnama.

₉Dalle mun attán álbmogiidda

buhtes baksamiid,

nu ahte dat čurvot Hearrá nama,

dat buot bálvalit mu.

₁₀Don bealde Nubia jogaid

mu bálvaleaddjit buktet munnje

oaffarattáldagaid.

₁₁Dan beaivvi don, Jerusalem,

it dárbbaš šat heahpanaddat,

vaikko leat rihkkon mu vuostá.

Dalle mun jávkadan du gaskkas

goargadis ja badjelgeahččalas olbmuid,

čeavláid mun áján eret bassi váristan.

₁₂ Váivvášiid ja vuollegaččaid

mun divttán báhcit ássat doppe,

álbmoga mii dorvvasta Hearrá nammii.

₁₃Dat geat vel leat báhcán Israelis,

eai daga šat vearrivuođa

eaige sártno giellásiid,

sin njálmmis ii boađe behtolaš sáhka.

Dat eallu gávdná guohtuma

ja eallá ráfis,

iige oktage suorggat dan.

₁₄Ávvut, nieida Sion,

čuorvvo ilus, Israel!

Illut ja ávvut oppa váimmus,

nieida Jerusalem!

₁₅Hearrá lea jávkadan du ráŋggáštusa

ja heavahan du vašálaččaid.

Hearrá, Israela gonagas, ássá du gaskkas,

it don dárbbaš šat ballat mange bahás.

₁₆Dan beaivvi celkojuvvo Jerusalemii:

Ale bala, Sion,

ale divtte gieđaid njuorrat!

₁₇Hearrá, du Ipmil, lea duinna,

son lea veagalaš, son beastá.

Don leat su illu, son čájeha fas

iežas stuorra ráhkisvuođa.

Dat geat moraštit guhkkin dan báikkis

gos mu álbmot čoaggana,

₁₈besset illudit du dihte stuorra ávuin.

Mun jávkadan dus odne dan heahpada

maid don leat guoddán.

₁₉Geahča, go dat áigi boahtá,

de mun ráŋggáštan daid geat sorde du.

Mun veahkehan skierpmáid

ja čohkken daid

geat ledje áddjojuvvon hájilassii.

Mun attán sidjiide gudni ja rámi

juohke báikkis gos sii

leat heahppášuhttojuvvon.

₂₀Go dat áigi boahtá,

de mun doalvvun din ruoktot,

dalle mun čohkken din.

Mun attán didjiide rámi ja gudni

buot eatnama álbmogiid gaskkas,

go mun din čalmmiid ovddas

jorgalan din vuorbbi,

cealká Hearrá.