Kivsedeijee keččâlâd Jeesus
1Talle Jieggâ tuálvui Jeesus ävđinkuávlun, vâi Pahakkâs piäsá suu kivsediđ. 2Ko Jeesus lâi vástudâm neljilov peivid já neljilov ijjâd, sun viijmâg niälgui. 3Talle kivsedeijee poođij suu kuuvl já eeđâi sunjin: »Jis tun tuođâi lah Immeel Alge, te kočo täid keeđgijd muttuđ leibin.» 4Mut Jeesus västidij: »Lii čallum: ’Ij olmooš ele tuše leeibist, mut jyehi säänist, mii vuálgá Immeel njäälmist.’»
5Talle Pahakkâs tuálvui Jeesus pase kaavpugân já piejâi suu temppâlhäärji oolâ. 6Sun eeđâi Jeesusân: »Jis kerdi lah Immeel Alge, te leggistât vuálus. Liihân čallum: ’Sun addel eŋgâlijdis pákkum. Sij kyeddih tuu kieđâidiskuin, amas tun lammiđ juálgád kiäđgán.’» 7Jeesus västidij sunjin: »Lii meiddei čallum: ’Ele kiivsed Hiärá, Imelâd.’»
8Vala Pahakkâs tuálvui Jeesus hirmâd ollâ vääri oolâ, čaaitij sunjin maailm puoh väldikuudijd já toi čuovvâdvuođâ 9já eeđâi: »Puoh taam mun adelâm tunjin, jis tun luáštádâđah iddui oolâ já komerdah muu.» 10Talle Jeesus eeđâi sunjin: »Moonâ meddâl, Sáttán! Lii čallum: ’Hiärá, Imelâd, tun koolgah kunnijâttiđ já tuše suu palvâliđ.’»
11Talle Pahakkâs tiiptij Jeesus orroođ, já suu kuuvl pottii eŋgâleh, kiäh palvâlii suu.
Jeesus sirdášuvá Galilean
12Ko Jeesus uážui kuullâđ, et Juhánâs lâi fäŋgejum, sun sirdášui Galilean. 13Nasaretân sun ij innig pááccám, mut sun asâttâđâi Kapernaumân, mii lii jäävri riddoost Sebulon já Naftal hiäimui kuávlust. 14Näävt tábáhtui, vâi olášuuččij proofeet Jesaja sääni:
15– Sebulon eennâm já Naftal eennâm,
Meerâ luoddâ, eennâm Jordan tovnbeln
já viereshiäimusij Galilea –
16aalmug, mii oroi sevŋâdâsâst,
ooinij stuorrâ čuovâ.
Toid, kiäh urruu jäämmim suoivuu enâmist,
päštiškuođij kirkkâdvuotâ.
17Tastmaŋa Jeesus särnidij: »Jorgettiđ Immeel piälán, tastko oolmij väldikodde lii puáttám alda!»
Vuosmuuh máttááttâspárnááh
18Ko Jeesus juuđij Galileajäävri rido mield, sun ooinij viiljâkuáhtá, Simmoon, nube noomâ mield Piättár, já suu viiljâ Andârâs. Suoi láin suáppumin viermijd jáávrán, tastko suoi láin kuálásteijeeh. 19Jeesus eeđâi sunnui: »Vyelgee muu fáárun. Mun toovâm tunnust ulmui kuálásteijeid.» 20Suoi kuođijn tállân viermijd já vuolgijn čuávvuđ Jeesus.
21Ko Jeesus lâi jottáám mottoom kooskâ tast ovdâskulij, te sun ooinij nube viiljâkuáhtá, Jáákkup já suu viiljâ Juhánâs, Sebedeus oolgijd. Suoi láin skiijpâst ejijnis Sebedeusáin kalgâmin viermijdis. Jeesus kočoi sunnuu-uv. 22Suoi tállân kuođijn skiijpâ já eejis já vuolgijn čuávvuđ Jeesus.
Saahâ Jeesusist leevvân
23Jeesus juuđij talle Galilea jyehi kuávlust. Sun máttááttij kuávlu synagogain, särnidij ilosaavâ Immeel väldikoddeest já pyeredij ulmui puoh taavdâid já vaaivijd. 24Saahâ sust levânij tobbeen ubâ Syyrian. Suu kuuvl puáhtojii puoh maaŋgâmuđusijn taavdâin kierdeeh – paas jiegâi väividem ulmuuh, mánupyecceeh já meiddei jamâstum ulmuuh – já sun pyeredij sii. 25Suu maajeeld juuđij stuorrâ olmoošjuávkku. Sij lijjii vuálgám Galileast já Dekapolis kuávlust, Jerusalemist já Juudeast já nubebeln Jordan.
