Matteus 9

₁Jeesus lavkkij kárbás, moonâi jäävri paijeel já poođij jieijâs kuátukaavpugân. ₂Tobbeen ulmuuh puohtii suu kuuvl jamâstum almaa, kote viällái kyeddimmato alne. Ko Jeesus ooinij sii osko, te sun eeđâi jamâstum almai: »Uážuh leđe torvolâš mieláin, algam, tuu sudoh adeluvvojeh addâgâs.»

₃Motomeh laavâmáttáátteijeeh jurdâččii talle: »Tuothân pilkked Immeel.» ₄Mut Jeesus ooinij, maid sij jurdâččii já eeđâi: »Mondiet tist láá paas jurduuh váimustâd? ₅Kuábáš lii älkkeb, ettâđ: ’Tuu sudoh adeluvvojeh addâgâs’, vâi ettâđ: ’Paijaan já vääzi’? ₆Mut vâi tij tiäđáččijd, et Ulmuu Algeest lii väldi adeliđ eennâm alne suddoid addâgâs» – sun sáárnui tääl jamâstum almai – »paijaan, vääldi mattood já moonâ páikkásâd.» ₇Talle almai pajanij já vuolgij páikkásis. ₈Ko ulmuuh taam oinii, sij palaskii já alestii Immeel, kote lâi adelâm tonmuđusii vääldi ulmuid.

₉Ko Jeesus kaavpugist vyelgidijn juuđij tulliviäsu lappâd, sun ooinij Matteus-nommâsii almaa čokkáámin tobbeen. Jeesus eeđâi sunjin: »Čuávu muu», já sun pajanij já vuolgij Jeesus fáárun.

₁₀Jeesus čokkái talle peevdist suu pääihist. Tohon pottii meid maaŋgah publikaaneh já eres suddogâsah, já sij čokkájii peevdist Jeesusáin já suu máttááttâspárnáiguin. ₁₁Ko fariseuseh tom oinii, te sij ettii Jeesus máttááttâspárnáid: »Maht tii máttáátteijee puurâd oovtâst publikaanijguin já suddogâsâiguin!» ₁₂Jeesus kuulâi tom já eeđâi: »Iä tiervâseh taarbâš pyeredeijee, mut pyecceeh. ₁₃Moonnâđ já tutkâđ, maid taat meerhâš: ’Läđisvuođâ mun táátum, jiemge uuhrijd’. Jiem mun lah puáttám koččođ hurskáid, mut suddogâsâid.»

₁₄Talle Juhánâs máttááttâspárnááh pottii Jeesus kuuvl. Sij ettii: »Mijjân já fariseusáid váástu anneem lii tehálâš. Mondiet tuu máttááttâspárnááh iä ane váástu?» ₁₅Jeesus västidij sijjân: »Iähân hejâkyesih pyevti murâštiđ talle ko irge lii vala siiguin! Vala puátá tot-uv äigi, kuás irge lii moonnâm, já talle sij aneh váástu. ₁₆Ij kihheen piejâ tuoppiihánnáá kággást tuovŋâs puáris kiessâmmááccuhân. Mááccuh kiškoo taggaar tuovŋâs paaldâst, já räigi šadda stuárráábin. ₁₇Ige vorâs viini leškuu puáris leeilâi siis. Tallehân nähki luoddân, viini kolgá enâmân já leeilah láá pillâšum. Ij, vorâs viini liäškoo uđđâ leeilâi siis. Nuuvt kuohtuuh siäiluh.»

₁₈Ko Jeesus vala lâi sárnumin sijjân, te tohon poođij ohtâ synagoga uáiváámuin. Sun komárdui enâmân Jeesus oovdâst já eeđâi: »Muu nieidâ lii esken jáámmám, mut puáđi já piejâ kieđâd suu oolâ, vâi sun iälláá.» ₁₉Jeesus pajanij já vuolgij almaa fáárun, já máttááttâspárnááh čuovvuu suu.

₂₀Talle mottoom nissoon aldanij Jeesus. Suu lâi väividâm vorrâkulgâttâs kyehtnubáloh ihheed. Sun poođij Jeesus tuáhá já kuoskâttij suu kiessâmmááccuh tiäpán. ₂₁Sun uáináh jurdâččij: »Jis mun peri uážum kuoskâttiđ suu mááccuh, te mun puáránâm.» ₂₂Jeesus jorgettij, ooinij nissoon já eeđâi: »Uážuh leđe ruokkâdis mieláin, nieidâžâm, oskod lii pyeredâm tuu.» Ton puudâ rääjist nissoon lâi tiervâs.

₂₃Ko Jeesus poođij uáiváámuu viistán já ooinij huilusuáitteid já šlamâdeijee olmoošjuávhu, ₂₄te sun eeđâi: »Moonnâđ meddâl! Ij nieidâ lah jáámmám, sun uáđá.» Sij povvâstii suu. ₂₅Mut ko olmoošjuávkku lâi vuájálittum olgos, Jeesus moonâi siisâ já vaaldij nieidâ kieđâst kiddâ, já nieidâ pajanij. ₂₆Saahâ täst levânij ubâ ton kuávlun.

₂₇Ko Jeesus vuolgij tobbeen meddâl, te suu servidáin čalmettes kyevtis. Suoi čuárvoin: »Äärmit munnuu, Taavvid Alge!» ₂₈Já ko Jeesus peesâi tálusis, te čalmettes kyevtis poođijn siisâ suu kuuvl. Jeesus koijâdij: »Oskovettee-uv tuoi, et mun puávtám išediđ tunnuu?» »Muoi oskoon, Hiärrá», suoi västidáin. ₂₉Talle sun kuoskâttij sunnuu čoolmijd já eeđâi: »Tábáhtus tunnui tego tuoi oskovettee», ₃₀já sunnuu čalmeh lekkâsii. Jeesus váruttij sunnuu korrâsávt: »Keččee, et kihheen ij uážu tiettiđ täst.» ₃₁Mut ko suoi láin vuálgám tobbeen, te suoi levâttáin sust saavâ ubâ ton kuávlun.

₃₂Ko almaakyevtis láin vuolgâdmin, te Jeesus kuuvl puohtui kielâttes almai, kiäm väividij paas jieggâ. ₃₃Jeesus vuájálitij jiegâ, já kielâttem sárnuškuođij. Ulmuuh hiämáskii já ettii: »Tággáár ij Israelist lah kuássin oinum.» ₃₄Mut fariseuseh ettii: »Uáivipahakkâs vuoimijguin sun paas jiegâid vuájálit.»

₃₅Jeesus juuđij talle ton kuávlu kaavpugijn já siijdâin. Sun máttááttij synagogain, särnidij ilosaavâ oolmij väldikoddeest já pyeredij ulmui puoh taavdâid já vaaivijd.

₃₆Ko sun ooinij olmoošjuávhuid, te sun šallišij sii, ko ulmuuh lijjii kuáránâm já hilgum tego savzâiälu keččeettáá. ₃₇Talle sun eeđâi máttááttâspárnáidis: »Šaddo lii ennuv mut pargeeh uccáá. ₃₈Áánnuđ tääl Hiärá, kiäs valje kulá, vâi sun vuolgât pargeid valje vuorkkiđ.»