1. Johannes 5

₁Juohkehaš gii osku ahte Jesus lea Kristus, lea riegádan Ipmilis, ja juohkehaš gii ráhkista áhči, ráhkista maiddái su máná. ₂Das mii diehtit ahte ráhkistit Ipmila mánáid, go mii ráhkistit Ipmila ja doallat su báhkkomiid. ₃Ipmila ráhkisteapmi lea dat ahte mii doallat su báhkkomiid, ja su báhkkomat eai leat lossadat. ₄Buot mii lea riegádan Ipmilis, vuoitá máilmmi. Ja dát lea dat vuoitu mii lea vuoitán máilmmi: min osku. ₅Gii dalle vuoitá máilmmi, juos ii dat gii osku ahte Jesus lea Ipmila Bárdni?

₆Son, Jesus Kristus, lea boahtán čázi ja vara bokte – ii aivvefal čázi, muhto čázi ja vara. Ja Vuoigŋa lea duođašteaddji, dainna go Vuoigŋa lea duohtavuohta. ₇Golbma leat mat duođaštit: ₈Vuoigŋa, čáhci ja varra, ja dan golmma duođaštus lea oktasaš. ₉Miihan dohkkehit olbmuid duođaštusa, muhto Ipmila duođaštus lea ollu stuorit, danin go dát lea Ipmila duođaštus: Son lea duođaštan iežas Bártni birra. ₁₀Das gii osku Ipmila Bárdnái, lea duođaštus iežas siste. Dat gii ii oskko Ipmilii, dahká su gielástallin, go son ii leat oskon Ipmila duođaštussii su iežas Bártni birra. ₁₁Ja dát lea dat duođaštus: Ipmil lea addán midjiide agálaš eallima, ja dat eallin lea su Bártni siste. ₁₂Geas lea Bárdni, das lea eallin, muhto geas ii leat Ipmila Bárdni, das ii leat eallin.

₁₃Dán mun lean čállán didjiide geat oskubehtet Ipmila Bárdnái, vai diehtibehtet ahte dis lea agálaš eallin. ₁₄Ja mii oažžut roahkkadit lahkanit Ipmilii ja oskut ahte son gullá min, jos mii átnut juoidá su dáhtu mielde. ₁₅Ja go mii diehtit ahte son gullá buot min átnumušaid, de mii maiddái diehtit ahte mii oažžut dan maid mii sus átnut.

₁₆Jos muhtun oaidná vieljas dahkamin suttu mii ii doalvvo jápmimii, de son galgá rohkadallat ja nu addit sutnje eallima; mun oaivvildan daid geaid suddu ii doalvvo jápmimii. Leat maiddái suttut mat dolvot jápmimii, muhto dakkár suttuid dihte mun in ávžžo din rohkadallat. ₁₇Buot vearrivuohta lea suddu, muhto lea maiddái suddu mii ii doalvvo jápmimii.

₁₈Mii diehtit ahte ii oktage gii lea riegádan Ipmilis, suddut. Son gii lea riegádan Ipmilis, várjala sis juohkehačča, vai Bahá ii guoskka sidjiide. ₁₉Mii diehtit ahte mii leat Ipmila olbmot, muhto oppa máilbmi orru Bahá válddis.

₂₀Mii maiddái diehtit ahte Ipmila Bárdni lea boahtán ja addán midjiide jierpmi dovdat su guhte lea Duohta. Dan Duođa siste mii eallit go leat su Bártni Jesus Kristusa siste. Son lea duohta Ipmil ja agálaš eallin. ₂₁Mánážiiddán, váruhehket eahpeipmiliin!