2. Muitalusaid girji 10

₁Rehabeam vulggii Sikemii, danin go oppa Israel lei boahtán dohko dahkat su gonagassan. ₂Go Jeroboam, Nebata bárdni, gulai dan Egyptii gosa son lei báhtaran gonagas Salomos, de son máhcai Israelii. ₃Israellaččat bivde su mielddiset, ja ovttas sii manne Rehabeama ságaide ja dadje: ₄“Du áhčči dagai min geassá lossadin. Geahpit don dál dan garra bargonoađi ja lossa geassá maid du áhčči bijai min guoddit, de mii leat du bálvaleaddjit.” ₅Rehabeam dajai sidjiide: “Vurdet vel guokte beaivvi ja bohtet dasto ođđasis.” Olmmošjoavku vulggii eret.

₆Gonagas Rehabeam jearai neavvaga vuorrasiin geat ledje bálvalan su áhči Salomo, dalle go son lei eallimin. Son jearai: “Maid dii neavvubehtet mu vástidit dán álbmogii?” ₇Sii dadje: “Jos don leat buorre dán álbmogii, jos bivddát dan buori ja sártnut dasa ustitlaččat, de dat lea álo du bálvaleaddji.” ₈Muhto Rehabeam hilggui vuorrasiid neavvaga. Son jearai neavvaga nuorain geat ledje šaddan ovttas suinna ja ledje dál su bálvaleaddjin. ₉Son jearai sis: “Maid dii neavvubehtet mu vástidit álbmogii? Sii bivdet mu geahpidit geassá maid mu áhčči lea bidjan sin guoddit.” ₁₀De nuorat geat ledje šaddan ovttas suinna, dadje sutnje: “Dát álbmot dadjá dutnje ahte du áhčči dagai sin geassá lossadin, ja bivdá du geahpidit dan. Daja álbmogii ná: ‘Mu čelččen lea gasit go áhččán alimat. ₁₁Mu áhčči bijai din guoddit lossa geassá, muhto mun dagan dan ain losibun. Mu áhčči bagadii din spižáin, muhto mun bagadan din biikaroaiskkáin.’”

₁₂Guovtti beaivvi geažes Jeroboam ja oppa álbmot bohte Rehabeama lusa, nugo gonagas lei gohččon. ₁₃Gonagas Rehabeam vástidii sidjiide garra sániiguin. Son hilggui vuorrasiid neavvaga ₁₄ja vástidii nugo nuorat ledje nevvon su: “Mu áhčči dagai din geassá lossadin, muhto mun dagan dan ain losibun. Mu áhčči bagadii din spižáin, muhto mun bagadan din biikaroaiskkáin.” ₁₅Gonagas ii guldalan álbmoga; nu Ipmil lei dahkan vai ollašuvašii dat maid Hearrá lei sárdnon Jeroboamii, Nebata bárdnái, šilolaš Ahia bokte.

₁₆ Go israellaččat oidne ahte gonagas ii guldalan sin, de sii vástidedje: “Mii osiid mis lea Davidis?

₁₈Go gonagas Rehabeam vuolggahii israellaččaid lusa Adorama, bargogeatnegasaid goziheaddji, de sii geađgádedje su jámas. Gonagas Rehabeam fertii hoahpus mannat vovnnaidasas ja báhtarit Jerusalemii.

₁₉Nu Israel earránii Davida sogas, ja nu lea leamaš gitta otná beaivvi rádjái.