2. Muitalusaid girji 4

₁Salomo duddjohii bronsaáltára man guhkkodat lei guoktelogi állana, govdodat guoktelogi állana ja allodat logi állana.

₂De son leikehii jorba áldása mii gohčoduvvui mearran. Dat lei áibbas jorbat, ja dan čađamihttu ravddas ravdii lei logi állana. Dan allodat lei vihtta állana ja birramihttu golbmalogi állana. ₃Dan ravdda vuolde ledje vuokságovat guoktin ráidun, ja dat ledje leikejuvvon oktanaga mearain. ₄Mearra orui guoktenuppelohkái vuovssá alde; golbma ledje davás guvlui, golbma oarjjás guvlui, golbma lulás guvlui ja golbma nuorttas guvlui. Mearra orui vuovssáid alde, ja daid maŋŋegeažit ledje sisa guvlui. ₅Meara ávnnas lei giehtaloabu asu, ja dan ravda lei juhkanlihti ravdda hápmásaš, dego lotuslieđi giera. Mearra gesii golbmaduhát bata.

₆Salomo duddjohii maid logi gievnni ja bijai dain vihtta áldása olgeš ja vihtta gurut beallái. Dain galggai doidit boaldinoaffarruvjjiid. Mearra lei báhpaid basadeami várás.

₇Salomo ráhkadii gollis maid logi lámpájuolggi dakkárin go dat galge ja bijai daid tempelhállii, vihtta olgeš ja vihtta gurut beallái.

₈Salomo ráhkadii logi beavddi ja bijai daid tempelhállii, vihtta olgeš ja vihtta gurut beallái. Son duddjohii gollis maid čuođi oaffarbollu.

₉Salomo huksii báhpaid ovdašilju ja stuorra tempelšilju ja dan uvssaid; uvssaid son govččai bronssain.

₁₀Meara son bijai tempela olgeš beallái, nuorttaslulás guvlui.

₁₁Hiram duddjui báđiid, gutnagoaivvuid ja oaffarbolluid. Son gárvvistii daid biergasiid maid son galggai duddjot gonagas Salomoi Ipmila tempela várás: ₁₂guokte bácci, guokte jorbalágán bázzeoaivvi, guokte bárggaldaga gokčat dan guokte bázzeoaivvi; ₁₃njeallječuođi granáhtaehpela dan guovtti bárggaldahkii, guokte granáhtaehpelráiddu goappáge bárggaldahkii gokčat dan guokte bázzeoaivvi, ₁₄logi beavddi ja daidda logi gievnni, ₁₅meara ja guoktenuppelohkái vuovssá dan vuollái ₁₆ja báđiid, gutnagoaivvuid ja gáffaliid. Buot biergasat maid meašttir Hiram duddjui gonagas Salomoi Hearrá tempela várás, ledje dahkkojuvvon gellojuvvon bronssas. ₁₇Gonagas leikehii daid láiráfuorpmain Jordanleagis, Sukkota ja Saretana gaskkas. ₁₈Salomo duddjohii dakkár biergasiid nu ollu ahte daidda adnojuvvon bronsa ii lean mihtideames.

₁₉Salomo duddjohii maid buot eará tempela biergasiid: golleáltára, oaffarláibebevddiid, ₂₀gollelámpájulggiid goara ovdii ja daid lámppáid mat galge cahkkehuvvot nugo lei mearriduvvon, ₂₁liđiid, lámppáid ja gollebasttaid, visot čielga gollis, ₂₂ja vel niibbiid, oaffarbolluid, gohpuid ja dollalihtiid, buot datnai čielga gollis. Maiddái basimus boaššu uksa, dan uksalahkit ja tempelhálla uvssat, gokčojuvvojedje golliin.