1Ná cealká Hearrá:
Danin go Moab lea dahkan
vearredagu vearredagu maŋŋil,
de dan duopmu ii rievdda.
Sii leat boaldán kálkan
Edoma gonagasa dávttiid.
2Mun vuolggahan dola Moabii,
ja dat duššada Kerijota ladniid.
Moab jápmá vearjjuid šlámas,
go soahtečuorvasat skádjet ja dorvvet čudjet.
3Mun duššadan dan ráđđejeaddji
ja gottán buot dan oaivámuččaid
oktan suinna, cealká Hearrá.
4Ná cealká Hearrá:
Dan dihte go Juda lea dahkan
vearredagu vearredagu maŋŋil,
de dan duopmu ii rievdda.
Sii leat badjelgeahččan Hearrá lága
eaige leat doallan su báhkkomiid.
Gielisipmilat maid sin áhčit čuvvo,
leat čádjidahttán sin.
5Mun vuolggahan dola Judai,
ja dat duššada Jerusalema ladniid.
6Ná cealká Hearrá:
Dan dihte go Israel lea dahkan
vearredagu vearredagu maŋŋil,
de dan duopmu ii rievdda.
Sii leat vuovdán vigiheami ruđas
ja váivváša gámabáras.
7Sii dulbmet gefiid muldii
ja botnjet vártnuhemiid geainnu.
Áhčči ja bárdni mannaba
ovttat nissona luhtte,
ja nu soai dahkaba
mu bassi nama eahpebassin.
8Sii njaŋgájit pántejuvvon biktasiid alde
juohke áltára guoras
ja juhket Ipmileaset viesus viinni
maid leat váldán sáhkkun.
9Ja mun almmatge duššadin
din ovddas amorlaččaid
geat ledje guhkit dego sedermuorat
ja gievrrat dego áikkat.
Mun billistin sin šaddosiid bajil
ja sin ruohttasiid vuolil.
10Mun bukten din Egyptas
ja oahpistin din meahcis njealljelogi jagi,
vai dii válddášeiddet oapmineattet
amorlaččaid eatnama.
11Mun dahken din bártniid profehtan
ja din nuorra olbmáid nasiran.
Almma lea nu, israellaččat?
cealká Hearrá.
12Muhto dii attiidet nasiraide viinni juhkat
ja gilddiidet profehtaid profehtastallamis.
13Danin mun divttán eatnama
doarggistit din julggiid vuolde
dego dat doarggista vovnnaid vuolde
maid dievva leat gordnegihput.
14Dalle falli ii gávnna suoji,
gievra ii ane fámuidis,
soahteolmmái ii biso heakkas,
15njuollabáhčči ii doala sajis,
gehppesjuolggat ii beasa báhtarussii,
riidejeaddji ii gájo iežas.
16Jálumus soahteolmmái
bálkesta vearjjuidis ja báhtara dan beaivvi,
cealká Hearrá.
