Esekiel 24

₁Ovccát jagi logát mánus, mánu logát beaivvi munnje bođii dát Hearrá sátni: ₂Olmmoš, čále muitui dán beaivvi, aiddo dán. Aiddo dán beaivvi Babylonia gonagas lea fallehan Jerusalema. ₃Muital veardádusa dán gážžáris álbmogii, daja: Ná cealká Hearrá Ipmil:

₆Ná cealká Hearrá Ipmil: Vuoi varahuvvan gávpoga, vuoi báđi mas lea ruosta, ruosta mii ii luovvan! Váldde das biergguid bihtáid bihtáid, vuorbátkeahttá. ₇Gávpot lea varahuvvan. Dat golggahii vara báljes bávtti ala, ii fal eatnamii mas muolda dan govččašii. ₈Mun divttán dál gávpoga iežas vara golgat báljes bávtti ala mas dat ii leat gokčamis, vai beasan gurret iežan suhtu ja mávssahit.

₉Dan dihte cealká Hearrá Ipmil: Vuoi varahuvvan gávpoga! Mun maid dagan dola stuorisin. ₁₀Mun čohkken ollu muoraid ja cahkkehan dola, vuoššan biergguid dimisin ja coahkudan liema nu ahte dávttit bullet. ₁₁Mun bijan báđi heaŋgát guorosnaga hilaid ala, vai dat báhkkana nu ahte ruovdi áhcagastá ja dan buhtismeahttunvuohta suddá ja ruosta buollá eret. ₁₂Muhto dat ollu ruosta ii vuolgge eret ii dolasge. ₁₃Don leat buhtismeahttun ja heabuheapme. Mun lean geahččalan buhtistit du, muhto don it leat buhtásmuvvan, itge don buhtásmuva ovdal go mun lean gurren iežan suhtu dutnje. ₁₄Mun, Hearrá, lean sárdnon. Nu geavvá, nu mun dagan, mun in árpmit, in seastte inge gáđa. Mun dubmen du dan mielde mo leat eallán ja maid leat dahkan, cealká Hearrá Ipmil.

₁₅Munnje bođii dát Hearrá sátni: ₁₆Olmmoš, mun válddán dus fáhkkestaga du čalmmiid hávskodaga, muhto ale moraš, ale čiero alege golggat gatnjaliid. ₁₇Šuohke jávohaga, ale doala morašbasiid, muhto giesa turbána oaivái ja bija gápmagiid juolgái, ale govčča muođuid alege bora morašláibbi.

₁₈Iđedis mun sárdnon álbmogii, ja eahkedis mu áhkká jámii. Maŋit iđida mun dahken nugo ledjen gohčohallan. ₁₉Álbmot dajai munnje: “Manin don barggat nie? Muital midjiide maid dat mearkkaša!” ₂₀Mun dadjen sidjiide: “Munnje bođii dát Hearrá sátni: ₂₁Daja Israela álbmogii: Ná cealká Hearrá Ipmil: Mun heahppášuhtán iežan tempela, din gorges suoji, din čalmmiid hávskodaga, din gierrásepmosa. Din bártnit ja nieiddat geaid šattaidet guođđit, gahččet miehkkái. ₂₂Dii dahkabehtet nugo mun lean dahkan. Dii ehpet govčča muođuid ehpetge bora morašláibbi, ₂₃ ehpet nuola turbána oaivvis ehpetge gápmagiid juolggis, ehpet moraš ehpetge čiero, muhto suttuideattet dihte dii buohkat sotnabehtet ja luoibmabehtet. ₂₄Esekiel lea didjiide mearkan: Nugo son lea dahkan, nu dahkabehtet diige. Go dát dáhpáhuvvá, de dii ipmirdehpet ahte mun lean Hearrá Ipmil.”

₂₅Olmmoš, dan beaivvi go mun válddán sis sin suoji, sin rámi ja ilu, sin čalmmiid hávskodaga ja sin sielu hálidusa, sin bártniid ja nieiddaid, ₂₆de dan beaivvi boahtá du lusa muhtun báhtareaddji ja muitala dutnje visot dán. ₂₇Dan beaivvi, dalle go duot báhtareaddji boahtá, de rahpasa fas du njálbmi, don sártnut itge leat šat gielaheapme. Nu don leat sidjiide mearkan, ja dalle sii ipmirdit ahte mun lean Hearrá.