Jesaja 32

₁Boahtá áigi

go gonagas ráđđe vuoigatlaččat

ja oaivámuččat stivrejit

vanhurskásit.

₂Dalle sii buohkat leat dego

beaittus go dálki boahtá,

dego suodji ráššoarvvi vuostá,

dego jogaš čázehis meahcis,

dego báktesuoivvan eatnamis

maid beaivváš goardá.

₃Dalle oidniid čalmmit eai leat gitta

ja gulliid bealjit leat gullesat.

₄Ráđehemiid váibmu oažžu ipmárdusa,

gahkáid njuovčča

sárdnu njuovžilit ja čielgasit.

₅Doavki ii šat gohčoduvvo gutnálažžan

iige skealbma ávddalažžan.

₆Doavki sárdnu aivve jallavuođa,

buot su áigumušat leat bahát.

Son meannuda ipmilmeahttumit

ja sárdnu jorgut Hearrá birra.

Son diktá nealgeolbmo nealgut

ja goikan olbmo goikat.

₇Skealmma vearjjut leat bahát,

su áigumušat leat heahpatlaččat,

su giellásat njeidet vártnuheami,

su sánit njeidet geafi rievttis.

₈Muhto buorrelunddot olbmo jurdagat

leat ávddalaččat,

son ovddida buot mii lea buorre.

₉Lihkket, dii moraškeahtes nissonat,

gullet mu sániid!

Dii oadjebas nieiddat,

guldalehket maid mun sártnun!

₁₀Oktii vel dii doarggistehpet,

dii geat dál lehpet oadjebasat.

Rádjanáigi lea vássán,

iige mihkkege leat ráddjojuvvon.

₁₁Suorganehket,

dii moraškeahtes nissonat,

doarggistehket,

dii oadjebas olbmot,

nuoladehket,

čatnet horstta alimiid birra.

₁₂Luibmet bealdduid dihte,

hearvás bealdduid,

šattolaš viidnemuoraid dihte,

₁₃luibmet mu álbmoga eatnamiid dihte,

gos bastilislánját ja gáskálasat bohciidit,

buot ávvudeaddji gávpoga

ilolaš viesuid dihte.

₁₄Šloahtta báhcá guorusin,

šlámaideaddji gávpot šaddá ávdimin.

Ofeldievvá ja fáktentoardna

báhcet rabas gieddin agibeaivái,

meahciáseniid ealáhin,

šibitealuid guohtumin.

₁₅Nu lea dassážii go min badjelii

golggahuvvo vuoigŋa allagasas.

Dalle ávdin meahcci šaddá šaddogárdin,

ja gárddit leat viidát dego vuovddit.

₁₆Dalle meahcis ássá vuoigatvuohta,

šaddogárddiin vuoigatlašvuohta.

₁₇Vuoigatlašvuođa duodji lea ráfi,

dan šattus lea bistevaš muossi

ja oadjebasvuohta.

₁₈Mu álbmot ássá ráfálaš eatnamis,

gođiin main sii dovdet leat oadjebasat

ja besset vuoiŋŋastit muosis.

₁₉Vuovdi gahččá vuolás,

gávpogat gaikojuvvojit

gitta eatnama ráje.

₂₀Lihkolaččat dii geat beassabehtet

gilvit buot johkagáttiide

ja luoitit vuovssáid ja áseniid

veaiddalassii!