Duopmáriid girji 21

₁Israellaččat ledje vurdnon Mispas: “Ii oktage mis atte nieiddas áhkkán benjaminlažžii.” ₂Sii bohte Betelii, ja doppe sii čohkkájedje Ipmila ovddas gitta eahkeda rádjái, fuiko ja čirro jitnosit. ₃Sii dadje: “Hearrá, Israela Ipmil! Manne dát galggai dáhpáhuvvat Israelii? Dál Israelis váilu olles čearda!” ₄Árrat maŋit iđida israellaččat huksejedje Betelii áltára ja oaffarušše boaldinoaffariid ja searvevuođaoaffariid.

₅De sii jerre: “Leatgo muhtimat buot Israela čearddain geat eai leat boahtán, go mii dál leat čoagganan Hearrá ovdii?” Sii ledje oainnat vurdnon nannosit ahte dat gii ii boađe Hearrá ovdii Mispai, ráŋggáštuvvo jápmimiin.

₆Israellaččat árkkášedje vieljaset Benjamina, ja sii dadje: “Otná beaivvi okta čearda lea čuhppojuvvon eret Israelis. ₇Gos mii fidnet áhkáid daidda benjaminlaččaide geat leat vel báhcán? Miihan leat vurdnon Hearrá nammii ahte eat atte nieiddaideamet sidjiide áhkkán.” ₈De sii jerre: “Geat buot Israela čearddain eai leat boahtán Hearrá ovdii Mispai?” Gávnnahuvvui ahte Jabešis Gileadis ii oktage lean boahtán čoagganeapmái. ₉Álbmot geahčaduvvui, iige das lean oktage olmmoš Jabešis Gileadis.

₁₀Dalle searvegoddi vuolggahii Jabešii Gileadis guoktenuppelohkáiduhát soahteolbmá ja gohččo sin: “Mannet Jabešii Gileadis ja goddet dan ássiid, maiddái nissoniid ja mánáid. ₁₁Dahket ná: Vihahehket duššadeapmái buot olbmáid ja buot nissoniid geat leat veallán olbmáin.” ₁₂Jabeša ássiid gaskkas Gileadis sii gávdne njeallječuođi eadneviđá nieidda geat eai lean veallán olbmáin. Sii buktojuvvojedje Šiloi siidii mii lea Kanaanis.

₁₃De searvegoddi vuolggahii áirasiid benjaminlaččaid lusa Rimmonbáktái fállat sidjiide ráfi. ₁₄Dalle benjaminlaččat máhcce, ja israellaččat adde sidjiide daid nissoniid Jabešis Gileadis geaid ledje diktán eallit. Muhto nissonat eai lean doarvái ollu.

₁₅Álbmot árkkášedje Benjamina čeardda, danin go Hearrá lei dahkan guoros saji Israela čearddaid gaskii. ₁₆Searvegotti vuorrasat jerre: “Mo mii fidnešeimmet áhkáid daidda benjaminlaččaide geat leat báhcán, go buot dan čeardda nissonat leat duššaduvvon?” ₁₇Sii dadje vel: “Benjamina bázahus ferte gáddjojuvvot, Israelis ii oaččo jávkaduvvot olles čearda. ₁₈Muhto mii israellaččat eat sáhte addit nieiddaideamet sidjiide áhkkán, danne go mii leat vurdnon: Garuhuvvon lehkos dat gii addá áhká benjaminlažžii.” ₁₉De sii fuobmájedje ahte Šilos, dan gávpogis mii lea Betela davvelis ja Lebona lullelis, Betela ja Sikema gaskasaš máđija nuorttabealde, lávejedje juohke jagi ávvudit Hearrá basiid. ₂₀Sii dadje dal benjaminlaččaide: “Mannet Šilo viidnegárddiide njáhkagassii. ₂₁Go dii oaidnibehtet gávpoga nieiddaid boahtimin dánsut, de galgabehtet viehkalit viidnegárddiin, ja juohkehaš galgá dohppet Šilo nieidda alccesis áhkkán ja de máhccat Benjamina eatnamii. ₂₂Ja go sin áhčit dahje vieljat bohtet váidalit midjiide, de mii dadjat: ‘Árkkálmastet sin. Buohkat eai sáhttán oažžut áhká soađis. Ja dii ieža ehpet sáhttán addit nieiddaideattet sidjiide, dallehan dii livččiidet šaddan sivalažžan.’”

₂₃Benjaminlaččat dahke nu. Juohkehaš dohppii dánsu nieidda alccesis áhkkán. Dasto sii máhcce iežaset eatnamii, huksejedje ođđasit gávpogiiddiset ja ásse daidda. ₂₄Eará israellaččat maid máhcce doppe, juohke čearda ja juohke sohka iežas opmodahkii.

₂₅Daid áiggiid Israelis ii lean vel gonagas, ja juohkehaš dagai dan maid anii vuoigadin.