Jeremia 32

₁Juda gonagasa Sidkia logát ráđđenjagi mii lei maiddái Nebukadnesara gávccinuppelogát ráđđenjahki, Jeremiai bođii sátni Hearrás. ₂Babylona gonagasa soahteveahka lei dalle birastahttimin Jerusalema, ja profehta Jeremia lei giddagasas Juda gonagasa šloahta fáktašiljus ₃gosa gonagas Sidkia lei bidjan su fáŋgan. Jeremia lei oainnat profehtastallan gonagasa vuostá ja dadjan: “Ná cealká Hearrá: Mun attán dán gávpoga Babylona gonagasa gihtii, ja son váldá dan. ₄Juda gonagas Sidkia ii beasa kaldealaččaid gieđas, muhto addojuvvo Babylona gonagasa gihtii. Son šaddá oaidnit su čalmmis čalbmái ja sárdnut suinna muođus muhtui. ₅Nebukadnesar doalvu Sidkia Babylonii, ja doppe son lea, dassážii go mun fas geahčan su beallái, cealká Hearrá. Didjiide ii menestuva soahtat kaldealaččaiguin.”

₆Jeremia dajai: Munnje bođii dát Hearrá sátni: ₇Du ságaide boahtá Hanamel, čeazát Šalluma bárdni, ja dadjá: “Mun lean vuovdimin eananbihtá mii mus lea Anatotis. Oastte dan, danne go dus lea dasa lonistanvuoigatvuohta.” ₈Ja nugo Hearrá lei cealkán, de mu vilbealli Hanamel aitto bođii mu ságaide fáktašilljui ja dajai: “Oastte mus eananbihtá mii lea Anatotis Benjamina eatnamis! Lonis dan, danin go dus lea dasa vuoigatvuohta!” Mun ipmirdin ahte aiddo dás Hearrá lei sárdnon. ₉Nu mun osten vilbealistan Hanamelis eananbihtá mii lei Anatotis ja vihkkejin sutnje máksun čiežanuppelohkái šekela silbba. ₁₀Mun čállen soahpamušgirjji, seilejin dan ja bovdejin duođašteddjiid; de mun vihkkejin silbba veavttain. ₁₁Dasto mun válden oastinsoahpamušgirjji, sihke dan mii lei seilejuvvon – dan soahpamušgirjji mas ledje eavttut – ja rabas soahpamušgirjji ₁₂ja adden daid Barukii, Neria bárdnái, Mahseja áddjubii, vilbeallán Hanamela oaidnut ja daid oaidnut geat ledje duođaštan oastinsoahpamušgirjji ja buot Juda olbmáid oaidnut geat ledje čohkkámin fáktašiljus. ₁₃Sin buohkaid oaidnut mun gohččon Baruka ná: ₁₄“Ná cealká Hearrá, Almmiveagaid Ipmil, Israela Ipmil: Váldde dáid soahpamušgirjjiid, sihke dan mii lea seilejuvvon ja rabas soahpamušgirjji, ja bija daid láirálihttái, vai dat seilot guhká. ₁₅Danin go ná cealká Hearrá, Almmiveagaid Ipmil, Israela Ipmil: Oktii velá ostojuvvojit viesut, báikkit ja viidnegárddit dán eatnamis.”

₁₆Go mun ledjen addán oastinsoahpamušgirjji Barukii, Neria bárdnái, de mun rohkadallen Hearrá ja dadjen: ₁₇Vuoi, Hearrá, mu Ipmil! Don leat sivdnidan almmi ja eatnama stuorra fámuinat ja geigejuvvon gieđainat. Ii mihkkege leat dutnje veadjemeahttun! ₁₈Don anát láđisvuođa duháhiidda ja mávssahat áhčiid bahás daguid sin mánáide. Don leat stuorra ja veagalaš Ipmil, du namma lea Hearrá, Almmiveagaid Ipmil. ₁₉Stuorrát leat du jurdagat, veagalaččat du dagut! Don geahčat dárkilit buot olbmománáid geainnuide, vai beasat addit juohkehažžii su vádjolusa ja daguid šaddosiid mielde. ₂₀Don dahket mearkkaid ja oavdduid Egyptas ja dagat daid otná beaivvige sihke Israelis ja eará álbmogiid gaskkas, ja don leat dahkan iežat nama máinnolmassan gitta dán beaivvi rádjái. ₂₁Don buktet iežat álbmoga Israela Egypta eatnamis mearkkaiguin ja oavdduiguin, gievrras ja geigejuvvon gieđain ja stuorra suorggahusain. ₂₂Don addet sidjiide dán eatnama maid vuordnumiin ledjet lohpidan sin áhčiide, eatnama mas golgá mielki ja honnet. ₂₃Muhto go sii ledje boahtán dán eatnamii ja váldán dan oapmineaset, de sii eai dáhtton gullat du jiena eaige doallan du lága. Sii eai dahkan maidege maid don ledjet gohččon sin dahkat. Dalle don diktet buot dán lihkuhisvuođa deaividit sin.

₂₄Geahča, Hearrá, gorgŋehagat leat huksejuvvon gávpoga birra, nu ahte vašálaš sáhttá váldit dan. Gávpot šaddá miehki, nealggi ja rohttudávdda geažil kaldealaččaid gihtii geat leat soahtagoahtán dainna. Maid don leat sárdnon ovdal, dat lea dál dáhpáhuvvan, don oainnát dan. ₂₅Muhto vaikko gávpot lea šaddamin kaldealaččaid gihtii de don, Hearrá, mu Ipmil, cealkkát munnje: “Oastte eananbihtá ja bovde duođašteddjiid!”

₂₆Dalle Jeremiai bođii dát Hearrá sátni: ₂₇Mun lean Hearrá, buot oačči Ipmil. Leago mihkkege veadjemeahttun munnje? ₂₈Dan dihte mun, Hearrá, cealkkán: Mun attán dán gávpoga Babylona gonagasa Nebukadnesara ja kaldealaččaid gihtii, ja sii váldet dan. ₂₉Kaldealaččat geat leat birastahttimin gávpoga, báhkkejit dohko ja buolláhit dan. Sii boldet buot viesuid maid dáhkiid alde olbmot leat boaldán oaffariid Baalii ja golggahan juhkamušoaffariid vieris ipmiliidda ja moaráhuhttán mu. ₃₀Dasgo gitta nuorravuođa rájes israellaččat ja Juda olbmot leat dahkan dušše dan mii lea bahá mu čalmmiid ovddas. Israellaččat leat aivvefal moaráhuhttán mu gieđaideaset daguiguin, cealká Hearrá. ₃₁Dát gávpot lea leamaš munnje moari ja suhtu fáddán dan beaivvi rájes go sii huksejedje dan, gitta otná beaivvi rádjái. Mun jávkadan dan muođuidan ovddas! ₃₂Israela ja Juda olbmot leat dahkan nu ollu bahá. Sii leat moaráhuhttán mu, sihke sii ja sin gonagasat ja oaivámuččat, sin báhpat ja profehtat, Juda olbmát ja Jerusalema ássit. ₃₃Sii leat jorgalan munnje sealggi eaige muođuid. Vaikko mun lean oahpahan sin ain ođđasis, de sii eai leat gullan mu eaige váldán vuostá bagadusa. ₃₄Sii leat ceggon fasttes ipmilgovaideaset tempelii man badjel mu namma lea celkojuvvon, ja leat dahkan dan buhtismeahttumin. ₃₅Sii leat huksen Baalii oaffardieváid Ben-Hinnomleahkái, ja doppe sii leat bálvalan Moloka go leat bidjan bártniideaset ja nieiddaideaset mannat dola čađa. Dan mun in leat gohččon sin dahkat, iige mu millii leat boahtán gáibidit sin dahkat dakkár gáfatlaš daguid. Sii ieža leat fillen Juda suddui.

₃₆Muhto dál cealká Hearrá, Israela Ipmil, dán gávpoga birra maid dii dadjabehtet gártat Babylona gonagasa gihtii miehki, nealggi ja rohttudávdda geažil: ₃₇Mun čohkken sin buot eatnamiin maidda mun dál áján sin suhtus, moaris ja stuorra vašis. Mun buvttán sin ruoktot dán báikái ja divttán sin eallit oadjebassan. ₃₈Dalle sii leat mu álbmot ja mun lean sin Ipmil. ₃₉Mun attán sidjiide ovttat váimmu ja ovttat geainnu, vai sii álo balašedje mus, ávkin alcceseaset ja mánáidasaset iežaset maŋŋil. ₄₀Mun dagan singuin agálaš lihtu: Mun in jorgal sis eret, muhto dagan sidjiide buriid, ja sii ballet mus eaige šat gáidda mus. ₄₁Mun illudan dahkat buori sidjiide. Oppa váimmustan ja oppa sielustan mun áiggun oskkáldasat ruohtastuhttit sin dán eatnamii.

₄₂Ná cealká Hearrá: Nugo mun lean diktán buot dán stuorra oasehisvuođa deaividit dán álbmoga, de mun divttán sin maiddái muosáhit buot daid buriid maid lean lohpidan sidjiide. ₄₃Ain ostojuvvojit bealddut dán eatnamis man birra dii dadjabehtet: Dat eanan lea meahcci, doppe eai leat olbmot eaige eallit, dat lea šaddan kaldealaččaid gihtii. ₄₄Bealddut ostojuvvojit ruđain, gávpegirjjit čállojuvvojit ja seilejuvvojit ja duođašteaddjit bovdejuvvojit Benjamina eatnamis ja Jerusalema birrasiin, Juda ja dan várreeatnama gávpogiin, Šefela ja Negeva gávpogiin. Mun jorgalan iežan álbmoga vuorbbi, cealká Hearrá.