Jeremia 34

₁Jeremiai bođii Hearrás dát sátni, go Babylona gonagas Nebukadnesar ja oppa su soahteveahka ja buot riikkat ja álbmogat maid son ráđđii, ledje birastahttimin Jerusalema ja eará Juda gávpogiid. ₂Ná cealká Hearrá, Israela Ipmil: Mana Juda gonagasa Sidkia lusa ja sártno sutnje: Ná cealká Hearrá: Dál mun attán dán gávpoga Babylona gonagasa gihtii, ja son boaldá dan. ₃Don it vealtta su gieđas, muhto dohppejuvvot ja addojuvvot su gihtii. Don gárttat oaidnit Babylona gonagasa čalmmis čalbmái ja sárdnut suinna muođus muhtui, ja de don dolvojuvvot Babylonii. ₄Muhto gula almmatge Hearrá sáni, Sidkia, Juda gonagas! Ná cealká Hearrá du birra: Don it jáme miehkkái. ₅Don oaččut jápmit muosis, ja dutnje boldojuvvojit suovvasat, nugo boldojuvvojedje du áhčiidege geat ledje gonagassan ovdal du. Dutnje dollojuvvojit váidalusat ja du dihte čurvojuvvo: “Vuoi, hearrámet!” Mun lean sárdnon dán sáni, cealká Hearrá.

₆Buot dáid sániid profehta Jeremia sártnui Jerusalemis Juda gonagassii Sidkiai ₇dalle go Babylona gonagasa soahteveahka lei birastahttimin Jerusalema ja Juda gávpogiid Lakiša ja Aseka mat ain ledje ceavzán. Dat ledje Juda áidna ladnegávpogat mat eai lean vuos váldojuvvon.

₈Jeremiai bođii Hearrás sátni, maŋŋil go gonagas Sidkia lei dahkan Jerusalema ássiiguin soahpamuša luoitit šlávaid friddjan. ₉Juohkehaš geas lei hebrealaš šlávva dahje šlávvanisson, galggai luoitit su friddjan. Ii oktage ožžon šat atnit šlávvan Juda álbmoga olbmo. ₁₀Dalle oaivámuččat ja oppa álbmot, buohkat geat ledje dahkan dan lihtu, jeagadedje ja mieđihedje luoitit friddjan šlávaideaset ja šlávvanissoniiddiset. ₁₁Muhto maŋŋil sii earáhuhtte oaivileaset, válde ruoktot šlávaideaset ja šlávvanissoniiddiset ja bággejedje sin fas šlávvabargui. ₁₂Dalle Jeremiai bođii dát Hearrá sátni: ₁₃Ná cealká Hearrá, Israela Ipmil: Mun dahken lihtu din áhčiiguin dalle go bukten sin Egyptas, šlávvaviesus, ja gohččon sin dahkat ná: ₁₄“Juohke čihččet jagi juohkehaš galgá luoitit friddjan iežas hebrealaš vielja. Luoitte friddjan dan gii lea šaddan vuovdit iežas dutnje ja lea bálvalan du guhtta jagi. Divtte su mannat ja luoitte su friddjan.” Muhto din áhčit eai guldalan mu eaige bivdán bealjige. ₁₅Dál dii jorgaleiddet ja dagaidet dan mii lea riekta mu čalmmiin, go gulaheiddet friddjavuođa, juohkehaš lagamužžasis, dego leiddet lohpidan mu ovddas dan viesus man badjel mu namma lea celkojuvvon. ₁₆Muhto de dii jorggiheiddet ja heahppášuhtiidet mu nama, go válddiidet ruoktot šlávaideattet ja šlávvanissoniiddádet geaid leiddet luoitán friddjan, ja nággiidet sin fas šlávvabargui. ₁₇Danne Hearrá cealká: Go dii ehpet guldalan mu ehpetge gulahan friddjavuođa iežadet álbmoga olbmuide ja lagamuččaidasadet, de mun gulahan didjiide friddjavuođa – friddjavuođa gahččat miehkkái, rohttudávdii ja nealgái! Mun dagan din balddonassan buot eatnama álbmogiidda. ₁₈Daidda olbmáide geat rihkko mu lihtu eaige ollašuhttán lihtu maid sii ledje dahkan mu ovddas, mun dagan dego gálbái maid sii luddejedje vai besse vázzit dan beliid gaskka. ₁₉Juda ja Jerusalema oaivámuččaid, hoavvaolbmáid, báhpaid ja buot dán eatnama olbmuid geat vázze gálbbi beliid gaskka, ₂₀mun attán vašálaččaid gihtii ja daid gihtii geat bivdet sin heakka. Sin rupmašat šaddet almmi lottiid ja meahcispiriid borramuššan. ₂₁Maiddái Juda gonagasa Sidkia ja su oaivámuččaid mun attán sin vašálaččaid gihtii, daid gihtii geat bivdet sin heakka. Mun attán sin Babylona gonagasa soahteveaga gihtii, vaikko dat leage heaitán oaguheames din. ₂₂Mun gohčun sin máhccat, cealká Hearrá, ja buvttán sin ruoktot dán gávpoga vuostá. Sii birastahttet Jerusalema, váldet dan ja boldet dan. Buot Juda gávpogiid mun dagan ávdimin, nu ahte dain ii ása oktage.