Josua 5

₁Go amorlaččaid gonagasat geat ásse Jordana oarjjabealde, ja buot áhpegátti kanaanlaččaid gonagasat gulle ahte Hearrá lei goikadan Jordana čáziid israellaččaid ovddas ja nu buktán sin rastá, de sii hearddohuvve, iige sis oktage duostan vuostálastit israellaččaid.

₂Daid áiggiid Hearrá sártnui Josuai: “Duddjo didnoniibbiid ja birračuohpa israellaččaid nuppi geardde.” ₃Josua duddjui didnoniibbiid ja birračuohpai israellaččaid Ovdaliikedievá vuolde. ₄Josua birračuohpai israellaččaid danne go buot olbmábealle geat ledje vuolgán Egyptas, buot soahteolbmát, ledje jápmán meahccái. ₅Buohkat geat ledje vuolgán Egyptas, ledje leamaš birračuhppojuvvon, muhto dat geat ledje riegádan mátkkis meahcis, eai lean birračuhppojuvvon. ₆Israellaččat ledje vádjolan meahcis njealljelogi jagi, ja dan áiggis jápme buot soahteolbmát geat ledje vuolgán Egyptas. Sii eai lean jeagadan Hearrá sáni, ja danin Hearrá lei vurdnon ahte son ii divtte sin oaidnit dan eatnama maid lei váliin vurdnon sin áhčiide addit israellaččaide, eatnama mas golgá mielki ja honnet. ₇Hearrá divttii sin bártniid boahtit sin sadjái, ja sin Josua dál birračuohpai. Sis lei ovdaliiki, danin go sii eai lean birračuhppojuvvon mátkkis. ₈Go buohkat ledje birračuhppojuvvon, de sii orro siiddas dassážii go ledje buorránan. ₉Hearrá celkkii Josuai: “Otná beaivvi mun lean fieraldahttán din badjelis Egypta hiddjádusa.” Dan dihte dat báiki gohčoduvvui Gilgalin, ja danin dat gohčoduvvo veláge.

₁₀Go israellaččat orro siiddas Gilgalis, de sii dolle beassážiid dan mánu njealljenuppelogát beaivvi eahkedis Jeriko duolbadasas. ₁₁Beaivvi maŋŋil beassážiid, dakka dan beaivvi, sii borre eatnama šattuid: Suvrutkeahtes láibbi ja gordojuvvon gortniid. ₁₂Manna nogai beaivvi geažes das go sii ledje borran eatnama šattuid. Israellaččat eai ožžon šat manna, muhto sii borre dan jagi Kanaana šattuid.

₁₃Go Josua lei oktii Jeriko lahka, de son oinnii ovddastis olbmá geas lei gieđas rohttejuvvon miehkki. Josua manai olbmá lusa ja jearai: “Gulatgo don midjiide vai min vašálaččaide?” ₁₄Olmmái vástidii: “In goabbáige. Mun lean Hearrá soahteveaga oaivámuš ja lean boahtán aiddo dál.” Dalle Josua čippostii, gopmirdii eatnamii muođuid ja jearai: “Mii mu hearrás lea sárdnumuššan bálvaleaddjásis?” ₁₅Hearrá soahteveaga oaivámuš celkkii Josuai: “Nuola gápmagiid, danin go báiki gokko don čuoččut, lea bassi.” Ja Josua dagai nu.