Sálmmaid girji 135

₁Halleluja!

Máidnot Hearrá nama,

máidnot, dii Hearrá bálvaleaddjit,

₂dii geat čuožžubehtet Hearrá tempelis,

min Ipmila viesu ovdašiljuin!

₃Máidnot Hearrá, dasgo son lea buorre!

Máidnot su nama, dasgo dat lea hávski!

₄Hearrá lea válljen alccesis Jakoba,

son lea dahkan Israela

mávssolaš opmodahkanis.

₅Hearrá lea stuoris, mun dieđán dan,

min Hearrá lea stuorit go buot ipmilat.

₆Buot maid Hearrá dáhttu,

son dahká almmis ja eatnama alde,

mearain ja čiekŋalis čáziin.

₇Son diktá balvvaid badjánit

eatnama ravddas,

son dahká álddagasaid

ja diktá arvvi gahččat,

son vuolggaha biekka dan rádjosis.

₈Son časkkii Egypta vuosttašriegádeddjiid,

sihke olbmuid ja omiid.

₉Du eatnamis, Egypta,

son dagai mearkkaid ja oavdduid

faraoi ja buot su bálvaleddjiide.

₁₀Son časkkii ollu álbmogiid

ja gottii fámolaš gonagasaid:

₁₁Sihona, amorlaččaid gonagasa,

Oga, Bašana gonagasa,

ja buot Kanaana gonagasriikkaid.

₁₂Son attii sin eatnamiid

álbmogasas opmodahkan,

árbeeanamin Israelii.

₁₃Hearrá, du namma lea agálaš!

Hearrá, du namma gulahuvvo

buolvvas bulvii.

₁₄Hearrá addá vuoigatvuođa álbmogasas,

son árpmiha bálvaleddjiidis.

₁₅Álbmogiid ipmilat leat silba ja golli,

olbmogieđaid duodji.

₁₆Dain lea njálbmi, muhto eai dat sártno,

dain leat čalmmit, muhto eai dat oainne.

₁₇Dain leat bealjit, muhto eai dat gula,

ii daid njálmmis leat ii vuoiŋŋanasge.

₁₈Dat geat daid ráhkadit,

šaddet daid láhkásažžan,

buohkat geat dorvvastit daidda.

₁₉Israela sohka, máinno Hearrá,

Arona sohka, máinno Hearrá!

₂₀Levi sohka, máinno Hearrá,

buohkat geat ballabehtet Hearrás,

máidnot su!

₂₁Máidnojuvvon lehkos Siona Hearrá,

son gii ássá Jerusalemis.

Halleluja!