Sálmmaid girji 140

₂Hearrá, gájo mu bahás olbmuin,

gáhtte mu veahkaválddálaš olbmáin,

₃dain geaid váimmus leat bahás jurdagat,

geat juohke beaivvi leat hástimin riidui.

₄Sii leat sadján njuokčameaset

bastilin dego guovddi njuovčča,

gearbmašmirko sis lea baksamiin. Sela

₅Hearrá, várjal mu

ipmilmeahttumiid gieđas,

gáhtte mu veahkaválddálaččain

geat dáhttot jorralahttit mu.

₆Čeavlás olbmot leat bidjan

gielaid ja báttiid mu várás,

suohpáhis olbmát leat njulgen fierpmi

mu geainnu rastá,

čiehkan bivdosiid mu bálgá gurrii. Sela

₇Mun luohtán dutnje, Hearrá,

don leat mu Ipmil,

guldal maid mun ánun dus.

₈Hearrá, don leat mu veagalaš beasti,

du giehta suodjala mu soađis.

₉Hearrá, ale suova ipmilmeahttumiid

sávaldagaid ollašuvvat,

daga duššin sin áigumušaid.

Sela

₁₀Ale suova vuoitit daid

geat čoagganit mu birra,

divtte sin áitagiid deaividit sin iežaset.

₁₁Divtte áhcagas hilaid gahččat sin ala,

hoigat sin rokkiide

main sii eai beasa bajás.

₁₂Dat gii sárdnu sealggebealde,

ii oaččo eallit eatnamis.

Vare oasehisvuohta deaividivččii

veahkaválddálačča,

vare lihkohisvuođat

časkkášedje su eatnamii.

₁₃Mun dieđán ahte don, Hearrá,

veahkehat váivváša,

don doaimmahat vártnuhis olbmui

vuoigatvuođa.

₁₄Vanhurskásat rámidit du nama,

vuoigatlaš olbmot ožžot ássat du lahka.