Sálmmaid girji 148

₁Halleluja!

Máidnot Hearrá, dii geat lehpet almmis,

máidnot su allagasas!

₂Máidnot su, buot su eŋgelat,

máinno su, oppa almmi veahka!

₃Máidnot su, beaivváš ja mánnu,

máidnot su, čuovgi násttit!

₄Máidnot su, almmiid almmit

ja čázit almmi gomuvuođa badjelis!

₅Máidnoset dat Hearrá nama,

dasgo son gohčui, ja dat sivdniduvvojedje.

₆Son bijai daid sadjáseaset agálaš áigái,

son mearridii daidda lágaid mat eai lihkkas.

₇Máidnot Hearrá eatnama alde,

mearraeallit ja meara čiekŋalasat,

₈dolla ja čuorbmasat, muohta ja mierká,

don riđđu mii doaimmahat su sáni,

₉várit ja dievát,

šattosmuorat ja sederat,

₁₀meahcispiret ja šibihat,

njoammut ja almmi lottit,

₁₁buot eatnama gonagasat ja álbmogat,

buot dan oaivámuččat ja duopmárat,

₁₂nuorra olbmát ja nieiddat,

boarrásat ja nuorat!

₁₃Máidnoset buot dat Hearrá nama,

dasgo aivve su namma lea aliduvvon,

su allatvuohta lea almmi ja eatnama badjel.

₁₄Son lea dahkan álbmogis fámolažžan,

gudnin buot su ipmilbalolaččaide,

Israelii, dan álbmogii mii lea su lahka.

Halleluja!