Sálmmaid girji 38

₂Hearrá, ale ráŋggáš mu

moaristat,

ale bagat mu suhtustat!

₃Du njuolat leat deaivan munnje,

du giehta deaddá mu lossadit.

₄Mu rupmašis ii leat

dearvvaš sadji du moari dihte,

mu lahtut eai oaččo mášu

bahás daguidan geažil.

₅Mu suddovealgi badjána

mu oaivvi badjel,

dat lea munnje

menddo lossa noađđi.

₆Mu hávit sidjot ja guohcagit

mu jallavuođa dihte.

₇Mun lean guvrragan

ja roaŋkkagan,

mun váccán morrašis

geažos beaivvi.

₈Mu alimiin vuoissada,

mu rupmašis ii leat

dearvvaš sadji.

₉Mun lean vuoimmehuvvan

ja cuvkejuvvon,

mun vuobaidan,

mu váibmu luoibmá.

₁₀Hearrá, don dovddat

buot mu áibbašeami,

don gulat mu šuohkkima.

₁₁Mu váibmu julká,

mu vuoibmi lea nohkan,

velá mu čalmmiid čuovganai

lea jávkan.

₁₂Mu ustibat ja fuolkkit

garvet mu mu givssi dihte,

mu lagaš olbmot čužžot gáidagasas.

₁₃Dat geat bivdet mu heakka,

bidjet gielaid mu ovdii,

dat geat dáhttot munnje bahá,

vigget heavahit mu.

Sii hutket gávvilis juonaid

geažos beaivvi.

₁₄Mun lean dego bealjeheapme,

in gula maidege, nugo gielaheapme,

in rabas njálmmi.

₁₅Mun lean dego olmmoš

gii ii gula,

nugo dakkár gii ii máhte vástidit.

₁₆Hearrá, du veahki mun vuorddán.

Hearrá, mu Ipmil,

don vástidat munnje.

₁₇Mun cealkkán:

Ale divtte mu vašálaččaid illudit

ja čeavllastallat

go mun suoibbun.

₁₈Dasgo mun lean goasii gahččamin,

mus leat álo bákčasat.

₁₉Mun dovddastan

iežan vearredagu,

mun moraštan suttuidan.

₂₀Mu vašálaččat leat veagalaččat,

eatnagat vašuhit mu

almmá siva haga.

₂₁Sii mávssahit buori baháin,

sii vuostálastet mu

danne go mun váinnuhan buori.

₂₂Hearrá, ale guođe mu!

Ipmilan, ale leage nu guhkkin!

₂₃Gáhča veahkehit mu,

Hearrá, mu beasti!