Sálmmaid girji 51

₃Ipmil, leage munnje árbmugas

buorrevuođastat,

sihko mu rihkkumiid

stuorra árbmugasvuođat dihte.

₄Basa mu buhtisin sivalašvuođas,

buhtis mu mu suttus.

₅Mun dovddan rihkkumiiddán,

mu suddu lea álelassii mu ovddas.

₆Aivve du vuostá

mun lean suddudan,

mun lean dahkan dan mii lea bahá

du čalmmiin.

Don leat vuoigadis

go bijat mu vástidit,

vuoiggalaš go dubmet mu.

₇Sivalažžan mun riegádin,

suttus mun sahkanin

eadnán goŧŧui.

₈Don dáhtut duohtavuođa

mu siskkildassii,

oahpat mu váibmui viissisvuođa.

₉Buhtis mu suttus isopiin,

basa mu vielgadeabbon

go muohta.

₁₀Suova mu dovdat ávu ja ilu,

divtte ávvudit daid dávttiid

maid cuvkejit.

₁₁Jorgal muođuidat

eret mu suttuin

ja sihko mu suddovealggi.

₁₂Ipmil, sivdnit munnje

buhtis váimmu,

atte munnje ođđa ja nana vuoiŋŋa.

₁₃Ale áje mu muođuidat ovddas,

ale váldde mus eret iežat bassi vuoiŋŋa.

₁₄Atte munnje fasttain

bestojumi ávu,

atte munnje mieđamánas vuoiŋŋa

ja doarjjo mu.

₁₅Dalle mun oahpahan

suttolaččaide du geainnuid,

vai sii máhccet du lusa.

₁₆Beastte mu varradaguin, Ipmil,

mu bestojumi Ipmil.

Dalle mun rámidan illudemiin

du oskkáldasvuođa.

₁₇Hearrá, rabas mu baksamiid,

de mu njálbmi gulaha du rámádusa.

₁₈Jos mun buvttán dutnje

njuovvanoaffara,

de don it geahča dan beallái,

mu boaldinoaffarisge

don it fuola.

₁₉Doddjojuvvon vuoigŋa

lea mu oaffar,

cuovkanan váimmu

don it hilggo, Ipmil.

₂₀Daga árpmustat bures Sionii,

hukse Jerusalema muvrraid!

₂₁Dalle don válddát vuostá

rivttes oaffariid,

boaldinoaffariid ja ollesoaffariid.

Dalle oaffaruššojuvvojit vuovssát

du áltára alde.