Sálmmaid girji 77

₂Mun rohkadalan Ipmila,

čuorvvun alla jienain,

mun rohkadalan Ipmila, ja son gullá mu.

₃Áŧestusastan mun ozan Hearrá,

ihkku mun geaigguhan gieđa

inge heaitte.

Mu siellu ii leat jeđđemis.

₄Mun muittán Ipmila ja šuohkán,

mun jurddašattan,

ja mu vuoigŋa vuoimmehuvvá. Sela

₅Don doalat mu čalmmiid rabas,

mun lean mášoheapme ja jávoheapme.

₆Mun jurddašan dološ áiggiid,

muittašan vássán jagiid.

₇Ihkku mun soađan jurdagiiguin,

mun jorahan daid

ja geahččalan ipmirdit.

₈Hilgugo Hearrá min agibeaivái,

iigo son goassege šat árpmit?

₉Leago su oskkáldasvuohta nohkan

agálaš áigái,

aingo son lea jávohaga,

buolvvas bulvii?

₁₀Leago Ipmil vajáldahttán iežas árpmu,

leago son moaristis

dahppan váimmus? Sela

₁₁Mun jurddašan: “Dat lea mu giksi:

Alimusa olgeš giehta lea rievdan.”

₁₂Mun muittašan du daguid, Hearrá,

mun muittán oavdduid

maid dahket dolin.

₁₃Mun jurddašan buot

maid don leat dahkan,

suokkardan du stuorra daguid.

₁₄Ipmil, du geainnut leat basit,

du veardásaš ii leat gostege.

₁₅Don leat Ipmil,

don dagat oavdduid,

don leat čájehan iežat fámu

álbmogiidda.

₁₆Fámolaš gieđain don lonistit iežat álbmoga,

Jakoba ja Josefa mánáid. Sela

₁₇Čázit oidne du, Ipmil,

čázit oidne du ja libaidedje,

velá meara čiekŋalasatge

doarggistedje balus.

₁₈Balvvat golggahedje čázi,

badjin čearggui baján,

du njuolat šleđgo ovddas maŋás.

₁₉Du bajána vovdnajorrit japme,

álddagasat čuvgejedje eatnama,

eanan doarggistii ja sparaidii.

₂₀Du geaidnu manai meara čađa,

du bálggis stuorra čáziid rastá,

muhto du luottat eai vuhtton.

₂₁Don láidejit iežat álbmoga

dego báimman ealus,

dan geahččit leigga Moses ja Aron.