Sakarja 10

₁Ánuhehket Hearrás arvvi

go lea giđđaarvviid áigi.

Hearrá dahká arvebalvvaid,

son addá arveovttiid,

juohke olbmui eatnama šattuid.

₂Muhto viessoipmilat sárdnot giellásiid,

einnosteaddjit oidnet vearreoainnáhusaid,

muitalit behtolaš nieguid,

sin jeđđehus lea guorus.

Dan dihte álbmot čádjádallá dego sávzaeallu

ja gillá heađi, danne go báimman ii leat.

₃Mu moarri lea cahkiidan

báimmaniid vuostá,

ja bohkáid mun ráŋggáštan.

Hearrá, Almmiveagaid Ipmil,

atná fuola iežas ealus, Juda álbmogis,

ja dahká dan iežas gorges soahteheastan.

₄Judas boahtá čiehkageađgi,

doppe giddennávli, doppe soahtedávgi,

doppe juohke ráđđejeaddji.

₅Juda olbmát sohtet dego sáŋgárat,

dulbmet soađis vašálačča

dego gáhtaid durddi.

Sii sohtet, dasgo Hearrá lea singuin,

ja riidejeaddjit vuoittáhallet.

₆Mun dagan Juda čeardda gievran,

ja Josefa čeardda mun beasttán.

Mun buvttán sin ruoktot,

dasgo mun árpmihan sin.

Dalle sii leat dego mun in livčče

goassege oppa hilgonge sin.

Mun lean Hearrá, sin Ipmil,

mun gulan sin rohkosiid.

₇Efraima olbmot leat dego sáŋgárat,

sii leat ilus dego olmmoš gii juhká viinni.

Sin mánát oidnet dan ja ávvudit,

sin váibmu illuda Hearrás.

₈Mun njurggádan sidjiide

ja čohkken sin,

dasgo mun lean lonistan sin,

ja sii šaddet seammá eatnagin

go sii oktii ledje.

₉Jos mun biđgen sin álbmogiid gaskii,

ja sii muitet mu gáiddus báikkiin,

de sii ja sin mánát ožžot eallit

ja máhccat ruoktot.

₁₀Mun divttán sin máhccat Egyptas,

ja Assyrias mun čohkken sin.

Mun divttán sin boahtit Gileadii ja Libanonii,

muhto doppege sidjiide ii leat sadji galle.

₁₁Eatnu časkojuvvo,

dan bárut váiduduvvojit.

Buot Nileanu čiekŋalis rávnnjit goiket,

Assyria goargatvuohta njeidojuvvo

ja Egypta ráđđensoabbi gáidá.

₁₂Mun, Hearrá, lea álbmogan givrodat,

mu namma addá dasa gudni,

cealká Hearrá.