Luukas 4

₁Jeesus vuolgij Jordanist tievâ Pase Jiegâst. Jieggâ jođettij suu ävđinkuavlust ₂neljilov peivid, já Pahakkâs kivsedij suu. Sun ij puurrâm tai peeivij maiden, já ko taat äigi lâi kuullâm, te sunjin šoodâi korrâ puurrâmmielâ. ₃Talle Pahakkâs eeđâi sunjin: »Jis tun kerd lah Immeel Alge, te kočo taam keeđgi muttuđ leibin.» ₄Jeesus västidij: »Lii čaallum: ’Ij olmooš ele tuše leeibist.’»

₅Pahakkâs tuálvui Jeesus ollâ sajan, čaaitij sunjin čalmerepčâlmist puoh maailm väldikuudijd ₆já eeđâi: »Puoh taam, ubâ maailm já ton kunnee mun adelâm tunjin, tastko tot lii adelum muu haaldun já mun puávtám adeliđ tom kiäs halijdâm. ₇Jis tun komerdah muu, talle taat puoh lii tuu.» ₈Jeesus västidij: »Lii čallum: ’Hiärá, tuu Immeel, tun koolgah kunnijâttiđ já tuše suu palvâliđ.’»

₉Pahakkâs tuálvui Jeesus Jerusalemân, piejâi suu temppâlmuuvrâ häärji oolâ já eeđâi: »Jis tun kerd lah Immeel Alge, te leggistât täst vuálus. ₁₀Liihân čallum: ’Sun addel eŋgâlijdis pákkum varjâliđ tuu. ₁₁Sij kyeddih tuu kieđâidiskuin, amas tun lammiđ juálgád kiäđgán.’» ₁₂Jeesus västidij: »Lii meiddei ettum: ’Ele kivsed Hiärá, Imelâd.’»

₁₃Ko Pahakkâs lâi näävt kivsedâm Jeesus puohnáál, sun kuođij taam mottoom ááigán ráávhun.

₁₄Jiegâ vyeimist tievâ Jeesus maacâi Galilean, já forgâ ulmuuh sarnuu sust jyehi saajeest. ₁₅Sun máttááttij synagogain, já puohah alestii suu.

₁₆Jeesus poođij Nasaretin, kost sun lâi pajasšoddâm, já moonâi sabattin täävis mield synagogan. Sun čyežžilij luuhâđ, ₁₇já sunjin keigejui proofeet Jesaja kirje. Sun lehâstij kirjekiesâlduv já kaavnâi ton saje, kost lii ettum:

₂₀Sun kiesâi kirje čuákán, adelij tom išedeijei já čokánij. Puohah, kiäh lijjii synagogast, čuovvuu suu tárkká. ₂₁Sun sárnuškuođij sijjân: »Onne, tii kulâdijn, lii taat čaalâ olášum.» ₂₂Puohah kijttâlii suu já imâštellii taid áármu saanijd, moh suu njäälmist pottii.

Liijká sij ettii: »Ij-uvks tot lah Joovsep alge?» ₂₃Jeesus eeđâi sijjân: »Forgâ tij vissâ muštâlvetteđ munjin sänivaijâs ’Tuáhtár, pyereed jieijâd!’ já etâvetteđ ’Poorgâ tääbbin-uv, jieijâd kaavpugist, puoh tom, maid mij lep kuullâm et tun lah porgâm Kapernaumist.’» ₂₄Já sun joođhij: »Tuođâi: kihheen ij lah proofeet jieijâs enâmist. ₂₅Oskođ munjin: Israelist lijjii maaŋgah leeskah Elia ääigi, talle ko almeh iä adelâm čääsi pelniäljád ihán já ubâ enâmân šoodâi korrâ nelgiäigi. ₂₆Elia ij kuittâg vuolgâttum sii kuuvl pic Sidon enâmân, Sarpatist ässee leskâkáálgu kuuvl. ₂₇Siämmáánáál Israelist lijjii maŋgâ spitaallii proofeet Elisa ääigi, mut ohtâgin sist ij putestum, tuše Naaman, kote lâi syyrialâš.»

₂₈Taam kulâdijn puohah, kiäh lijjii synagogast, vajaskii čuuvtij. ₂₉Sij čyežžilii, vuájálittii Jeesus olgos kaavpugist já tolvuu suu hiäŋgupäävti oolâ vâi pesâččii uigâđ suu togo vuálus; kaavpug lâi uáináh huksejum hiäŋgupäävti oolâ. ₃₀Mut Jeesus moonâi olmoošjuávhu čoođâ já joođhij määđhis.

₃₁Jeesus moonâi tastoo Kapernaum kaavpugân, mii lii Galileast. Sun máttááttij tobbeen sabattin, ₃₂já ulmuuh lijjii hiämáskâm suu máttááttâsâst, tastko sun sáárnui tego sárnu tot, kiäst lii väldi.

₃₃Synagogast lâi almai, kiäst lâi nyeskis jieggâ. Tot čuárvui korrâ jienáin: ₃₄»Vuoi, maid tun mist táátuh, Jeesus Nasaretlâš? Lah-uv tun puáttám tuššâdiđ mii? Mun tiäđám, kii tun lah, Immeel Pase!» ₃₅Mut Jeesus kočoi jiegâ korrâsávt: »Oro joskâ! Vyelgi sust.» Talle paas jieggâ leggistij almaa enâmân kaskoo olmoošjuávhu já vuolgij sust ige vahâgittám suu. ₃₆Puohah lijjii hiämáskâm já ettii kuáimásis: »Mii saavâid taat jiešalnees lii? Sun koččo nyeskis jiegâid valdijn já vuoimijn, já toh vyelgih kiäinusis.» ₃₇Nuuvt saahâ Jeesusist levânij ton kuávlust jyehi sajan.

₃₈Jeesus vuolgij synagogast já moonâi Simmoon pááikán. Simmoon vyene lâi korrâ kumestâsâst, já ulmuuh tattuu, et Jeesus išedičij suu. ₃₉Jeesus komárdui suu piälán já kočoi kumestâs, já tot vuolgij sust. Tállân nissoon pajanij juolgijdis oolâ já palvâlškuođij kuosijdis.

₄₀Maŋgâs pääihist lâi kiinii puocâmin, kii mon-uv taavdâst. Ko piäiváš lâi lyeštimin, te pyecceeh puáhtojii Jeesus kuuvl, já sun piejâi kieđâs juáhháá oolâ já pyeredij sii. ₄₁Maŋgâsist vuolgii meiddei paas jiegah, moh čuorvuu: »Tun lah Immeel Alge!» Mut Jeesus nuttâlij taid ige suovvâm taid sárnuđ, tastko toh tiettii, et sun lâi Messias.

₄₂Peeivičuovâ iđedijn Jeesus vuolgij olgos já moonâi sajan, kost sun puovtij orroođ ohtuu. Ulmuuh liijká vuolgii uuccâđ suu. Sij juksii suu já estâlii suu vyelgimist jieijâs kulen. ₄₃Mut Jeesus eeđâi: »Mun koolgâm tuálvuđ Immeel väldikode ilosaavâ meiddei eres kaavpugáid, tađe váráshân mun lam vuolgâttum.» ₄₄Já sun särnidij Juudea synagogain.