Luukas 7

₁Ko Jeesus lâi sárnum puoh taam sijjân aalmug kuldâldijn, sun vuolgij Kapernaumân. ₂Mottoom čyeđeuáivalmaa palvâleijee puosâi jäämmimtaavdâst. Čyeđeuáivalmai oonij palvâleijee stuorrâ áárvust, ₃já ko sun lâi kuullâm Jeesusist, sun vuolgâttij juudalijn puárrásumosijd táttuđ, et Jeesus puáđáččij já pyeredičij suu palvâleijee. ₄Sij pottii Jeesus kuuvl já annuu sust korrâsávt: »Tot almai áánsáš tuu iše. ₅Sun räähist mii aalmug, já sun lii huksiittâm mii synagoga-uv.»

₆Jeesus vuolgij sii fáárun. Mut ko sun lâi jo alda táálu, te čyeđeuáivalmai vuolgâttij ustevijdis pyehtiđ sunjin sääni: »Hiärrá, ele väivid jieijâd. Mun jiem lah ton árvusâš, et tun puáđáččih muu káátu vuál. ₇Mun jiem annaam jieččân tongin árvusâžžân, et liččim puáttám tuu kuuvl. Kočo, te palvâleijem puárrán. ₈Mun tottâlâm jieš-uv nubij pákkumijd já kočom jieččân suáldáttijd. Ko mun eeđâm suáldáttân: ’Moonâ’, te sun mana, teikâ nuubán: ’Puáđi’, te sun puátá, teikâ jieččân palvâleijei: ’Poorgâ taam’, te sun parga.» ₉Jeesus hiämáskij täin saanijn. Sun jorgettij maŋŋaalstis puáttee olmoošjuávhu piälán já eeđâi: »Kuullâđ, maid mun eeđâm: tággáár osko mun jiem lah kuáhtám, jiem Israel aalmug koskâvuođâstkin.» ₁₀Ko Jeesus oovdeld vuálgám almaah maccii táálun, te sij kuáhtájii palvâleijee tiervâsin.

₁₁Forgâ taan maŋa Jeesus vuolgij Nain kaavpugân, já máttááttâspárnááh já stuorrâ olmoošjuávkku juttii suin. ₁₂Ko sun lâi jo alda kaavpug poortâ, te tobbeen kuoddui uámikkâs, kote lâi leskâeeni áinoo alge, já eeni fáárust lijjii ennuv kaavpug ulmuuh. ₁₃Ko Jeesus ooinij nissoon, te sun šallišij taam já eeđâi: »Ele čiäru.» ₁₄Sun moonâi kyeddimmuorâi paaldân já kuoskâttij taid, jeđe kyeddeeh orostii. Sun eeđâi: »Nuorâ almai, mun eeđâm tunjin: čyežžil!» ₁₅Talle uámikkâs pajanij čokkod já sárnuškuođij, já Jeesus adelij suu maassâd iännásis.

₁₆Puohah palaskii já alestii Immeel eeđân: »Mii koskâvuotân lii almostum stuorrâ proofeet. Immeel lii puáttám almugis iššeen.» ₁₇Forgâ ulmuuh sarnuu Jeesusist Juudea jyehi kuávlust já jyehi saajeest ton pirrâsist.

₁₈Juhánâs máttááttâspárnááh muštâlii täst puohâst máttáátteijeesis. Talle sun kočoi kuáhtá sust jieijâs kuuvl ₁₉já vuolgâttij sunnuu koijâdiđ Hiärást: ’Lah-uv tun tot, kii kalga puáttiđ, vâi kolgâp-uv mij vyerdiđ kiännii iärrás?» ₂₀Almaakyevtis poođijn Jeesus kuuvl já eeđáin: »Juhánâs Kästee vuolgâttij munnuu koijâdiđ tust: ’Lah-uv tun tot, kii kalga puáttiđ, vâi kolgâp-uv mij vyerdiđ kiännii iärrás?’

₂₁Jeesus lâi eidu talle pyeredâm maaŋgâi ulmui taavdâid já vaaivijd, vuájálittám paas jiegâid já adelâm maaŋgâ čalmettiämán uáinu. ₂₂Nuuvtpa sun västidij: »Mannee já muštâlee Juhánâsân, maid leppee uáinám já kuullâm:

₂₄Ko Juhánâs vuolgâttem almaakyevtis láin vuálgám meddâl, Jeesus sárnuškuođij ulmuid Juhánâsâst:

»Maid tij vuolgijd ävđinkuávlun keččâđ? Ruávu-uv, mon pieggâ luvvá? ₂₅Vâi maid tij vuordijd, et uáináččijd? Fiijnáht kárvuđâttâm almaa-uv? Kunâgâs loonijn tij taid kavnâvetteđ, kiäh kárvudeteh hervâpihtâsijd paijaalsis já eelih valjaavuođâst! ₂₆Maid tij talle vuordijd, et tij uáináččijd? Proofeet-uv? Eidu nuuvt, já mun eeđâm tijjân, et sun lii eenâb-uv ko proofeet. ₂₇Sun lii tot, kiäst lii čallum:

₂₈Mun eeđâm tijjân: ohtâgin nisonist šoddâm olmooš ij lah stuárráb ko Juhánâs, mut puoh ucemus-uv Immeel väldikoddeest lii stuárráb ko sun.»

₂₉Puohah, kiäh kullii Juhánâs, publikaaneh-uv, miettii tubdâstiđ, et Immeel vátámuš lâi olmânáál, já sij valdii Juhánâsâst kaastâ. ₃₀Mut fariseuseh já laavâmáttáátteijeeh vuástálistii Immeel táátu iäge váldám Juhánâsâst kaastâ.

₃₁»Moos mun tastoo verdidiččim taan suhâpuolvâ ulmuid? Magareh sij láá? ₃₂Sij láá tego markkânsaajeest čokkájeijee párnááh, kiäh čuárvuh kuáimásis: ’Mij čuojâttijm tijjân huuilu, mut tij eppeđ tánssám, mij toolâim murâštuáluid, mut tij eppeđ čiärrum fáárust.’ ₃₃Juhánâs Kästee lii puáttám, sun ij puurâ leeibi ige juuvâ viini, já tij etâvetteđ: ’Sust lii paas jieggâ.’ ₃₄Ulmuu alge lii puáttám, sun porá já juhá, já tij etâvetteđ: ’Mon vuávnáá já juhhee, publikaanij já suddogâsâi ustev!’ ₃₅Mut Vijsesvuođâ tubdâsteh vuoigâdin puoh Vijsesvuođâ párnááh.»

₃₆Mottoom fariseus kočoi Jeesus páikkásis purâdiđ, já sun moonâi toho já asâttâđâi piävdán. ₃₇Kaavpugist aasâi nissoon, kote vietij suddogâs eellim. Ko sun poođij tiettiđ, et Jeesus lâi puurâdmin fariseus kulen, te sun poođij toho fárustis alabasterputtâl, mast lâi opsâoljo. ₃₈Sun asâttâđâi Jeesus tuáhá suu juolgij kuuvl já čiärui. Ko Jeesus jyelgih njuoskii suu konnjâlijn, sun sihoi taid vuoptâidiskuin, cummâlij taid já vuoidâi taid opsâoljoin.

₃₉Fariseus, kote lâi koččom Jeesus, ooinij tom já jurdâččij: »Jis taat almai ličij proofeet, sun kale tiäđáččij, maggaar nissoon lii kuoskâttâlmin suu. Nissoonhân lii suddogâs.» ₄₀Talle Jeesus eeđâi sunjin: »Simmoon, must lii tunjin sárnumâš.» »Sáárnu peri, máttáátteijee», fariseus västidij.

₄₁»Te láin almaakyevtis», eeđâi Jeesus. »Suoi láin velgus loovnâadeleijei, nubbe vittâčyeđe, já nubbe vittlov denarid. ₄₂Ko sunnust ij lamaš moin mäksiđ, te loovnâadeleijee adelij kuohtuid veelgi addâgâs. Maht lii, kuábáš sunnust tääl räähist suu eenâb?» ₄₃Simmoon västidij: »Ij-uvks tot, kote uážui eenâb addâgâs.» »Aaibâs olmânáál», eeđâi Jeesus. ₄₄Sun jorgettij nissoon kulij já sáárnui Simonân: »Keejâ taam nissoon. Ko mun poottim tuu pááikán, tun jieh adelâm čääsi juolgij poossâm várás, mut sun njuoskâdij muu juolgijd konnjâlijdiskuin já kuškij taid vuoptâidiskuin. ₄₅Tun jieh tiervâttâm muu cummijn, mut sun lii cummâlâššâm muu juolgijd ton rääjist ko mun teehin poottim. ₄₆Tun jieh vuoidâm muu uáivi oljoin, mut sun vuoidâi muu juolgijd opsâoljoin. ₄₇Nuuvtpâ mun eeđâm-uv tunjin: sun uážui suddohivvâduvvâs addâgâs, já tondiet sun rähistij čuuvtij. Mut kote uážžu addâgâs uccáá, tot meiddei räähist uccáá.» ₄₈Já sun eeđâi nisonân: »Puoh tuu sudoh láá addâgâs adelum.»

₄₉Pevdikyesih imâštâlškuottii: »Kii tot almai lii? Sunhân addel suddoid-uv addâgâs.» ₅₀Mut Jeesus eeđâi nisonân: »Oskood lii piäluštâm tuu. Moonâ ráávhust.»