Matteus 19

₁Ko Jeesus lâi sárnum puoh taam, te sun vuolgij Galileast já juuđij talle Jordan nuorttiipele Juudean. ₂Suu servidij stuorrâ olmoošjuávkku, já sun pyeredij sii.

₃Suu kuuvl pottii meiddei fariseuseh, kiäh halijdii keččâlâddâđ suu já koijâdii: »Uážžu-uv almai hilgođ káálgus mon suujâst ihenis?» ₄Sun västidij sijjân: »Eppeđ-uv lah luuhâm, et Sivnedeijee aalgâst sivnedij ulmuu almajin já nisonin?» ₅Já sun joođhij: »Tondiet almai kuáđá eejis já eenis já ohtân kálgusis, nuuvt et taah kyevtis šoddâv ohtân uážžin. ₆Suoi iävá tääl innig lah kyehti, suoi lává ohtâ. Já maid Immeel lii ohtâdâm, tom iälus olmooš iärut.»

₇Fariseuseh koijâdii sust: »Mondiet talle Mooses lii asâttâm, et jis almai hilgo káálgus, sun kalga adeliđ taas iärukirje?» ₈Sun västidij: »Mooses adelij tijjân love hilgođ káálgud, tastko tij leppeđ nuuvt korrâváimusiih. Mut algâaalgâst tot ij lamaš nuuvt. ₉Mun eeđâm tijjân: tot kote hilgo káálgus mudoi ko huárástem tiet já náájá iärásáin, taha näimirikkoos. [Näimirikkoos taha meiddei tot, kote náájá nissoon, kiäm taan käälis lii hilgom.»]

₁₀Máttááttâspárnááh ettii: »Jis näimilitto meerhâš almai taam, te lii pyereeb leđe najâhánnáá.» ₁₁Mut sun eeđâi sijjân: »Tot čuávdus ij heivii puohháid, tuše toid, kiäid tot uási lii adelum. ₁₂Laa tagareh, kiäh eenis kuáhtu rääjist láá näimiliiton kiälbuttemeh, laa iäráseh, kiäin ulmuuh láá ráhtám tagarijd, já láá toh, kiäh jiejah, oolmij väldikode tiet, láá valjim uásinis najâhánnáávuođâ. Kote puáhtá valjiđ taam čuávdus, te väljejus.»

₁₃Jeesus kuuvl puáhtojii párnááh, vâi sun piejâččij kieđâidis sii oolâ já ruhâdâlâččij. Máttááttâspárnááh laittii pyehteid, ₁₄mut Jeesus eeđâi: »Tipteđ párnáid orroođ já elleđ eesti sii puátimist muu kuuvl. Tonmuđušij lii Immeel väldikodde.» ₁₅Sun piejâi kieđâidis sii oolâ. Talle sun vuolgij tobbeen.

₁₆Mottoom almai poođij koijâdiđ Jeesusist: »Máttáátteijee, maid puorijd mun koolgâm porgâđ, vâi mun uážuččim nuvâhánnáá eellim?» ₁₇Jeesus västidij sunjin: »Mondiet tun must pyere kuáttá koijâdâlah? Lii tuše ohtâ, kote lii pyeri. Jis tun halijdah peessâđ siisâ elimân, te nuávdit pákkumijd.» ₁₈»Maid pákkumijd?», almai koijâdij. »Täid», västidij Jeesus, »ele kode, ele toovâ näimirikkoos, ele suáláád, ele tuođâšt puástud, ₁₉kunnijât iäččád já iännád, já räähist aldemud tego jieijâd.» ₂₀»Puoh taid lam nuávdittâm», eeđâi nuorâ almai, »mii vala váilu?» ₂₁Jeesus eeđâi sunjin: »Jis táátuh leđe oles, te moonâ já vyebdi puoh, mii tust lii, já adde ruuđâid kievhijd. Talle tust lii täävvir oolmijn. Puáđi talle já čuávu muu.» ₂₂Mut ko nuorâ almai kuulâi täid saanijd, te sun vuolgij murâšlâžžân meddâl, tastko sust lâi ennuv omâdâh.

₂₃Talle Jeesus eeđâi máttááttâspárnáidis: »Tuođâi: riggást lii vaigâd peessâđ oolmij väldikoodán. ₂₄Mun eeđâm tijjân: älkkeb lii kamelist moonnâđ äimičalme čoođâ ko riggást peessâđ Immeel väldikoodán.» ₂₅Ko máttááttâspárnááh kullii taam, te sij hiämáskii já koijâdii: »Kii talle puáhtá piäluštuđ?» ₂₆Jeesus keejâi sijjân já eeđâi: »Ulmui tot lii máhđuttem, mut Imelân puoh lii máhđulâš.»

₂₇»Maht mij?» Piättár talle koijâdij. »Mij lep luoppâm puohâst já servidâm tuu. Maid mij tast uážžup?»

₂₈Jeesus eeđâi sijjân:

»Tuođâi: ko Immeel Alge uđđâ maailm šodâdijn čokkáán kirkkâdvuođâs väldičokkámsajan, te talle tij-uv, kiäh leppeđ servidâm muu, uážžuvetteđ čokkáđ kyevtinubálov väldičokkámsaajeest já haldâšiđ Israel kyehtnubáloh hiäimud. ₂₉Já juáháš, kote muu noomâ tiet lii luoppâm tálustis, viljâinis, obijnis, ejistis, enistis teikâ párnáinis teikâ piälduinis, uážžu čyetikiärdásávt maassâd já ärbee nuvâhánnáá eellim. ₃₀Mut maaŋgah vuosmuuh kärttih majemužžân já majemuuh vuosmužžân.