Matteus 22

₁Jeesus joođhij viärdádâssavâidis já eeđâi sijjân:

₂»Oolmij väldikode puáhtá verdidiđ kunâgâsân, kote ornij heejâid algasis. ₃Sun vuolgâttij palvâleijeidis koččođ hejâkuosijd, mut kiäh koččojii, iä halijdâm puáttiđ. ₄Talle sun vuolgâttij eres palvâleijeid já kočoi sii ettâđ kuččum kuossijd: ’Lam ráhtám málásijd, vuávsáh já pyeidis käälbih láá njuovvum, puoh lii valmâšin. Puáttiđ heejáid!’ ₅Mut motomeh kiäh koččojii, iä perustâm tast, mut monnii eres sajan, kii piäldusis, kii kavpijdis, ₆motomeh vuod valdii kunâgâs palvâleijeid kiddâ, caimii sii já huškuu jaamâs. ₇Talle kunâgâs iädui. Sun vuolgâttij suátivievâs, tuššâdij koddeid já pooldij sii kaavpug. ₈Talle kunâgâs eeđâi palvâleijeidis: ’Puoh lii vaalmâšin hejâjuhle várás, mut kiäh koččojii, iä lamaš juhle árvusiih. ₉Moonnâđ tääl luodâi oolâ já markkânsoojijd já koččođ heejáid kiäid peri teividvetteđ.’ ₁₀Palvâleijeeh monnii já čuákkejii puohâid, kiäid sij teividii, nuuvt paaid ko puorijd, já hejâviste tievâi hejâmálásáid puáttám ulmuin.

₁₁»Ko kunâgâs poođij siisâ keččâđ juhlekuosijdis, sun ooinij tobbeen almaa, kiäst ij lamaš hejâpiivtâs. ₁₂Sun koijâdij täst: ’Ustevâm, maht tun puohtih puáttiđ teehin hejâpihtâsijttáá?’ Almai oroi joskâ. ₁₃Talle kunâgâs eeđâi palvâleijeidis: ’Čoonnâđ suu kieđâid já juolgijd já leggistiđ olgos sevŋâdâsân. Tobbeen lii čiärrum já paanij kiccâm. ₁₄Maaŋgah láá kuččum, mut häärvih láá väljejum.’»

₁₅Talle fariseuseh monnii ráđádâllâđ koskânis, maht sij finniiččii Jeesus surruđ sanijdiskuin. ₁₆Sij vuolgâttii suu kuuvl máttááttâspárnáidis oovtâst Herodes kyeditteijeiguin. Taah ettii: »Máttáátteijee, mij tiettip, et tun sáárnuh tuođâ já máttááttah Immeel kiäinu tuotâvuođâ mield. Tun lah rijjâ ulmuin jiehke toovâ iäru sii kooskâst. ₁₇Eeđâ tääl mijjân, maht oro tuu mielâst: lii-uv olmânáál mäksiđ kiäisárân viäru vâi ij?» ₁₈Mut Jeesus huámášij sii kielesvuođâ já eeđâi: »Tij tohâluddeeh! Mondiet tij keččâlvetteđ uážžuđ muu kiddâ saanijn? ₁₉Čäittiđ tom ruuđâ, moin tij mäksivetteđ viäruidâd.» Sij čaittii deenaar. ₂₀Jeesus koijâdii sist: »Kiän kove já nommâ tast lii?» ₂₁»Kiäisár», sij västidii. Talle Jeesus eeđâi sijjân: »Adeliđ talle kiäisárân, mii kiäisárân kulá já Imelân, mii Imelân kulá.» ₂₂Ko sij kullii taam, sij hiämáskii. Sij kuođđii Jeesus ráávhun já vuolgii meddâl.

₂₃Siämmáá peeivi Jeesus kuuvl pottii saddukeuseh, kiäh kieldih pajaspajanem. Sij koijâdii sust: ₂₄»Máttáátteijee, Mooses lii ettâm: ’Jis almai jáámá pärnitteemmin, suu viljâ kalga naaijâđ leskáin já skappuđ maajeeldpuáttee viljâsis.’ ₂₅Mii koskâvuođâst lijjii čiččâm viljâžid. Puárásumos naajâi, mut jaamij, já ko sust iä lamaš párnááh, leskâ paasij suu viiljân. ₂₆Nuuvt keevâi nube viiljân, nuuvt meiddei kuálmádân já viijmâg kiddâ čiččâd räi. ₂₇Majemustáá jaamij nissoon. ₂₈Kiän kálgu sun lii pajaspaijaanmist? Sunhân lâi naaijâm puoh viljâiguin.»

₂₉Jeesus västidij sijjân: »Tij čááijádvetteđ, ko eppeđ tuubdâ pase čalluid eppeđge Immeel vyeimi. ₃₀Ij pajaspaijaanmist kihheen vääldi káálgu ige riemâ kálgun. Pajaspajanâm ulmuuh laa tego eŋgâleh oolmijn. ₃₁Mut mii puátá pajaspaijaanmân – eppeđ-uv lah luuhâm, maid Immeel lii tijjân ettâm: ₃₂’Mun lam Áábráhâm Immeel, Issáák Immeel já Jáákkup Immeel’? Ij sun lah jämmei pic ellee ulmui Immeel.» ₃₃Ko olmoošjuávkku taam kuulâi, tot imâštâlâi suu máttááttâs.

₃₄Ko fariseuseh kullii, et Jeesus lâi toppâm saddukeusijn njäälmi, sij čokkânii ráđádâllâđ. ₃₅Te mottoom sist, kote lâi laavâmáttáátteijee, koijâdij Jeesusist suu keččâlâddâm tiet: ₃₆»Máttáátteijee, mii lii laavâ stuárráámus pákkum?» ₃₇Jeesus västidij: »Räähist Hiärá, Imelâd, ubâ váimustâd, ubâ siälustâd já mielâstâd. ₃₈Taat lii pákkumijn stuárráámus já tehálumos. ₃₉Nubbe siämmáá tehálâš lii taat: Räähist aldemud tego jieijâd. ₄₀Taan kyevti pákkumân mättih ubâ laahâ já profeteh.»

₄₁Ko fariseuseh lijjii čokkânâm, Jeesus koijâdij sist: ₄₂»Maid tij juurdâšvetteđ Messiasâst? Kiän alge sun lii?» Sij västidii: »Taavvid alge.» ₄₃Talle Jeesus koijâdij: »Mondiet Taavvid talle Jiegâ vaiguttâsâst koččo suu hiärrán? Sun iätá:

₄₅Jis kerd Taavvid koččo Messias hiärrán, te maht Messias talle puáhtá leđe suu alge?»

₄₆Kihheen ij máttám västidiđ sunjin, ige ohtâgin ton peeivi rääjist innig tuostâm koijâdiđ sust maiden.