Markus 9

₁Sun eeđâi vala: »Tuođâi: taam juávhust láá motomeh, kiäh iä kuáhtáá jäämmim ovdilgo uáinih, et Immeel väldikodde lii puáttám vyeimistis.»

₂Kuuđâ peeivi keččin Jeesus vaaldij fárusis Piättár, Jáákkup já Juhánâs já tuálvui sii ollâ váárán ohtuuvuotân, meddâl iärásij kulen. Tobbeen suu olgohäämi muttui sii oovdâst ₃já suu pihtâseh šiärrááškuottii nuuvt českâdin, et ij kihheen pivtâsviälgudeijeid eennâm alne pyevti taggaar finniđ ááigán.

₄Talle sijjân almostuin Eliakyevtis Moosesáin, já suoi savâstâláin Jeesusáin. ₅Piättár sárnuškuođij já eeđâi Jeesusân: »Rabbi, lii pyeri, et mij lep tääbbin. Mij rähtip kulmâ kuáđi: tunjin já Moosesân já Elian.» ₆Sun ij uáináh tiättám, maid ettâđ, tastko sij lijjii čuuvtij palaskâm.

₇Siämmást poođij polvâ, mii loovdij sii suoivuusis, já poolvâst kullui jienâ: »Taat lii muu rähis Alge, kuullâđ suu!» ₈Já fakkist, ko sij kejâstii pirrâsis, te sij iä innig uáinám tobbeen kiämmán iärrás ko Jeesus ohtuunis.

₉Já ko sij juttii vääri vuálus, te Jeesus váruttij sii muštâlmist kiässán, maid lijjii uáinám, ovdilgo Immeel Alge ličij pajanâm jämimist. ₁₀Já sij tiptii mielâst Jeesus saanijd já smietâdii koskânis, maid jämimist pajanem puovtij merhâšiđ.

₁₁Máttááttâspárnááh koijâdii Jeesusist: Iä-uv laavâmáttáátteijeeh eeđâ, et Elia kalga puáttiđ vistig? ₁₂»Elia tuođâi puátá vistig», sun västidij, ja piäjá vuod puoh oornigân. Mut mondiet talle lii čallum, et Immeel Alge kalga ennuv kierdâđ já pajeluvkeččuđ? ₁₃Kuullâđ, maid mun eeđâm: Elia lii jo puáttám! Ulmuuh tuše porgii sunjin maid halijdii, tego sust lii čallum.»

₁₄Ko Jeesus maacâi kulmáin máttááttâspárnáin eres máttááttâspárnái kuuvl, te sij oinii toi pirrâsist stuorrâ olmoošjuávhu já meiddei laavâmáttáátteijeid, kiäh nágáttellii máttááttâspárnáiguin. ₁₅Ko ulmuuh oinii Jeesus, te sij hiämáskii. Sij tuámittii suu kuuvl já tiervâttii suu. ₁₆Jeesus koijâdij sist: »Mii nágáttâlmijd tääbbin lii?» ₁₇Mottoom almai olmoošjuávhust västidij sunjin: »Máttáátteijee, mun puohtim algam tuu kuuvl. Sust lii kielâttes jieggâ. ₁₈Tot tuáppee suu váldásis kost peri. Tot leggist suu enâmân, já suu njäälmist puátá suptâ já sun káská panijdis já storgâsmuvá aaibâs. Mun tattum, et máttááttâspárnááh vuájálitáččii jiegâ, mut sij iä pastam tom porgâđ.»

₁₉Talle Jeesus eeđâi sijjân: »Vuoi taam epioskovâš suhâpuolvâ! Mon kuhháá mun vala koolgâm leđe tii kulen? Mon kuhháá mun koolgâm killáđ tii? Pyehtiđ alge muu kuuvl.» ₂₀Sij puohtii alge Jeesus kuuvl. Jeesus uáinidijnis jieggâ tállân storgâdij alge, já taat roovâi, jurâdij enâmist, já suptâ poođij suu njäälmist. ₂₁Jeesus koijâdij alge eejist: »Mon kuhháá sust lii lamaš taat váddu?» »Pärnivuođâ rääjist», almai västidij. ₂₂Jieggâ lii maŋgii komettâm suu, joba tuulân já čáácán, vâi puávtáččij suu koddeđ. Šalliš mii já iššeed, jis tun maiden vajah!» ₂₃»Jis vajah?» västidij Jeesus. »Puoh lii máhđulâš toos, kote osko.» ₂₄Talle alge eeči tállân čuorvij: »Mun oskom!» Iššeed muu epioskostân!»

₂₅Ko Jeesus ooinij, et ulmuuh pottii ain eenâb, sun kočoi nyeskis jiegâ näävt: »Kielâttes já peljittes jieggâ, mun kočom tuu: vyelgi algeest elege innig moonâ sunjin! ₂₆Jieggâ huuihij, storgâdij alge korrâsávt já vuolgij sust. Alge paasij viälláđ tego ličij jáámmám, já maaŋgah ettii-uv: »Tääl sun jaamij.» ₂₇Mut Jeesus vaaldij suu kieđâst já išedij suu čuožâd, já sun čyežžilijj.

₂₈Ko Jeesus tastoo lâi moonnâm siisâ ja tuše máttááttâspárnááh lijjii tast, te taah koijâdii sust: »Mondiet mij ep áppádâm vuájálittiđ tom jiegâ algeest?» ₂₉Sun västidij: »Taam soortâ ij pyevti ääijiđ eresnáál ko ruhâdâssáin.»

₃₀Sij vuolgii tobbeen já juttii Galilea čoođâ. Jeesus ij halijdâm, et kihheen tieđij tast, ₃₁tastko sun máttááttij máttááttâspárnáidis. Sun eeđâi sijjân: »Ulmuu Alge adeluvvoo ulmui kieđáid, já sij koddeh suu, mut sun pajaspaijaan kuulmâ peeivi keččin.» ₃₂Máttááttâspárnááh iä iberdâm, maid sun tai sanijguin tárguttij, mut sij iä tuostâm koijâdiđ sust.

₃₃Sij pottii Kapernaumân. Ko Jeesus poođij pááikán, te sun koijâdij máttááttâspárnáin: »Mast tij määđhi ääigi savâstâlâid? ₃₄Sij urruu joskâ, tastko sij lijjii nágáttâllâm tast, kotemuš sist lâi stuárráámus. ₃₅Jeesus čokánij, čokkij puoh suu kyehtnubáloh máttááttâspärnid jieijâs pirrâ já eeđâi sijjân: »Jis kiinii haalijd leđe vuosmuš, te sun kalga leđe majemuš já puohâi palvâleijee.» ₃₆Talle sun piejâi sii kooskân párnáá, vaaldij suu askasis já eeđâi: ₃₇»Kote muu noomâst váldá jieijâs kuuvl oovtâgin tággáár párnáá, tot váldá jieijâs kuuvl muu. Já kote váldá muu jieijâs kuuvl, ij vääldi muu pic tom, kote lii muu vuolgâttâm.»

₃₈Juhánâs eeđâi sunjin: »Máttáátteijee, mij ooinijm mottoom almaa vuájálitmin paas jiegâid tuu noomâst. Mij keččâlijm estiđ suu, tastko sun ij kuulâ mii juávkun.»

₃₉Mut Jeesus västidij:

»Elleđ eesti suu. Ijhân ohtâgin, kote taha vyeimitavo muu noomâst, pyevti tállân tastmaŋa sárnuđ must paa. ₄₀Tot kote ij lah mii vuástá, lii mii pele. ₄₁Tuođâi: tot kote addel tijjân kuvse tievâ čääsi tondiet, et tij leppeđ Kristus uámih, ij pääsi pälhittáá.

₄₂»Mut jis kiinii čájádit oovtâgin täin ucemusâin, kiäh oskoh munjin, ličij sunjin pyereeb, et sun leggistuuččij meerân millokeđgi čiäpáttist. ₄₃Jis kiettâd viettâl tuu, te čuopâ tom meddâl. Liihân pyereeb, et kietâpeellin peesah siisâ elimân, ko et tun kuohtui kieđâiguin kaartah helvitân, časkâhánnáá tuulân, [ ₄₄mast ’máátu ij jäämi ige tullâ čaaskâ’]. ₄₅Jis juálgád viettâl tuu, te čuopâ tom meddâl. Liihân pyereeb, et jyelgipeelijn peesah siisâ elimân, ko et tun kuohtui juolgijguin leggistuuh helvitân, [ ₄₆kost ’máátu ij jäämi ige tullâ čaaskâ’]. ₄₇Já jis tuu čalme viettâl tuu, te leggist tom meddâl. Liihân pyereeb, et čalmepeellin peesah siisâ Immeel väldikoodán, ko et tun kuohtui čolmijguin leggistuuh helvitân, ₄₈kost ’máátu ij jäämi ige tullâ čaaskâ’.

₄₉»Juáháš šadda sälttejuđ tuuláin. ₅₀Sältti lii anolâš. Mut jis tot moonât máávus, te moin tom finnee njaddeđ? Liävus tist sältti alnaad já eelliđ sovâdávt kuoimijdâdguin.»