1. Muitalusaid girji 12

₁Dát leat olbmát geat juo dalle go David báhtarii Saulis, Kiša bártnis, bohte su lusa Siklagii. Sii ledje dat soahteolbmát geat veahkehedje su soađis. ₂Vearjun sis ledje dávggit, ja sii máhtte šleŋget geđggiid ja báhčit njuolaid sihke olgeš ja gurut gieđain. Sii ledje Saula čeardda olbmot, benjaminlaččat, ja dát lea logahallan sis: ₃Ahieser, sin oaivámuš, ja Joaš, gibealaš Šemaa bártnit, Jesiel ja Pelet, Asmaveta bártnit, Berekja, anatotlaš Jehu, ₄gibeonlaš Jišmaja, okta dan golmmalogi stuorimus soahteolbmás ja sin oaivámuš, Jeremia, Jahasiel, Johanan, gederalaš Josabad, ₅Elusai, Jerimot, Bealja, Šemarja, haruflaš Šefatja, ₆korahlaččat Elkana, Jiššia, Asarel, Joeser ja Jašobam, ₇ja vel Joela ja Sebadja, gedorlaš Jerohama bártnit.

₈Muhtun gadlaččat manne Davida beallái go son lei várreladnis meahcis. Sii ledje jálus olbmát ja hárjánan soahteolbmát, vearjun sis lei galba ja sáiti. Sii ledje oaidnit dego ledjonat ja falit dego váriid gasellat. ₉Vuosttaš lei Eser, nubbi Obadja, goalmmát Eliab, ₁₀njealját Mišmanna, viđát Jeremia, ₁₁guđát Attai, čihččet Eliel, ₁₂gávccát Johanan, ovccát Elsabad, ₁₃logát Jeremia ja oktanuppelogát Makbannai. ₁₄Sii ledje gadlaččaid soahteveaga oaivámuččat; heajumus sis lei čuohtása veardásaš, gievrramus duháha. ₁₅Sii rasttildedje Jordana vuosttaš mánus, dalle go dat lei dulvan badjel gáttiidis ja deavdán buot legiid sihke nuortin ja oarjin.

₁₆Muhtun Benjamina ja Juda olbmát ledje boahtimin várreladnái Davida lusa. ₁₇David manai sin ovddal ja dajai: “Jos dii boahtibehtet mu lusa ráfálaš oaivilis ja áigubehtet veahkehit mu, de mun dagan dinguin lihtu. Muhto jos dii áigubehtet beahttit mu mu vašálaččaide, vaikko mun in leat dahkan veahkaválddi, de min áhčiid Ipmil oaidná dan ja ráŋggášta din.” ₁₈Dalle vuoigŋa devddii Amasaja, dan golbmalohkása oaivámučča, ja son dajai:

₁₉Maiddái muhtun manasselaččat manne Davida beallái, go son vulggii filistalaččaid fárrui soahtat Sauliin. Son ii goit gártan veahkehit filistalaččaid, dainna go sin oaivámuččat vuolggahedje su ruoktot. Sii ledje ráđđádallan gaskaneaset ja dadjan guhtet guoibmáseaset: “Dat máksá midjiide oaivvi, jos son manná hearrás Saula beallái.” ₂₀Go David vulggii Siklagii, de su beallái sirdásedje dát Manasse olbmát: Adnah, Josabad, Jediael, Mikael, Josabad, Elihu ja Silletai, geat ledje Manasse sogaid oaivámuččat. ₂₁Sii gádjo Davida rievvárjoavkkuin, danin go sii ledje buohkat jálus soahteolbmát. Sii šadde soahteveaga oaivámužžan, ₂₂danin go beaivvis beaivái Davida veahkkin bohte ain eambbo olbmot, ja su soahteveahka šattai hui stuorisin.

₂₃Dát lea logahallan dain hárjánan soahteolbmáin geat bohte Davida lusa Hebronii sirdit Saula gonagasvuođa Davidii, nugo Hearrá lei gohččon: ₂₄Juda čearddas guhttaduhát gávccičuođi hárjánan soahteolbmá geaid vearjun lei galba ja sáiti; ₂₅Simeona čearddas čiežaduhát čuođi jálus soahteolbmá; ₂₆Levi čearddas njealljeduhát guhttačuođi ₂₇ja vel Jojada, Arona soga oaivámuš, ja suinna golbmaduhát čiežačuođi olbmá, ₂₈de vel Sadok, nuorra ja jálus soahteolmmái, ja su sohka, guoktelogiguokte oaivámučča; ₂₉Benjamina čearddas, Saula olbmuin, golbmaduhát olbmá. Eatnašat ledje oainnat ain oskkáldasat Saula sohkii; ₃₀Efraima čearddas guoktelogiduhát gávccičuođi jálus soahteolbmá, sogaideaset beakkálmasat; ₃₁Manasse čeardabeales gávccinuppelotduhát olbmá geat ledje vuolggahuvvon dahkat Davida gonagassan; ₃₂Isaskara čearddas dat geat áddejedje áiggiid ja ipmirdedje mii lea buorre Israelii, guoktečuođi oaivámučča ja buot sin fuolkkit geat doahttaledje sin; ₃₃Sebulonis vihttalogiduhát soahteolbmá geat ledje hárjánan atnit buotlágán vearjjuid ja ledje ovttamielalaččat veahkehit Davida; ₃₄Naftalis duhát oaivámučča ja singuin golbmalogičiežaduhát olbmá geaid vearjun lei galba ja sáiti; ₃₅danlaččain guoktelogigávcciduhát guhttačuođi hárjánan soahteolbmá; ₃₆Ašeris njealljelogiduhát vearjoolbmá geat ledje gergosat soahtat; ₃₇Jordana duohken ledje rubenlaččat, gadlaččat ja nuortti manasselaččat, oktiibuot čuođiguoktelogiduháha, buot olbmáin mielde juohkelágán vearjjut.

₃₈Buot dát hárjánan soahteolbmát bohte Hebronii, ja sis lei nana áigumuš dahkat Davida oppa Israela gonagassan. Maiddái buot eará israellaččat ledje ovttamielalaččat das ahte David dahkkojuvvo gonagassan. ₃₉Sii orro das Davida luhtte golbma beaivvi, juhke ja borre; sin olbmot ledje nisten sin. ₄₀Maiddái dat geat ásse das lahkosiin, ja velá Isaskara, Sebulona ja Naftali olbmot bukte sidjiide áseniiguin, kamelaiguin, mulaiguin ja vuovssáiguin valjis borramuša, jáffuid, fiikongáhkuid, rusingáhkuid, viinni ja oljju ja vel stuorraomiid ja smávvaomiid, danin go dál Israelis lei illu.