1. Muitalusaid girji 14

₁Tyrosa gonagas Hiram vuolggahii Davida lusa áirasiid. De son doaimmahii Davidii sedermuora ja vuolggahii muvrráriid ja snihkkáriid hukset sutnje šloahta. ₂Dalle David ipmirdii ahte Hearrá lei nannen su gonagasvuođa ja diktán dan menestuvvat sutnje álbmogis Israela dihte.

₃Jerusalemis David válddii velá eambbo áhkáid, ja sutnje riegádedje eambbo bártnit ja nieiddat. ₄Dát bártnit sutnje riegádedje Jerusalemis: Šammua, Šobab, Natan, Salomo, ₅Jibhar, Elišua, Elpelet, ₆Nogah, Nefeg, Jafia, ₇Elišama, Beeljada ja Elifelet.

₈Go filistalaččat gulle ahte David lei vuidojuvvon oppa Israela gonagassan, de sii buohkat johttájedje ja áigo fallehit su. David gulai dan ja vulggii sin vuostá. ₉Filistalaččat bohte ja spedje miehtá Refaimleagi. ₁₀David jearai Ipmilis: “Manango mun soahtat filistalaččaiguin? Attátgo don sin mu gihtii?” Hearrá vástidii: “Soahttá, mun attán sin du gihtii.” ₁₁Israellaččat vulge Baal-Perasimii, ja David časkkii doppe filistalaččaid. Son dajai: “Ipmil lea diktán mu cuvket vašálaččaidan nugo čázit cuvkejit buođu.” Dan dihte dat báiki gohčoduvvui Baal-Perasimin. ₁₂Filistalaččat guđđe dohko ipmiliiddiset, ja David gohčui boaldit daid. ₁₃Muhto filistalaččat spedje fas Refaimleagi. ₁₄David jearai fas Ipmilis neavvaga, ja Ipmil vástidii: “Ale mana sin vuostá, muhto mohkas sin duohkái ja fallet sin bakamuoraid bealde. ₁₅Go gulat muorragierragiin lávkensuopmana, de fallet dalle, danne go dat lea mearkan das ahte Ipmil lea vuolgán du ovddas časkit filistalaččaid soahteveaga.” ₁₆David dagai nugo Ipmil lei gohččon, ja israellaččat časke filistalaččaid soahteveaga ja doarridedje dan Gibeonis gitta Gesera rádjái. ₁₇David beaggigođii buot eatnamiidda, ja Hearrá divttii buot álbmogiid ballat sus.