Levilaččaid giittuslávlla
1Ipmila árka buktojuvvui dan goahtái maid David lei ceggen dan várás, ja Ipmila muođuid ovddas oaffaruššojuvvojedje boaldinoaffarat ja searvevuođaoaffarat. 2Go David lei geargan oaffaruššamis, de son buressivdnidii álbmoga Hearrá nammii 3ja juogadii buot israellaččaide, sihke olbmáide ja nissoniidda, iešguhtiige láibbi, daddelgáhku ja rusingáhku.
4David bijai muhtun levilaččaid bálvalit Hearrá árkka ovddas ja rámidit, giitit ja máidnut Hearrá, Israela Ipmila. 5Asaf lei sin oaivámuš, ja nubbin su maŋis lei Sakarja. Earát ledje Jaasiel, Šemiramot, Jehiel, Mattitja, Eliab, Benaja, Obed-Edom ja Jeiel geat čuojahedje hárppaid ja lyraid. Asaf dearppai symbálaid, 6ja báhpat Benaja ja Jahasiel bosuiga dorvve. Sii buohkat galge bálvalit álelassii Ipmila lihtuárkka ovddas. 7Dan beaivvi David gohčui Asafa ja su vieljaid vuosttaš geardde máidnut Hearrá ná:
8Giitet Hearrá, rávket su nama,
muitalehket álbmogiidda
su stuorra daguid!
9Lávlot ja čuojahehket su gudnin,
almmuhehket buot su oavdudaguid!
10Máidnot su bassi nama,
illudehkoset dat geat ohcet Hearrá.
11Jerret Hearrá ja su fámu,
ohcet álelassii su muođuid.
12Muitet oavdduid maid son lea dahkan,
su mearkkaid ja su duomuid,
13dii Israela, su bálvaleaddji, mánát,
dii Jakoba bártnit geaid son lea válljen.
14Son lea Hearrá, min Ipmil,
su váldi ollá miehtá eatnama.
15Muitet agálaččat su lihtu,
lohpádusa maid son ásahii duhát čerdii,
16lihtu maid son dagai Abrahamiin,
váli maid son vuortnui Isakii.
17Son attii dan Jakobii riektin,
Israelii agálaš lihttun:
18“Mun attán dutnje Kanaana eatnama
árbin ja opmodahkan.”
19Go dii leiddet dušše uhca jovkkoš,
hárvát ja vierrásat eatnamis,
20go vádjoleiddet álbmogis álbmogii,
ovtta riikkas nubbái,
21de son ii suovvan geange soardit din.
Din dihte son ráŋggui gonagasaid:
22“Allet duohtat daid
geaid mun lean vuoidan,
allet daga baháid mu profehtaide!”
23Lávllo Hearrái, oppa eanan!
Gulahehket su bestojumi beaivvis beaivái!
24Muitalehket álbmogiidda su gudni,
buot álbmogiidda su oavdudaguid!
25Stuoris lea Hearrá, sakka rámidahtti,
hirbmoseabbo go buot ipmilat.
26Buot álbmogiid ipmilat
leat eahpeipmilat,
muhto Hearrá lea dahkan almmi.
27Su birra lea allatvuohta
ja hearvásvuohta,
su bassibáikkis lea fápmu ja illu.
28Gudnejahttet Hearrá,
olmmoščearddat,
gudnejahttet Hearrá fámu,
29gudnejahttet su nama!
Buktet su ovdii oaffarattáldagaid,
loaiddastehket Hearrá ovdii
bassi čikŋabiktasiin!
30Doarggis su muođuid ovddas,
oppa eanan!
Muitalehket álbmogiidda:
Hearrá lea gonagas!
Eanan bissu nanusin, ii dat lihkkas.
31Illudehkos albmi, ávvudehkos eanan!
Gulahehket buot álbmogiid gullut:
Hearrá lea gonagas!
32Máraidehkos mearra
ja mii dan deavdá,
ávvudehkos eanan
ja buot mii lea dan alde.
33Dalle vuovddi muorat šuvaidit ilus
Hearrá muođuid ovddas,
danin go son boahtá
buktit vuoigatvuođa eatnama ala.
34Giitet Hearrá! Son lea buorre,
su árbmugasvuohta bistá agálaččat.
35Dadjet: Veahket min, bestojumi Ipmil,
viečča min ruoktot ja gájo min
álbmogiid gaskkas,
vai mii beassat máidnut du bassi nama,
ja giitit ja rámidit du.
36Máidnojuvvon lehkos Hearrá,
Israela Ipmil,
agálašvuođas agálašvuhtii.
Oppa álbmot celkkii: “Amen”, ja máinnui Hearrá.
Levilaččaid doaimmat
37David bijai Asafa ja su soga olbmáid doaimmahit álelassii bálvalusa Hearrá lihtuárkka ovddas, nugo lei mearriduvvon guđege beaivái. 38Obed-Edom, Jedutuna bárdni, ja su soga olbmát, oktiibuot guhttalogigávcci, ja Hosa biddjojuvvojedje uksafáktan.
39Báhppa Sadoka ja su soga olbmáid, báhpaid, David mearridii orrut Hearrá goađi luhtte Gibeona oaffarbáikkis. 40Sii galge iđidiid ja eahkediid oaffaruššat Hearrái boaldinoaffariid boaldinoaffaráltára alde, nugo lea čállojuvvon láhkii maid Hearrá lea addán Israelii. 41Ovttas singuin Heman ja Jedutun ja eará namahuvvon lávlut ledje das máidnumin Hearrá: “Su árbmu bistá agálaččat!”
42Heman ja Jedutun aniiga áimmuin maiddái trompehtaid ja symbálaid maid čuojaheaddjit atne, ja vel eará ipmilbálvalusas adnojuvvon čuojanasaid. Jedutuna bártnit ledje uksafáktan.
43Dasto buohkat vulge ruoktot, iešguhtege vissosis, ja maiddái David manai ruktosis buressivdnidit iežas bearraša.
