1. Muitalusaid girji 22

₂David gohčui čoahkkái vierrásiid geat ásse Israelis, ja bijai sin geađgečuollin, laigut ja čuollat geđggiid Ipmila tempela várás. ₃Son hágai maid ollu ruovddi mas duddjojuvvojedje poartauvssaid návllit ja fárffut, ja nu ollu veaikki ahte dat ii lean vihkkemis. ₄Sedermuora son skáhppui mearehis ollu; sidonlaččat ja tyroslaččat doaimmahedje dan sutnje hui eatnat. ₅David oainnat jurddašii: “Mu bárdni Salomo lea nuorra ja hárjánmeahttun, ja viessu mii huksejuvvo Hearrái ferte leat nu goargat ahte dat beaggá buot eatnamiidda. Danin mun ráhkkanahtán dan huksema bárdnán beales.” Nu David ráhkkanahtii huksema hui ollu jápmimis ovdal.

₆David rávkkai lusas bártnis Salomo ja gohčui su hukset tempela Hearrái, Israela Ipmilii. ₇David sártnui bárdnásis Salomoi ná: “Bártnážan, mun livččen ieš dáhtton hukset viesu Hearrá, Ipmilan, nammii. ₈Muhto munnje bođii Hearrá sátni: ‘Don leat golggahan ollu vara ja soahtan stuorra sođiid. Don it oaččo hukset viesu mu nammii, danin go don leat golggahan ollu vara. ₉Muhto dutnje riegáda bárdni gii šaddá ráfi olmmájin. Mun attán sutnje ráfi buot vašálaččain geat leat su birra. Su namman šaddá Salomo, ja su beivviid mun attán Israela leat ráfis ja mášus. ₁₀Son hukse viesu mu nammii, ja son lea mu bárdni, ja mun lean su áhčči. Mun nannen su gonagaslaš truvnnu Israelis agálaš áigái.’ ₁₁Vare Hearrá livččii duinna, bártnážan! Vare dutnje menestuvašii hukset viesu Hearrái, Ipmilasat, nugo son lea cealkán du birra. ₁₂Vare Hearrá attášii dutnje jierpmi ja áddejumi go son bidjá du Israela ráđđejeaddjin, nu ahte don doalat Hearrá, Ipmilat, lága. ₁₃Don anát lihku, jos doalat dárkilit daid lágaid ja báhkkomiid maid Hearrá gohčui Mosesa addit Israelii. Leage roahkkat ja gievra, ale bala alege arvvuhuva! ₁₄Mun lean ollu váivviin háhkan Hearrá vissui čuođiduhát taleantta golli ja miljovdna taleantta silbba, ja dasa lassin nu ollu veaikki ja ruovddi ahte dat ii leat vihkkemis. Muoraid ja geđggiid lean maid háhkan, ja don sáhtát háhkát ieš velá eambbo. ₁₅Dus leat valjis bargit: geađgečuollit, muvrrárat ja snihkkárat ja vel ollu dakkárat geat máhttet duddjot buotlágáš dujiid ₁₆gollis ja silbbas, veaikkis ja ruovddis. Riema bargat! Vare Hearrá livččii duinna!”

₁₇David gohčui buot Israela oaivámuččaid veahkehit bártnis Salomo. Son sártnui sidjiide ná: ₁₈“Hearrá, din Ipmil, lea dinguin. Sonhan lea addán didjiide ráfi juohke guovllus. Son lea addán munnje fámu ráđđet eatnama ovddeš ássiid, ja nu eanan lea šaddan Hearrá ja su álbmoga váldái. ₁₉Ohcet dál Hearrá, Ipmileattet, oppa váimmus ja oppa sielus! Ripmet hukset Hearrá Ipmila bassibáikki, vai beassabehtet buktit Hearrá lihtuárkka ja ipmilbálvalusa bassi lihtiid vissui mii huksejuvvo Hearrá nama várás.”