1. Muitalusaid girji 24

₁Maiddái Arona nálli juohkásii juhkosiidda. Arona bártnit ledje Nadab, Abihu, Elasar ja Itamar. ₂Nadab ja Abihu jámiiga ovdal áhčiska. Go dan guoktás eai lean bártnit, de dušše Elasar ja Itamar bálvaleigga báhppan. ₃David jugii juhkosiidda bálvalusvuoruid várás Arona náli ovttas Elasara soga Sadokiin ja Itamara soga Ahimelekiin. ₄Go gávnnahuvvui ahte Elasara nális ledje eambbo olbmát go Itamara sogas, de dat juhkkojuvvojedje nu ahte Elasara nális bohte guhttanuppelohkái sohkaoaivámučča ja Itamara nálisgis gávcci sohkaoaivámučča. ₅Juohku dahkkojuvvui vuorbádemiin, danin go sihke Elasara ja Itamara nális ledje bassibáikki oaivámuččat ja ipmilbálvalusa jođiheaddjit. ₆Levilaš čálli Šemaja, Netanela bárdni, čálii sin namaid girjái gonagasa, oaivámuččaid, báhppa Sadoka ja Ahimeleka, Ebjatara bártni, oaidnut, ja báhpaid ja levilaččaid sohkaoaivámuččaid oaidnut. Vuorbádemiin válljejuvvui ain vurrolagaid okta sohka Elasara nális ja okta Itamara nális.

₇Vuosttaš vuorbi bođii Jojaribii, nubbi Jedajai, ₈goalmmát Harimii, njealját Seorimii, ₉viđát Malkiai, guđát Mijaminii, ₁₀čihččet Hakkosii, gávccát Abiai, ₁₁ovccát Ješuai, logát Šekanjai, ₁₂oktanuppelogát Eljašibii, guoktenuppelogát Jakimii, ₁₃golbmanuppelogát Huppai, njealljenuppelogát Ješebabii, ₁₄vihttanuppelogát Bilgai, guhttanuppelogát Immerii, ₁₅čiežanuppelogát Hesirii, gávccinuppelogát Happissesii, ₁₆ovccinuppelogát Petahjai, guoktelogát Esekielii, ₁₇guoktelogivuosttaš Jakinii, guokteloginubbi Gamulii, ₁₈guoktelogigoalmmát Delajai ja guokteloginjealját Maasjai. ₁₉Dán ortnegis sii galge guhtege vuorustis mannat dahkat bálvalusa Hearrá tempelii, nugo sin lei gohččon sin áhčči Aron, gii ieš lei ožžon dan gohččuma Hearrás, Israela Ipmilis.

₂₀Eará levilaččat ledje dát: Amrama sogas Šubael, Šubaela sogas Jehdeja, ₂₁Rehabja sogas Jiššia, oaivámuš, ₂₂Jishara sogas Šelomot ja Šelomota sogas Jahat. ₂₃Hebrona bártnit ledje Jeria, oaivámuš, nubbi Amarja, goalmmát Jahasiel ja njealját Jekamam. ₂₄Ussiela bárdni lei Mika, Mika bárdni lei Šamir. ₂₅Mika viellja lei Jiššia, Jiššia bárdni lei Sakarja. ₂₆Merari bártnit ledje Mahli ja Muši, ja maiddái Jaasia lei su bárdni. ₂₇Merari bártni Jaasia bártnit ledje Šoham, Sakkur ja Ibri. ₂₈Mahli bártnit ledje Elasar geas alddis eai lean bártnit, ₂₉ja Kiš. Kiša bárdni lei Jerahmeel, ₃₀Muši bártnit ledje Mahli, Eder ja Jerimot. Dát ledje levilaččat, sogaid mielde logahallojuvvon. ₃₁Vieljaideaset Arona bártniid láhkái siinai – ovddimus sogas heajumussii – vuorbádedje gonagas Davida, Sadoka ja Ahimeleka ja báhpaid ja levilaččaid sohkaoaivámuččaid oaidnut.