1. Johannes 4

₁Ráhkkásiiddán, allet jáhke buot vuoiŋŋaide. Geahččalehket vuoiŋŋaid, guorahallet bohtetgo dat Ipmilis, danne go máilmmis leat ollu vearreprofehtat. ₂Dás dii dovdabehtet Ipmila Vuoiŋŋa: Juohke vuoigŋa mii dovddasta ahte Jesus Kristus lea boahtán olmmožin, lea Ipmilis. ₃Ii oktage vuoigŋa mii ii dovddas Jesusa, leat Ipmilis. Dakkár vuoigŋa lea Antikristusa vuoigŋa man lehpet gullan boahtimin ja mii lea juo máilmmis.

₄Dii, mánážiiddán, lehpet Ipmila olbmot ja lehpet vuoitán vearreprofehtaid, dasgo son gii lea din siste, lea stuorit go dat gii lea máilmmis. ₅Sii leat máilmmi olbmot. Máilmmi ságaid sii sárdnot, ja máilbmi gullá sin. ₆Muhto mii leat Ipmila olbmot. Gii dovdá Ipmila, dat gullá min, muhto gii ii leat Ipmila olmmoš, dat ii min gula. Dies mii dovdat duohtavuođa vuoiŋŋa ja čádjádusa vuoiŋŋa.

₇Ráhkkásiiddán, ráhkistehkot guhtet guimmiideamet, danin go ráhkisvuohta boahtá Ipmilis. Juohkehaš gii ráhkista, lea Ipmilis riegádan ja dovdá Ipmila. ₈Dat gii ii ráhkis, ii dovdda Ipmila, danne go Ipmil lea ráhkisvuohta. ₉Ná Ipmila ráhkisvuohta almmustuvai midjiide: Son vuolggahii áidnoriegádan Bártnis máilbmái vai mii ealášeimmet su bokte. ₁₀Dát lea ráhkisvuohta: Ii dat ahte mii leat ráhkistan Ipmila, muhto ahte son lea ráhkistan min ja vuolggahan Bártnis soabahussan min suttuid ovddas.

₁₁Ráhkkásiiddán, go Ipmil lea ráhkistan min nu, de maiddái mii leat geatnegasat ráhkistit guhtet guimmiideamet. ₁₂Ii oktage leat goassege oaidnán Ipmila. Muhto jos mii ráhkistit guhtet guimmiideamet, de Ipmil bissu min siste, ja su ráhkisvuohta šaddá ollisin min siste. ₁₃Son lea addán midjiide Vuoiŋŋas, ja dan dihte mii diehtit ahte mii bissut su siste ja son min siste. ₁₄Mii leat oaidnán ahte Áhčči lea vuolggahan Bártnis máilmmi beastin, ja dan mii duođaštit. ₁₅Jos soamis dovddasta ahte Jesus lea Ipmila Bárdni, de Ipmil bissu su siste ja son Ipmila siste. ₁₆Mii leat oahppan dovdat dan ráhkisvuođa maid Ipmil atná midjiide, ja oskut dasa.

Ipmil lea ráhkisvuohta. Dat gii bissu ráhkisvuođas, bissu Ipmila siste ja Ipmil su siste. ₁₇Ipmila ráhkisvuohta lea šaddan mis ollisin, go mii sáhttit roahkkadit loaiddastit ovdan duopmobeaivvi; nugo Jesus lea, nu miigis leat dán máilmmis. ₁₈Ballu ii ráhkisvuođas leat, muhto ollis ráhkisvuohta ádjá balu eret. Balus lea juo ráŋggáštus; dat gii ballá, ii leat šaddan ollisin ráhkisvuođas. ₁₉Mii ráhkistit danne go son lea min vuos ráhkistan. ₂₀Jos muhtun dadjá ahte son ráhkista Ipmila muhto vašuha vieljas, son gielista. Dat gii ii ráhkis vieljas gean lea oaidnán, ii sáhte ráhkistit Ipmila gean ii leat oaidnán. ₂₁Dán báhkkoma mii leat sus ožžon: Gii ráhkista Ipmila, dat galgá maiddái ráhkistit vieljas.