1. Gonagasaid girji 14

₁Dan áigge Abia, Jeroboama bárdni, buohccái. ₂Jeroboam dajai áhkkásis: “Gárvot nu ahte ii oktage dovdda du Jeroboama áhkkán, ja vuolgge Šiloi. Doppe ássá profehta Ahia gii einnostii mu šaddat dán álbmoga gonagassan. ₃Váldde mielde logi láibbi, muhtun gáhkuid ja honnetruhku ja mana su lusa, de son muitala dutnje mo bárdnái geavvá.” ₄Jeroboama áhkká dagai nu. Son vulggii Šiloi ja bođii Ahia vissui. Ahia ii šat oaidnán maidege, danin go son lei čalmmehuvvan boarisvuođa geažil. ₅Muhto Hearrá lei cealkán Ahiai: “Jeroboama áhkká lea boahtimin deike jearrat dus ráđi iežas bártni birra, danin go bárdni lea buozus. Sártno sutnje sániid maid mun attán dutnje. Son lea gárvodan dovdameahttumin.” ₆Go Ahia gulai nissona vázzinskoabanasa, de son dajai: “Boađe sisa, Jeroboama áhkká! Manne don dahkaluttat eará olmmožin? Mus lea almmuhit dutnje garra sátni. ₇Mana dadjat Jeroboamii: Ná cealká Hearrá, Israela Ipmil: Mun alidin du álbmoga gaskkas ja bidjen du álbmogan Israela ráđđejeaddjin. ₈Mun gaikkihin gonagasvuođa Davida sogas ja adden dan dutnje. Muhto don it leat leamaš nugo mu bálvaleaddji David. Son doalai mu báhkkomiid ja vádjolii muinna oppa váimmustis. Son dagai dušše dan mii lei riekta mu čalmmiin. ₉Don leat dahkan eambbo bahá go oktage eará ovdal du. Don leat ráhkadahttán alccesat leikejuvvon govaid ipmilin ja nu moaráhuhttán mu, ja don leat jorgalan munnje selggiid. ₁₀Dan dihte mun buvttán Jeroboama sohkii lihkuhisvuođa. Mun duššadan Israelis buot du soga olbmábeale, sihke stuorráid ja smávváid, ja mun suohpalasttán eret Jeroboama soga nugo muhkki suohpalastojuvvo visot eret. ₁₁Dan Jeroboama sogas gii jápmá gávpogii, borret beatnagat, ja dan gii jápmá meahccái, borret almmi lottit. Ná Hearrá lea sárdnon. ₁₂Vuolgge dál ruktosat. Dan seammás go boađát gávpogii, de bárdni jápmá. ₁₃Oppa Israel doallá sutnje váidalusaid ja mieđušta su hávdái. Dušše son Jeroboama sogas boahtá hávdái, danin go aivvestassii sus oppa Jeroboama sogas Hearrá, Israela Ipmil, lea oaidnán juogage buori. ₁₄Muhto Hearrá čuoččáldahttá Israelii gonagasa gii duššada Jeroboama soga. Dat beaivi boahtá. ₁₅Hearrá časká Israela nu ahte dat suoibu nugo hoašša čázis. Son gaikkiha israellaččaid dan buori eatnamis maid son attii sin áhčiide. Son biđge sin don beallái Eufrata, danin go sii leat dahkan alcceseaset ašeračuolddaid ja moaráhuhttán Hearrá. ₁₆Son hilgu Israela Jeroboama suttuid dihte ja daid suttuid dihte maid son lea fillen Israela dahkat.”

₁₇Jeroboama áhkká vulggii ja máhcai Tirsai. Dan seammás go son lávkii iežas viesu šielmmá ala, de bárdni jámii. ₁₈Son hávdáduvvui, ja oppa Israel moraštii su. Nu šattai duohtan dat maid Hearrá lei gohččon bálvaleaddjis profehta Ahia sárdnut.

₁₉Mii muđui lea muitalit Jeroboamis, su sođiin ja su stivrejumis, lea čállojuvvon Israela gonagasaid muitalusaid girjái. ₂₀Jeroboam lei gonagassan guoktelogiguokte jagi. De son manai vuoiŋŋadit áhčiidis lusa, ja su maŋŋil gonagassan šattai su bárdni Nadab.

₂₁Rehabeam, Salomo bárdni, lei gonagassan Judas. Son lei njealljelogiovttajahkásaš go šattai gonagassan. Son ráđđii čiežanuppelohkái jagi Jerusalemis, dan gávpogis maid Hearrá lei válljen buot Israela čearddain iežas nama ássanbáikin. Su eadni lei ammonlaš Naama. ₂₂Juda olbmot dahke dan mii lea bahá Hearrá čalmmiin. Suttuideasetguin sii moaráhuhtte Hearrá velá eambbo go sin áhčit. ₂₃Sii huksejedje alcceseaset oaffarbáikkiid ja ceggejedje geađgebácciid ja ašeračuolddaid juohke alla dievvái ja juohke rudnes muora vuollái. ₂₄Eatnamis ledje maiddái tempelfuorát. Juda álbmot dagai seammá fastivuođaid go álbmogat maid Hearrá lei jávkadan israellaččaid ovddas.

₂₅Rehabeama viđát ráđđenjagi Šišak, Egypta gonagas, fallehii Jerusalema. ₂₆Son válddii buot divrras dávviriid Hearrá viesus ja gonagasa viesus. Son válddii visot, maiddái buot gollegalbbaid maid Salomo lei duddjohan. ₂₇Daid sadjái gonagas Rehabeam duddjohii bronsagalbbaid; daid son oskkildii heaggafávttaid oaivámuččaide geat fáktejedje gonagasa šloahta uvssa. ₂₈Juohke háve go gonagas manai Hearrá vissui, de heaggafávttat gudde galbbaid ja dolvo daid fas heaggafávttaid latnjii.

₂₉Mii muđui lea muitalit Rehabeamis su daguin, lea čállojuvvon Juda gonagasaid muitalusaid girjái. ₃₀Rehabeama ja Jeroboama gaskkas lei soahti geažos áigge. ₃₁Rehabeam manai vuoiŋŋadit áhčiidis lusa ja hávdáduvvui sin báldii Davida gávpogii. Su eadni lei ammonlaš Naama. Rehabeama maŋŋil gonagassan šattai su bárdni Abiam.