1. Gonagasaid girji 17

₁Elia, Gileada Tišbe olmmoš, dajai Ahabii: “Nu duohta go Hearrá, Israela Ipmil, eallá, son gean mun bálvalan: Dáid jagiid ii šatta suoldni iige arvve muđui go jos mun gohčun.” ₂Eliai bođii dasto dát Hearrá sátni: ₃“Vuolgge dáppe, mana nuorttas guvlui ja čiehkát Keritávžái Jordana nuorttabeallái. ₄Doppe don beasat juhkat jogažis, ja mun lean gohččon gáranasaid buktit dutnje borramuša.” ₅Elia dagai nugo Hearrá lei gohččon. Son manai Keritávžái Jordana nuorttabeallái ja orrui dohko. ₆Gáranasat bukte sutnje láibbi ja bierggu iđidiid eahkediid, ja son jugai jogažis.

₇Muhtun áiggi geažes jogaš goikkai, danin go oppa eatnamis ii lean arván. ₈Eliai bođii dalle dát Hearrá sátni: ₉“Mana Sareptai, mii lea Sidona lahka, ja orro dohko. Mun lean gohččon muhtun leaskanissona ealihit du doppe.”

₁₀Elia vulggii Sareptai. Go son bođii gávpotportii, de das lei muhtun leaskanisson čoaggimin muoraid. Elia čuorvvui sutnje: “Viežžal munnje veaháš čázi, vai beasan juhkat.” ₁₁Go nisson vulggii viežžat čázi, de Elia čuorvvui sutnje velá: “Buktil munnje maid láibebihtá.” ₁₂Muhto nisson vástidii: “Nu duohta go Hearrá, du Ipmil, eallá: Mus ii leat láibi, mus leat dušše čorpmadievva jáffut ruhkus ja uhcánaš olju lihtis. Mun lean čoaggimin dás muorrabihtáid, ja de mun manan ruoktot ráhkadit borramuša alccesan ja bárdnásan. De moai borre dan ja dasto jápme.” ₁₃Elia dajai sutnje: “Ale bala! Mana ruoktot ja daga nugo leat dadjan, muhto ráhkat vuos munnje uhca gáhkoža ja buvtte dan deike. Ráhkat dasto juoidá alccesat ja bárdnásat. ₁₄Ná cealká Hearrá, Israela Ipmil: Jáfforuhkku ii guorran iige lihtis váillo olju gitta dan beaivvi rádjái go Hearrá diktá arvit eatnamii.” ₁₅Leaskanisson manai ja dagai nugo Elia lei dadjan, ja sis buohkain lei borramuš guhkes áigái. ₁₆Jáfforuhkku ii guorranan iige lihtis váilon olju. Geavai nu mo Hearrá lei sárdnon Elia bokte.

₁₇Muhtun áiggi geažes buohccái nissona, viesu eamida, bárdni. Dávda šattai nu garasin ahte bárdni ii viimmat oppa vuoigŋange. ₁₈Leaskanisson dajai Eliai: “Mii mus lea dahkamuššan duinna, Ipmila olmmái? Don leat boahtán deike muittuhit munnje mu suttu ja goddit mu bártni.” ₁₉Elia dajai: “Atte bártnát munnje!” Son válddii bártni leaskka askkis, guttii su bajit latnjii gos ieš orui, ja vellehii su seaŋgasis. ₂₀Son rohkadalai Hearrá ja dajai: “Hearrá, mu Ipmil! Áiggutgo don duođaid buktit lihkohisvuođa dán leskii gean luhtte mun orun, ja goddit su bártni?” ₂₁Son gopmulii golbmii bártni badjel ja rohkadalai: “Hearrá, mu Ipmil! Divtte heakka máhccat dán bártnážii!” ₂₂Hearrá gulai Elia rohkadusa. Heagga máhcai bártnážii, ja son šattai eallin. ₂₃Elia válddii bártnáža ja buvttii su bajit lanjas vissui. Son attii su su eadnái ja dajai: “Geahča, du bárdni eallá!” ₂₄Dalle nisson dajai Eliai: “Dál mun dieđán ahte don leat Ipmila olmmái, ja ahte Hearrá duođaid sárdnu du bokte.”