1. Samuelgirji 11

₁Mánu geažes ammonlaš Nahaš fallehii Jabeša Gileadis ja birastahtii gávpoga. Jabeša olbmot dadje sutnje: “Daga minguin lihtu, de mii bálvalit du.” ₂Ammonlaš Nahaš vástidii sidjiide: “Mun dagan dinguin lihtu dainna eavttuin ahte beasan čugget dis buohkain olgeš čalmmi, ja nu hiddjidit oppa Israela.” ₃Jabeša vuorrasat dadje sutnje: “Atte midjiide čieža beaivvi, vai mii sáhttit bidjat sáni miehtá Israela. Jos ii oktage boađe veahkehit min, de mii vuollánit dutnje.” ₄Go áirasat bohte Saula Gibeai ja muitaledje mii lei dáhpáhuvvan, de buohkat čirrojedje. ₅Saul lei aiddo dalle boahtimin bealddus vuovssáidisguin. Son jearai: “Mii álbmogis heahtin, manne buohkat čirrot?” Sii muitaledje sutnje maid Jabeša olbmot ledje dadjan. ₆Go Saul gulai dan, de Ipmila vuoigŋa bođii su badjelii, ja su moarri cahkiidii. ₇Son čuohpadii vuoksápára bihttán, bijai áirasiid doalvut bihtáid miehtá Israela ja cealkkihii: “Ná dahkkojuvvo dan vuovssáide gii ii vuolgge soahtat ovttas Sauliin ja Samueliin.” Dalle álbmot dohppehalai Hearrá ballui, ja sii vulge oktan olmmájin. ₈Go Saul geahčadii sin Besekis, de israellaččat ledje golbmačuođiduháha ja Juda olbmát golbmalogiduháha. ₉Son dajai áirasiidda: “Celket Jabeša olbmuide Gileadis: Ihttin go beaivváš goardá báhkkasepmosit, de dii gáddjojuvvobehtet.” Go áirasat máhcce Jabešii ja muitaledje dan, de olbmot illosedje. ₁₀Muhto ammonlaččaide Jabeša olbmot dadje: “Ihttin mii vuollánit didjiide. Dalle dii beassabehtet dahkat midjiide maid dáhttubehtet.”

₁₁Maŋit beaivvi Saul jugii álbmoga golmma soahtejovkui, ja iđitgohcinvuorus sii bahkkejedje ammonlaččaid soahtesiidii. Go beaivi lei báhkkaseamos, de ammonlaččat ledje časkojuvvon. Dat geat báhce heggii, biđgejuvvojedje oalát, ja sii hádjánedje gii ain gosage.

₁₂Dalle álbmot dajai Samuelii: “Geat ledje dat geat eai dáhtton Saula min gonagassan? Buktet sin deike, de mii goddit sin.” ₁₃Muhto Saul dajai: “Odne ii goddojuvvo oktage, danne go odne Hearrá lea gádjon Israela.” ₁₄Ja Samuel dajai álbmogii: “Vulgot Gilgalii ođasmahttit gonagasvuođa.” ₁₅De oppa álbmot vulggii Gilgalii, ja doppe sii dahke Saula gonagassan Hearrá muođuid ovddas. Sii oaffarušše doppe maiddái searvevuođaoaffariid Hearrái, ja Saul ja buot israellaččat dolle stuorra ávvudeami.