1. Samuelgirji 15

₁Samuel dajai Saulii: “Hearrá vuolggahii mu vuoidat du iežas álbmoga Israela gonagassan. Gula dál Hearrá sáni! ₂Ná cealká Hearrá, Almmiveagaid Ipmil: Mun ráŋggáštan amaleklaččaid, danin go sii fallehedje israellaččaid dalle go sii ledje boahtimin Egyptas. ₃Mana ja časkke dál amaleklaččaid ja vihat sin duššadeapmái oktan buot dainna mii gullá sidjiide. Ale seastte ovttage, muhto gotte buohkaid, olbmáid ja nissoniid, mánáid ja njammimánáid, vuovssáid ja sávzzaid, kamelaid ja áseniid.” ₄Dalle Saul gohčui álbmoga čoahkkái, ja son geahčadii dan Telaimis. Das ledje guoktečuođiduhát soahteolbmá ja sin lassin logiduhát olbmá Judas.

₅Go Saul bođii amaleklaččaid gávpoga lahkosiidda, de son manai beitosii johkaroggái. ₆Son cealkkihii kenlaččaide: “Vulget, gáidet amaleklaččain, vai mun in duššat din oktanaga singuin. Diihan leiddet ustitlaččat israellaččaide go sii ledje boahtimin Egyptas.” Dalle kenlaččat gáide amaleklaččain. ₇Saul časkkii amaleklaččaid ja doarridii sin Havila rájes gitta Šura rádjái mii lea Egypta nuortalis. ₈Amaleklaččaid gonagas Agag dohppejuvvui eallinaga, muhto buot earát vihahuvvojedje duššadeapmái ja goddojuvvojedje mihkiin. ₉Saul ja su olbmát seste Agaga ja buoremus smávvaomiid ja stuorraomiid, buoiddes vuovssáid ja lábbáid ja buot mii lei mange veara. Sii eai dáhtton vihahit daid duššadeapmái, muhto vihahedje gal duššadeapmái buot mii lei heittot ja árvvuheapme.

₁₀Samuelii bođii dát Hearrá sátni: ₁₁“Mun gáđan ahte dahken Saula gonagassan. Son lea jorgalan mus eret iige leat ollašuhttán mu gohččuma.” Samuel gáfestuvai, ja son čuorvvui Hearrá geažos ija. ₁₂Árrat iđedis Samuel vulggii deaivvadit Sauliin, muhto sutnje muitaluvvui ahte Saul lei mannan Karmelii cegget alccesis vuoitobácci. Doppe son lei joatkán Gilgalii.

₁₃Go Samuel bođii Saula lusa, de Saul dajai sutnje: “Hearrá buressivdnidehkos du! Mun lean dahkan maid Hearrá gohčui.” ₁₄Samuel jearai: “Mii dalle lea dát meahkun ja muhkun maid mun gulan?” ₁₅Saul vástidii: “Dat leat amaleklaččaid oamit mat leat buktojuvvon deike. Olbmát seste buoremus smávvaomiid ja stuorraomiid vai besset oaffaruššat daid Hearrái, du Ipmilii. Visot eará mii leat vihahan duššadeapmái.” ₁₆Samuel gaskkalduhtii su: “Mun muitalan dutnje maid Hearrá sártnui munnje mannan ija.” Saul dajai: “Muital!” ₁₇Samuel dajai: “Vaikko don ledjet headju iežat čalmmiin, de Hearrá vuoiddai du Israela gonagassan, ja don leat Israela čearddaid oaivámuš. ₁₈Hearrá vuolggahii du vihahit amaleklaččaid duššadeapmái ja soahtat daid suttolaččaiguin, dassážii go leat loahpahan sin. ₁₉Manin don it dalle jeagadan Hearrá sáni, muhto ripmet sállašii ja dahket dan mii lea bahá Hearrá čalmmiin?” ₂₀Saul vástidii: “Munhan jeagadin Hearrá ja mannen, gosa Hearrá vuolggahii mu. Mun bukten deike Agaga, amaleklaččaid gonagasa, muhto eará amaleklaččaid mun vihahin duššadeapmái. ₂₁Olbmát válde sállašis smávvaomiid ja stuorraomiid, buoremusaid dain mat galge vihahuvvot duššadeapmái, vai besset oaffaruššat daid Gilgalis Hearrái, du Ipmilii.”

₂₂Dalle Samuel celkkii:

₂₄Dalle Saul dajai Samuelii: “Mun lean suddudan. Mun lean rihkkon Hearrá gohččuma ja du sáni vuostá, danne go mun ballen álbmogis ja dahken nugo sii dáhtto. ₂₅Atte dál munnje ándagassii mu suttu ja máhca muinna, vai mun beasan luoitádit Hearrá ovdii.” ₂₆Muhto Samuel vástidii: “Mun in máhca duinna. Don leat hilgon Hearrá sáni, ja Hearrá lea hilgon du: Don it šat oaččo leat Israela gonagas.” ₂₇Go Samuel jorggihii vuolgit, de Saul dohppii su oalgebiktasii nu ahte dat gaikánii. ₂₈Samuel dajai: “Odne Hearrá lea gaikkihan dus Israela gonagasvuođa ja addán dan nubbái, buorebui go don. ₂₉Son gii lea Israela gudni, ii gielis iige gáđa, danin go son ii leat olmmoš, nu ahte son gáđašii.” ₃₀Saul dajai: “Mun lean suddudan. Muhto čájet munnje dattetge dan gudni mu álbmoga vuorrasiid ja Israela ovddas ahte máhcat muinna, vai mun beasan luoitádit Hearrá, du Ipmila, ovdii.” ₃₁Nu Samuel máhcai Sauliin, ja Saul luoitádii rohkadallat Hearrá.

₃₂Samuel gohčui buktit lusas Agaga, amaleklaččaid gonagasa. Agag bođii doarggistemiin su lusa ja dajai: “Man bahča lea jápmit!” ₃₃Samuel dajai: “Nugo du miehkki lea dahkan nissoniid mánáheapmin, nu du eadnige šaddá mánáheapmin sin láhkái.” De Samuel časkkii Agaga jámas Hearrá muođuid ovddas Gilgalis.

₃₄Dasto Samuel vulggii Ramai, ja Saul máhcai ruktosis Saula Gibeai. ₃₅Iige Samuel šat oaidnán Saula nu guhká go elii. Hearrá gáđai ahte lei dahkan Saula Israela gonagassan, ja Samuel moraštii Saula dego jábmi moraštuvvo.