2. Muitalusaid girji 23

₁Čihččet jagi Jojada roahkasmuvai dahkat lihtu muhtun čuohtásaoaivámuččaiguin. Sii ledje Asarja, Jerohama bárdni, Ismael, Johanana bárdni, Asarja, Obeda bárdni, Maaseja, Adaja bárdni, ja Elišafat, Sikri bárdni. ₂Sii johte miehtá Juda ja čohkkejedje levilaččaid buot Juda gávpogiin ja vel Israela sogaid oaivámuččaid. Go sii ledje boahtán Jerusalemii, ₃de oppa čoagganeapmi dagai Ipmila tempelis lihtu gonagasain. Jojada dajai sidjiide: “Dá lea gonagasa bárdni! Son galgá biddjojuvvot gonagassan, Hearráhan lea lohpidan bisuhit gonagasvuođa Davida sogas. ₄Dahket ná: Goalmmátoassi báhpain ja levilaččain geat leat sabbahin bálvalanvuorus, fáktegohtet šielmmáid, ₅goalmmátoassi fákte gonagasa šloahta ja goalmmátoassigis Jesodpoartta. Eará olbmot galget leat Hearrá tempela ovdašiljuin. ₆Ii oktage oaččo mannat Hearrá tempelii earret báhpaid ja levilaččaid, geat leat bálvalanvuorus. Sii ožžot mannat sisa, danne go sii leat basuhan iežaset, muhto eará olbmot galget doahttalit Hearrá gildosa. ₇Levilaččat galget čuoččastit gonagasa birra, iešguhtege vearju gieđas. Juohkehaš gii bođeš tempelii, galgá goddojuvvot. Levilaččat galget leat gonagasa luhtte, gosa son ain manná.”

₈Levilaččat ja oppa Juda álbmot dahke nugo báhppa Jojada lei gohččon. Juohke oaivámuš čohkkii olbmáidis, sihke daid geat sabbahin álggahedje fáktavuoru ja daid geat loahpahedje fáktavuoru, danne go báhppa Jojada ii luoitán daid juhkosiid vuolgit. ₉Báhppa Jojada attii čuohtásaoaivámuččaide sáittiid, galbbaid ja njuollaskuohpuid mat ledje gullan gonagas Davidii ja ledje dál tempelis. ₁₀Son bijai buot olbmáid, iešguđege vearju gieđas, čuožžut gonagasa suodjin ráiddus mii manai tempela lulleseainnis áltára guora gitta tempela davveseainni rádjái. ₁₁De gonagasa bárdni buktojuvvui ovdan, su oaivái biddjojuvvui kruvdnu ja sutnje addojuvvojedje gonagasvuođa mearkkat. Jojada ja su bártnit vuide su gonagassan, ja oppa álbmot čuorvvui: “Ellos gonagas!”

₁₂Go Atalja gulai álbmoga viehkamin ja čuorvumin rámádusa gonagassii, de son vulggii Hearrá tempelii álbmoga lusa. ₁₃Doppe son oinnii gonagasa čuožžumin stoalppu luhtte uvssa guoras ja oaivámuččaid ja dorvebossuid su birra. Oppa álbmot ávvudii, dorvvet čudje ja lávlut jođihedje čuojanasaideasetguin máidnunlávluma. Dalle Atalja gaikkodii biktasiiddis ja čurvii: “Beahtus, beahtus!” ₁₄Báhppa Jojada gohčui čuohtásaoaivámuččaid: “Dolvot su olggos ráidduid gaskka ja goddet juohkehačča gii vikkaš čuovvut su.” Son lei oainnat gieldán goddimis Atalja Hearrá tempelii. ₁₅Soahteolbmát dohppejedje Atalja, dolvo su Heastapoartta ráigge gonagasa šlohttii ja godde su dohko.

₁₆Jojada, álbmot ja gonagas dahke lihtu ja čatnasedje leat álo Hearrá álbmot. ₁₇Dasto oppa olmmošjoavku manai Baala tempelii ja gaikkodii dan. Sii cuvko moallun áltáriid ja ipmilgovaid ja godde Baala báhpa Mattana áltáriid ovdii. ₁₈Jojada bijai báhpaid ja levilaččaid Hearrá tempelii doaimmahit daid bargguid maid David lei mearridan sidjiide. Sii galge oaffaruššat tempelis boaldinoaffariid Hearrái, nugo lea mearriduvvon Mosesa lágas, ja dahkat dan illudemiin ja lávlumiin Davida rávvagiid mielde. ₁₉Jojada bijai fávttaid Hearrá tempela poarttaide, vai ii oktage gii muhtin siva geažil lei šaddan buhtismeahttumin, beasašii boahtit sisa. ₂₀De Jojada rávkkai mielddis čuohtásaoaivámuččaid, hearráid, álbmoga ráđđejeddjiid ja oppa álbmoga ja doalvvui gonagasa Hearrá viesus Bajit poartta bokte gonagasa vissui. Doppe sii čohkánahtte gonagasa riikka truvdnui. ₂₁Álbmot ávvudii, ja gávpogis lei ráfi.

Atalja sii godde mihkiin.