2. Peter 2

₁Israela álbmoga gaskkas ledje maiddái vearreprofehtat, ja seammá láhkái din gaskiige bohtet vearreoahpaheaddjit. Sii njágahit din gaskii duššadeaddji vearreoahpaid. Sii biehttalit dan Hearrá guhte lea sin lonistan, ja fargga sii dagahit alcceseaset heavu. ₂Olusat čuovvulit sin nuoskivuođa, ja duohtavuođa geaidnu šaddá sin dihte bilkiduvvot. ₃Vuovdáivuođasteaset sii vigget atnit din ávkin hutkkálaš cukcasiiguin. Muhto sin dološ duopmu lea ain fámus, sin heavvu lea sin vuordimin.

₄Ipmil ii seastán eŋgeliid geat ledje suddudan, muhto bálkestii sin láhkkiin sevdnjes čiekŋalassii vuordit ahte sin duopmu ollašuvvá. ₅Iige son seastán dološ máilmmi, muhto buvttii stuorra dulvvi ipmilmeahttun olbmuid badjelii. Son goittot várjalii Noa, vanhurskkisvuođa sárdnideaddji, ja čieža earrása. ₆Ipmil dubmii Sodoma ja Gomorra nu ahte bolddii daid gutnan ja dagai daid ovdamearkan maŋit áiggiid ipmilmeahttumiidda, ₇muhto gájui vanhurskkis Lota gean ipmilmeahttun olbmuid nuoskkes eallin váivvidii. ₈Beaivvis beaivái dat vanhurskkis olmmái giksašuvai go šattai eallit sin gaskkas ja geahčadit ja guldalit sin gudnehis meanu.

₉Hearrá diehtá gal gádjut geahččalusas daid geat sus ballet, muhto ipmilmeahttumiid son atná vuorkkás duopmobeaivvi ráŋggáštusa várás, ₁₀eandalii daid geat doahttalit oačči nuoskkes anistumiid ja atnet duššin Hearrá ráđđenválddi. Sii leat čeavlát ja iešráđálaččat, eai bala bilkideames almmálaš fámuid, ₁₁vaikko velá eŋgelatge geain lea eambbo fápmu ja givrodat, eai Hearrá ovddas daid hiddjit eaige dubme. ₁₂Dát olbmot leat dego jierpmehis eallit mat leat riegádan bivdojuvvot ja goddojuvvot. Sii bilkidit dan maid eai dovdda, ja elliid láhkái sii maid duššet ₁₃ja ožžot vearrivuođasteaset vearrivuođa bálkká. Sin illun lea festet guovdelaš beaivvi, sii leat movttegat beahttit ja guossohit himuideaset go leat doallamin dinguin mállásiid. ₁₄Himolaš čalmmiiguin sii gehččet nissoniidda eaige goassege gallán suddudemiin. Sii fillejit rašis sieluid ja leat bures hárjánan vuovdáivuhtii. Sii leat garuhuvvon olbmot ₁₅geat leat spiehkastan njulges geainnus ja čádjidan seammá geidnui go Bileam, Beora bárdni, gii ráhkistii vearrivuođa bálkká, ₁₆muhto gii cuiggoduvvui rihkkumis dihte: Ásen, gielahis bargošibit, sártnui olbmo jienain ja eastadii profehta jierpmehisvuođa.

₁₇Dát olbmot leat dego čázehis ádjagat, dego balvvat maid riđđu dolvvoda: Čáhppadeamos seavdnjadas sin vuordá. ₁₈Sii sárdnot stuorra muhto guoros sániid, ja rupmašeaset himuid fáŋgan sii vigget giktalit lusaset olbmuid geat ledje juo beasadeamen dain geat vádjolit čádjádusas. ₁₉Sii lohpidit friddjavuođa, muhto ieža sii leat heavahusa šlávat: Gii olbmo lea vuoitán, dan šlávva son lea. ₂₀Jos sii leat beassan máilmmi nuoskivuođain dalle go ohppe dovdat Hearrámet ja Beastámet Jesus Kristusa, muhto fas diktet iežaset daidda sorrojuvvot ja vuoittáhallat, de sin maŋit dilli lea šaddan bahábun go sin ovddit dilli. ₂₁Sidjiide livččii leamaš buoret go sii eai livčče oppa dovdange vanhurskkisvuođa geainnu, go ahte vuos dan dovde ja de jorgaledje sealggi bassi báhkkomii maid ledje váldán vuostá. ₂₂Sidjiide lea geavvan dego sátnevájas dadjá: Beana jorggiha iežas vuovssanasaide, ja “Bassojuvvon spiidni fierada rábáhis”.