2. Timoteus 3

₁Don fertet diehtit ahte maŋimuš beivviid bohtet váttis áiggit. ₂Dalle olbmot ráhkistit dušše iežaset ja ruđa, leat rábmát ja čeavlát, sii hiddjidit ja leat jeagoheamit vánhemiiddáseaset. Sii leat giitemeahttumat, ipmilmeahttumat, ₃ráhkismeahttumat ja soahpameahttumat, bahádallit, veahkaválddálaččat, goavit, buori vašuheaddjit, ₄behtolaččat, skuniheamit ja goarggastallit. Sii ráhkistit návddašemiid eambbo go Ipmila. ₅Sis lea gal ipmilbalolašvuođa hápmi, muhto sii biehttalit oskku fámu. Jorgal eret dakkár olbmuin! ₆Sii njáhket ruovttuide ja fillejit nissoniid geaid suttut losidahttet ja máŋggalágan anistumit dolvvodit, ₇ja geat álo leat miehtásat ođđa oahpaide, muhto eai goassege dovddiit duohtavuođa. ₈Nugo Jannes ja Jambres nággiiga Mosesa vuostá, nu dát olbmotge nággejit duohtavuođa vuostá. Sin árvvoštallannákca lea billašuvvan, sin osku ii gierdda geahččalusa. ₉Muhto dat ii menestuva sidjiide, dasgo sin jierpmehisvuohta šaddá buohkaide almmusin, nugo maiddái doid mielahisvuohta šattai.

₁₀Muhto don leat čuvvon mu oahpahusa, mu vádjolusa, mu viggamuša, mu oskku, mu guhkesmielalašvuođa, mu ráhkisvuođa ja mu gierdavašvuođa ₁₁dain doarrádallojumiin ja gillámušain maid mun vásihin Antiokias, Ikonionis ja Lystras. Makkár doarrádallojumiid mun lean gierdan! Ja buot dain Hearrá lea mu gádjon. ₁₂Muhto buohkat geat dáhttot eallit vuoigatlaččat Kristus Jesusis, šaddet doarrádallojuvvot. ₁₃Bahás olbmot ja beahttit ovdánit bahábussii, sii fillejit ja fillehallet. ₁₄Muhto biso don das maid leat oahppan. Donhan leat das vissis. Muitte geat du oahpaheaddjit leat leamaš, ₁₅ja don leat juo mánnávuođa rájes dovdan bassi čállagiid. Dat máhttet addit dutnje viisodaga, nu ahte don bestojuvvot oskku bokte Kristus Jesusii. ₁₆Juohke čála maid Ipmila Vuoigŋa lea duddjon, lea ávkkálaš oahpahussan, cuiggodussan, neavvan ja bagadussan eallimii mii dohkke Ipmilii. ₁₇Dalle Ipmila olmmoš šaddá ollisin ja dohkálažžan buot buriid daguide.