Lohpádus Bassi Vuoiŋŋa birra
1Buorre Teofilos, vuosttaš girjjistan mun čállen buot dan birra maid Jesus dagai ja oahpahii álggu rájes 2gitta dan beaivvi rádjai go váldojuvvui bajás albmái, das maŋŋil go son Bassi Vuoiŋŋa bokte lei addán gohččumiiddis apostaliidda geaid lei válljen. 3Son čájehii iežas sidjiide gillámušas ja jápmimis maŋŋil ja attii sidjiide máŋga čielga duođaštusa das ahte son lea eallimin, go son almmustuvai sidjiide njealljelogi beaivvi ja sártnui Ipmila riikka birra. 4Go son lei boradeamen singuin, de son gohčui sin: “Allet vuolgge Jerusalemis, muhto vurdet dan maid Áhčči lea lohpidan didjiide ja maid lehpet mus gullan. 5Johannes gásttašii čáziin, muhto dii gásttašuvvobehtet Bassi Vuoiŋŋain. Dasa eai leat šat galle beaivvi.”
Jesus váldojuvvo albmái
6Dalle dat geat ledje čoahkis, jerre sus: “Hearrá, leago dál boahtán dat áigi go don ráhkadat ođđasis Israela riikka?” 7Son vástidii: “Ii leat din ášši diehtit áiggiid iige bottuid maid Áhčči iežas válddiin lea mearridan. 8Muhto dii oažžubehtet fámu go Bassi Vuoigŋa boahtá didjiide, ja dii lehpet mu duođašteaddjit Jerusalemis, oppa Judeas ja Samarias ja gitta eatnama ravddaid rádjái.”
9Go son lei cealkán dán, de son váldojuvvui bajás sin oaidnut, ja balva jávkadii su sin oidnosis. 10Go sii ledje geahččamin almmi guvlui ja oidne su mannamin, de fáhkka čužžo guokte olbmá sin luhtte vilges biktasat badjelis. 11Soai dajaiga: “Galilealaččat, manne dii čuožžubehtet ja geahččabehtet almmi guvlui? Dát Jesus guhte váldojuvvui bajás albmái din luhtte, boahtá oktii ruoktot, seamma láhkái go dii oinniidet su mannamin albmái.”
12Dalle sii vulge dan váris mii gohčoduvvo Oljovárrin ja mii lea lahka Jerusalema, dušše sabbatmátkki eret. 13Sii máhcce Jerusalemii ja manne dan vissui man loktalanjas sii lávejedje čoahkkanit: Peter, Johannes, Jakob, Andreas, Filip, Tomas, Bartolomeus, Matteus, Jakob, Alfeusa bárdni, selota Simon ja Judas, Jakoba bárdni. 14Sii buohkat bisso ovttamielalaččat rohkadusas ovttas nissoniiguin ja Jesusa etniin Mariain ja su vieljaiguin.
Ođđa apostal válljejuvvo
15Muhtun beaivvi go lahka čuođiguoktelogi máhttájeaddji ledje čoahkis, de Peter čuožžilii sárdnut. Son celkkii: 16“Vieljat, dat čállaga sánit fertejedje ollašuvvat maid Bassi Vuoigŋa divttii Davida sárdnut Judasa birra, su gii lei oahpisteaddjin sidjiide geat dohppejedje Jesusa. 17Son gulai min searvái ja lei ožžon seammá bálvalandoaimma go mii. 18Vearredagus bálkkáin son osttii alccesis bealddu, muhto gahčai de vulos nu ahte su čoavji luoddanii ja siskilušat golge olggos. 19Dát šattai buot Jerusalema ássiid dihtosii, ja nu dan beldui biddjojuvvui namman sin gillii Hakeldama, Varrabealdu. 20 Sálmmaid girjái lea čállojuvvon: Šaddos su dállu ávdimin, allos oktage das ásso, ja: Váldos nubbi su bálvalandoaimma.
21Danne dál galgá válljet ovtta dain olbmáin geat leat vádjolan minguin oppa dan áiggi go Hearrá Jesus elii ja barggai min gaskkas, 22dan rájes go Johannes gásttašii su gitta dan beaivvi rádjái go son váldojuvvui min luhtte albmái. Danne okta dáin olbmáin ferte duođaštit minguin ovttas ahte son lea bajásčuožžilan.”
23Sii divvo ovdan guokte olbmá: Josef Barsabbasa gean liigenamma lei Justus, ja Mattiasa. 24Dasto buohkat rohkadalle: “Hearrá, don guhte dovddat buohkaid váimmu, čájet midjiide goappá dán guoktásis don leat válljen 25váldit vuostá dan apostalbálvalusa maid Judas guđii go manai dohko gosa gulai.” 26Sii vuorbádedje dán guoktása gaskka, ja vuorbi gahčai Mattiasii. Son válljejuvvui ja lohkkojuvvui sin searvái guoktenuppelogát apostalin.
