Jerusalema čoahkkin
1Judeas bohte Antiokia searvegoddái muhtumat geat oahpahedje: “Jos dii ehpet divtte birračuohppat iežadet Mosesa lága mielde, de dii ehpet sáhte bestojuvvot.” 2Paulus ja Barnabas vuosttildišgođiiga sin, iige das boahtán uhca nákkoš. De šiehtaduvvui ahte Paulus ja Barnabas ja soames earát galge vuolgit Jerusalemii apostaliid ja vuorrasiid ságaide, vai dán gažaldahkii boahtá čielggasvuohta. 3Searvegoddi ráhkkanahtii sin mátkái, ja sii johte Foinikia ja Samaria čađa ja muitaledje ahte báhkinat ledje jorgalan. Buot vieljat illosedje sakka go dan gulle.
4Go sii bohte Jerusalemii, de searvegoddi, apostalat ja vuorrasat válde sin vuostá, ja sii muitaledje buot daid stuorra daguid maid Ipmil lei dahkan sin bokte. 5Dalle muhtun farisealaččat geat ledje oskon, čuožžiledje ja dadje: “Báhkiniid geat leat jorgalan, galgá birračuohppat ja geatnegahttit doallat Mosesa lága.”
6Apostalat ja vuorrasat čoahkkanedje guorahallat dán gažaldaga. 7Guhkes nákkáhallama maŋŋá Peter čuožžilii sárdnut ja dajai: “Vieljažiiddán, dii diehtibehtet ahte Ipmil áigá juo válljii din gaskkas mu, vai báhkinat mu njálmmis besset gullat evangeliuma sáni ja oskut. 8Ipmil guhte dovdá buohkaid váimmu, duođaštii dan go golggahii Bassi Vuoiŋŋa sidjiide nugo midjiidenai. 9Son ii dahkan erohusa min ja sin gaskii, muhto buhtistii sin váimmu oskkuin. 10Manne dii dalle geahččalehpet Ipmila ja bidjabehtet máhttájeddjiid niskái geassá maid eai min áhčit eatge mii leat nagodan guoddit? 11Muhto mii oskut ahte mii bestojuvvot Hearrá Jesusa árpmu bokte seamma láhkai go siige.”
12Dalle buohkat jávohuvve. Sii guldaledje Barnabasa ja Paulusa go soai muitaleigga buot mearkkaid ja oavdudaguid maid Ipmil lei dahkan báhkiniid gaskkas sudno bokte.
13Go soai heittiiga sárdnumis, de Jakob sárdnugođii. Son dajai: “Vieljažiiddán, gullet maid mun dajan. 14Simon lea muitalan mo Ipmil vuosttaš geardde geahčai báhkiniid beallái vai oččošii sin gaskkas álbmoga iežas nammii. 15Dát soahpá oktii profehtaid sániiguin, nugo lea čállojuvvon:
16Das maŋŋil mun máhcan
ja ceggen fas Davida gahččan goađi.
Mun divun dan mii lea gaikkoduvvon
ja ceggen dan ođđasis,
17vai maiddái buot eará olbmot ohcet Hearrá,
buot álbmogat maid mun lean váldán iežan nammii.
Ná cealká Hearrá, guhte lea dahkan dán
18dovddusin juo dolin.
19Danin mu mielas mii eat oaččo váivvidit báhkiniid geat jorgalit Ipmila beallái. 20Mii fertet čállit sidjiide reivve ja ávžžuhit sin garvit dakkára mii lea šaddan buhtismeahttumin eahpeipmilbálvaleamis, ja garvit fuorrávuođa, vara ja buvihuvvon elliid bierggu. 21Mosesa láhka gal lea šaddan dovddusin juo dološ áiggiid rájes juohke gávpogis, go dat lohkkojuvvo synagogain juohke sabbaha.”
Čoahkkima mearrádus
22Dalle apostalat ja vuorrasat oktan oppa searvegottiin šiehtadedje válljet moaddása iežaset gaskkas ja vuolggahit sin Antiokiai Paulusa ja Barnabasa mielde. Sii válljejedje Judasa gii gohčoduvvui namain Barsabbas, ja Silasa – goappašagat gulaiga searvegotti njunušolbmáide. 23Sin mielde biddjojuvvui dát reive:
“Apostaliid ja vuorrasiid vieljalaš dearvvuođat Antiokia, Syria ja Kilikia vieljaide geat leat jorgalan báhkinvuođas. 24Mii leat gullan ahte muhtumat geat leat vuolgán min luhtte, muhto geaid mii eat leat vuolggahan, leat moivašuhttán ja ráfehuhttán din sániideasetguin. 25Danne mii leat ovttamielalaččat šiehtadan vuolggahit din lusa moadde olbmá oktan ráhkis vieljaideametguin Barnabasain ja Paulusiin 26geat leaba bidjan heakkaska heahtái Hearrámet Jesus Kristusa nama dihte. 27Mii nappo vuolggahit Judasa ja Silasa geat muitaleaba seamma sága maiddái njálmmálaččat. 28Bassi Vuoigŋa ja mii leat mearridan ahte eat bija makkárge nođiid din ala, earret dáid mat leat dárbbašlaččat: 29Garvet bierggu mii lea oaffaruššojuvvon eahpeipmiliidda, vara ja buvihuvvon elliid bierggu ja maiddái fuorrávuođa. Go dii dáin váruhehpet, de dahkabehtet bures. Ellet dearvan!”
30De sii vuolggahuvvojedje mátkái. Go sii bohte Antiokiai, de sii rávke čoahkkái searvegotti ja adde reivve vieljaide. 31Reive lohkkojuvvui, ja dan arvvosmahtti sánit illudahtte buohkaid. 32Judas ja Silas geat iežage leigga profehtat, arvvosmahtiiga vieljaid máŋggaid sániiguin ja nanosmahtiiga sin. 33Go soai leigga orron gávpogis muhtun áiggi, de vieljat luite sudno máhccat ráfis daid lusa geat ledje sudno vuolggahan. 34Muhto Silas mearridii báhcit sin lusa, ja danne Judas vulggii okto. 35Paulus ja Barnabas oruiga Antiokias. Ovttas ollu earáiguin soai oahpaheigga ja sárdnideigga Hearrá sáni.
Paulus vuolgá ođđa mátkái
36Muhtun áiggi geažes Paulus dajai Barnabasii: “Vuolgu fas galledit vieljaid buot dain gávpogiin main letne sárdnidan Hearrá sáni vai besse oaidnit, makkár sin dilli lea.” 37Barnabas dáhtui váldit mielde maiddái Johannesa gii gohčoduvvui Markusin, 38muhto Paulus ii dohkkehan su mátkeguoibmin, danne go son lei guođđán sudno Pamfylias iige lean vuolgán sudnuin bargui. 39Sudno gaskii šattai nu garra riidu ahte soai earráneigga goabbat guoimmisteaskka. Barnabas válddii mielddis Markusa ja borjjastii Kyprosii, 40Paulusgis válljii guoibminis Silasa. Go vieljat ledje addán su Hearrá árpmu háldui, de son vulggii 41ja vádjolii Syria ja Kilikia čađa ja nanosmahtii searvegottiid.
