Apostaliid dagut 6

₁Daid áiggiid, go máhttájeddjiid lohku ain stuorui, de greikkagielat juvddálaččat soaibmagohte hebreagielagiid, danne go sin iežaset leaskkat govssahalle beaivválaš borramušjuogadeamis. ₂Dalle apostalat, dat guoktenuppelogis, rávke čoahkkái buot máhttájeddjiid ja dadje: “Ii heive ahte mii biebmojuogadeami dihte heaitit sárdnideames Ipmila sáni. ₃Válljejehket dan dihte, vieljažiiddán, iežadet gaskkas čieža olbmá geain lea buorre beaggin ja geaid dievva lea Bassi Vuoigŋa ja viisodat, de mii bidjat sin dán bargui. ₄Dalle mii ieža sáhttit bissut rohkadallamis ja sáni bálvaleames.”

₅Buohkat geat ledje čoahkis, atne dan evttohusa buorrin. Sii válljejedje Stefanusa, olbmá gean dievva lei osku ja Bassi Vuoigŋa, ja vel Filipa, Prokorosa, Nikanora, Timona, Parmenasa ja Nikolaosa, antiokialačča gii lei jorgalan juvddálaš oskui. ₆Sii buktojuvvojedje apostaliid ovdii, ja apostalat rohkadalle ja bidje gieđaid sin ala.

₇Ipmila sátni ovdánii. Máhttájeddjiid lohku lassánii Jerusalemis sakka, ja maiddái ollu báhpat šadde oskui gulolažžan.

₈Stefanus gean dievva lei árbmu ja fápmu, dagai stuorra oavdduid ja mearkkaid álbmoga gaskkas. ₉De čuožžiledje muhtumat dan synagogas mii gohčoduvvo luovus luitojuvvon olbmuid, kyrenelaččaid ja aleksandrialaččaid ja Kilikia ja Asia olbmuid synagogan, ja sii nákkáhallagohte Stefanusiin. ₁₀Muhto sii eai birgen dan viissisvuođa ja Vuoiŋŋa vuostá mii lei su sániin. ₁₁Dalle sii giktaledje muhtumiid dadjat: “Mii leat gullan su sárdnumin bilkosániid Mosesa ja Ipmila vuostá.” ₁₂Sii háhttejedje olbmuid, vuorrasiid ja čáloahppavaččaid, ja de sii válde Stefanusa gitta ja dolvo su ráđi ovdii. ₁₃Doppe sii bukte vearreduođašteddjiid geat dadje: “Dát olmmái ii heaitte sárdnumis dán bassi báikki ja lága vuostá. ₁₄Mii leat gullan su dadjamin ahte nasaretlaš Jesus duššada dán báikki ja rievdada vieruid maid Moses lea addán midjiide.” ₁₅Buohkat geat čohkkájedje ráđis, gehčče Stefanusii, ja sin mielas su muođut ledje oaidnit dego eŋgela muođut.