Goargadis eallima duopmu
1Vuoi Siona oadjebasaid
ja Samariavári moraškeahtes olbmuid,
daid álbmoga allanálagiid
geaid beallái israellaččat jorgalit!
2Mannet Kalnei ja gehččet dan vuorbbi,
mannet doppe stuorra Hamatii,
njidjet vuolás filistalaččaid Gatii:
Lehpetgo dii buorebut go duot riikkat,
leago din eanan stuorit go sin eanan?
3Dii ádjibehtet guhkás
lihkuhisvuođa beaivvi
ja lágidehpet alcceseattet
veahkaválddálaš stivrejumi.
4Dii velohallabehtet
elefántabátnebeaŋkkaineattet
ja raŋgájehpet iežadet divánain.
Dii borrabehtet lábbáid sávzaealus
ja buoiduduvvon gálbbiid oapmeáiddis.
5Dii báhcahaddabehtet hárpasuonaid
ja diktebehtet lávlagiid
dego mii Davidiid.
6Dii juhkabehtet viinni oaffarlihtiin
ja vuoidabehtet iežaideattet
buoremus oljjuin,
muhto ehpet moraš Josefa vahága.
7Dan dihte dii šaddabehtet vádjolit
fáŋgajoavkku njunnošis.
Dalle juhkanguimmežiid gadja lea nohkan.
8Hearrá Ipmil lea vurdnon iežas bokte:
Mun fasttášan Jakoba čeavláivuođa,
mun vašuhan su ladniid.
Mun hilggun gávpoga ja buot mii das lea.
9Jos dalle logis báhcet heggii ovttahat vissui, de siige jápmet. 10Dušše muhtumat báhcet ja guddet jábmiid olggos viesus. Ja jos muhtun jearrá das gii lea viesu siskkimus loavkkus: “Velágo dieppe lea oktage?” De nubbi vástida: “Ii oktage.” Dalle son várre: “Jaska! Hearrá nama ii oaččo cealkit.”
11Ja dál Hearrá gohčču:
Stuorra viessu časkojuvvo moallun
ja unna visoš čievran.
12Ruhttetgoson heasttat ceakkobávttiid,
jorgugoson oktage vuovssáiguin meara?
Muhto dii dahkabehtet rievtti mirkon
ja vanhurskkisvuođa šaddosa máronin.
13Dii illudehpet Lo-Debarii
ja dadjabehtet:
“Almma mii válddiimet Karnajima
iežamet givrodagain?”
14Muhto dál, israellaččat, cealká Hearrá, Almmiveagaid Ipmil: Mun čuoččáldahtán din vašálažžan álbmoga mii áŧesta din Lebo-Hamata rájes gitta Arabajogaža rádjái.
