Vádjoleapmi Edomis ja Moabis
1Dasto mii jorgaleimmet ja vulggiimet meahci čađa Ruksesmeara guvlui, nugo Hearrá lei gohččon mu sárdnut. Mii vádjoleimmet guhká Seira várreeatnamiin, 2dassá go Hearrá celkkii munnje: 3“Dii lehpet guhká juo vádjolan dáin váriin. Jorgalehket dal davás guvlui! 4Cealkke álbmogii: Dii mannabehtet dál dan eatnama čađa mii gullá din vieljaide, Esau bártniide, geat ásset Seiras. Vaikko sii balletge dis, de váruhehket 5soahttámis singuin. Mun in atte didjiide sin eatnamis in juolgevuođu vearddege, danne go Seirvári mun lean addán opmodahkan Esaui. 6Borramuša maid borrabehtet, dii galgabehtet oastit, ja čázi maid juhkabehtet, dii galgabehtet máksit ruđain. 7Hearrá, din Ipmil, lea buressivdnidan din buot das maid lehpet bargan, ja son lea atnán dis fuola go vádjoleiddet dán stuorra meahci čađa. Njealljelogi jagi Hearrá, din Ipmil, lea leamaš dinguin, iige dis leat váilon mihkkege.” 8Nu mii manaimet vieljaideamet Esau bártniid gaskka Seiras ja Araba geainnu mii boahtá Eilatis ja Esjon-Geberis.
De mii jorgaleimmet Moaba meahci guvlui. 9Hearrá celkkii munnje: “Allet fallet moablaččaid alletge soahttá singuin. Mun in atte sin eatnamis maidege didjiide opmodahkan, danne go mun lean addán Ara opmodahkan Lota nállái.
10Doppe ásse dovle emlaččat, stuorra álbmot geat ledje seammá allašattogat go anaklaččat. 11Sii maid gohčoduvvojit refalažžan nugo anaklaččatge, muhto moablaččat gohčodit sin emlažžan. 12Seiras ásse dovle horilaččat, muhto esaulaččat ádje sin eret, duššadedje sin ja ásse dohko sin sadjái, nugo israellaččatge dahke iežaset eatnamis maid Hearrá lei addán sidjiide opmodahkan.
13Hearrá gohčui min rasttildit Seredjogaža, ja mii dagaimet nu.
14Min vádjoleapmi dan rájes go vulggiimet Kadeš Barneas dan rádjái go rasttildeimmet Seredjogaža, bisttii golbmalogigávcci jagi. Dalle ledje buot dan buolvva soahteolbmát jápmán eaige lean šat siiddas, nugo Hearrá lei vurdnon. 15Hearrá giehta deaivvai sidjiide ja rohttii sin siiddas, dassážii go buohkat ledje jápmán.
16Go buot álbmoga soahteolbmát ledje jápmán, 17de Hearrá celkkii munnje: 18Go don dal manat Ara čađa, Moaba eatnama čađa, 19de don lahkanat ammonlaččaide. Ale fallet sin alege hástte sin soahtat. Mun in atte dutnje maidege ammonlaččaid eatnamis, danne go mun lean addán dan opmodahkan Lota nállái.”
20Dat eanange adnojuvvo refalaččaid eanamin. Doppe ásse dovle refalaččat geaid ammonlaččat gohčodedje samsumlažžan. 21Sii ledje stuorra álbmot, ja sii ledje seammá allašattogat go anaklaččatge. Hearrá duššadii refalaččaid ja divttii ammonlaččaid ádjit sin eret ja váldit sin eatnama oapmineaset. 22Seammá ládje son lei meannudan esaulaččaiguin geat ásset Seiras, go son duššadii horilaččaid ja divttii esaulaččaid ádjit sin eret ja váldit oapmineaset eatnama gos sii ain ásset. 23Nu geavai avvilaččaidege geain ledje gilit gitta Gaza rádjái, muhto kaftorlaččat geat ledje boahtán Kaftoris, duššadedje sin ja válde sin eatnama oapmineaset.
24Hearrá celkkii; “Vulget dál johtui ja mannet Arnona johkaleagi rastá! Mun attán din gihtii amorlaš Sihona, Hešbona gonagasa, ja su eatnama. Soahttájehket suinna ja váldet su eatnama! 25Dán beaivvi rájes mun vuolggahan balu ja hirpma buot álbmogiidda almmi vuolde, nu ahte dat ballet ja doarggistit go gullet didjiide ságaid.”
Gonagas Sihon vuoittáhallá
26Kedemota meahcis mun vuolggahin áirasiid doalvut Hešbona gonagassii Sihonii dán sága: 27“Ráfi dutnje! Suova min mannat iežat eatnama čađa. Mii johtit bálgá eatge spiehkkas olgeš eatge gurut beallái. 28Borramuša maid borrat mii oastit dus, ja čázi maid juhkat mii máksit dutnje ruđain. Mii dáhttut dušše mannat du eatnama čađa, 29nugo min suvve dahkat esaulaččat geat ásset Seiras ja moablaččat geat ásset Aras, vai mii beassat mannat Jordana rastá dan eatnamii maid Hearrá, min Ipmil, addá midjiide.”
30Muhto Sihon, Hešbona gonagas, ii suovvan min mannat iežas eatnama čađa, danne go Hearrá, din Ipmil, lei buoššudan Sihona vuoiŋŋa ja garradan su váimmu, vai beassá addit su din gihtii, nugo juo lea dáhpáhuvvan. 31Hearrá celkkii munnje: “Dál mun addigoađán Sihona ja su eatnama din gihtii. Soahttájehket ja váldet su eatnama oapmineattet!”
32De Sihon bođii soahteveagainis Jahasii soahtat minguin. 33Hearrá, min Ipmil, attii su min gihtii, ja mii gottiimet su, su bártniid ja oppa su soahteveaga. 34Dalle mii válddiimet maiddái buot su gávpogiid ja vihaheimmet buot daid olbmáid duššadeapmái, nu maiddái nissoniid ja mánáid. Mii eat diktán ovttage beassat báhtui. 35Muhto omiid ja dan maid leimmet rievidan gávpogiin, mii válddiimet soahtesálašin. 36Aroera rájes mii lea Arnonjohkaleagi ravddas, ja johkaleagi gávpoga rájes gitta Gileada rádjái ii oktage gávpot ceavzán min ovddas. Hearrá, min Ipmil, attii buot daid min gihtii.
37Dušše ammonlaččaid eatnama, oppa dan guovllu mii lea Jabboka johkaleagi guoras ja maiddái várreeatnama gávpogiid, dii divttiidet orrut ráfis, aiddo nugo Hearrá, min Ipmil, lei gohččon.
