Soahtelágat
1Go dii vuolgibehtet soahtat vašálaččaideattetguin ja oaidnibehtet soahteveaga mii lea stuorit go din soahteveahka, buot dan heasttaid vovnnaid, de allet bala. Dinguin lea Hearrá, din Ipmil, gii buvttii din Egyptas. 2Ovdal go soahti álgá, de báhppa galgá loaiddastit ovdan ja sárdnut soahtevehkii. 3Son galgá dadjat: “Gullet, israellaččat! Dii soahttábehtet odne vašálaččaideattetguin. Allet suorgan alletge bala, allet báhtar sis alletge gáfestuva sis. 4Hearrá, din Ipmil, lea dinguin ja soahtá din ovddas din vašálaččaiguin, son addá didjiide vuoittu.”
5Maiddái soahteveaga hoavddat galget sárdnut soahtevehkii. Sii galget dadjat: “Jos muhtun lea huksen ođđa viesu muhto ii leat velá ássan dasa, de máhccos ruoktot, vai ii gahča soađis ja nu eará olmmái ássá su vissui. 6Jos muhtun lea gilván viidnegárddi iige leat velá rádjagoahtán dan, de máhccos ruoktot, vai son ii gahča soađis ja nu eará olmmái čoaggá su šaddosiid. 7Jos muhtun lea lohpádaddan nissoniin muhto ii leat velá váldán su áhkkán, de máhccos ruoktot, vai son ii gahča soađis ja nu eará olmmái váldá áhkkán nissona geainna son lea lohpádaddan.” 8Hoavddat galget maid dadjat soahtevehkii: “Jos muhtun lea árgi ja baleš, de máhccos ruoktot, vai maiddái su vieljat eai dorvvuhuva.” 9Go hoavddat leat sárdnon soahtevehkii, de oaivámuččat galget gohččugoahtit soahteveaga.
10Go dii lahkonehpet muhtun gávpogii ja áigubehtet fallehit dan, de fállet dasa vuos ráfi. 11Jos gávpot dalle dáhttu ráfi ja rahpá didjiide poarttaidis, de oppa dan álbmot gártá bálvalit din bargogeatnegassan. 12Jos gávpot ii dáhto dahkat ráfi muhto soahttá dinguin, de birastahttet dan, 13ja go Hearrá, din Ipmil, addá dan din gihtii, de goddet buot dan gávpoga dievdduid. 14Muhto dii oažžubehtet váldit alcceseattet nissoniid ja mánáid, omiid ja buot eará mii lea gávpogis, buot sállaša mii doppe lea. Dii oažžubehtet oamastit vašálaččain sállaša maid Hearrá, din Ipmil, addá didjiide.
15Dahket nie buot gávpogiidda mat leat guhkkin eaige gula daidda álbmogiidda mat ásset das lahkosiin. 16Muhto daid álbmogiid gávpogiin maid Hearrá, din Ipmil, addá didjiide opmodahkan, dii ehpet oaččo diktit báhcit maidege, ehpet ovttage mii vuoigŋá. 17Vihahehket daid gávpogiid duššadeapmái ja duššadehket daid áššiid, hetlaččaid, amorlaččaid, kanaanlaččaid, perisselaččaid, hivvelaččaid ja jebuslaččaid, nugo Hearrá, din Ipmil, lea gohččon din, 18vai sii eai oahpat didjiide fastivuođaideaset maid sii dahket iežaset ipmiliid gudnin, ja nu dii suddudivččiidet Hearrá, Ipmileattet, vuostá.
19Go dii lehpet soahtamin muhtun gávpogiin ja birastahttibehtet dan guhká ovdal go veadjibehtet váldit dan, de allet billis dan muoraid ákšuin alletge njeaidde daid. Daid šaddosiid dii oažžubehtet borrat ieža, allet njeaidde daid. Eaihan eatnama muorat leat olbmot, ehpet dii dárbbaš fallehit daid. 20Muhto jos diehtibehtet ahte muorat eai atte šaddosiid maid sáhttá borrat, de oažžubehtet njeaidit daid ja hukset dain birastahttinráhkkanusaid dan gávpoga vuostá mii lea soahtamin dinguin, dassážii go dat gahččá.
