1Jos muhtun suoláda vuovssá dahje sávzza ja njuovvá dahje vuovdá dan, de son galgá vuovssá buhtadit viđain vuovssáin ja sávzza njeljiin sávzzain. 2Jos suola gávnnahallá go lea gaikumin sisa ja de cápmáhallá jámas, de sorbmejeaddji ii šatta sivalažžan su varrii. 3Muhto jos beaivváš lei dalle juo badjánan, de son šaddá sivalažžan. Suola galgá addit dievas buhtadusa, muhto jos sus ii leat mihkkege, de son galgá vuvdojuvvot máksun suoláduvvon opmodagas. 4Jos suoláduvvon oapmi, leažžá dal ásen, vuoksá dahje sávza, gávdno eallin su hálddus, de son galgá addit das guovttegeardásaš buhtadusa. 5Jos soamis diktá iežas omiid guohtut bealddus dahje viidnegárddis nu ahte dat besset nuppi olbmo beldui dahje viidnegárdái, de son galgá addit buhtadussan iežas bealddu dahje viidnegárddi buoremus šattu. 6Jos dolla beassá luovus ja buolláha goikemiestagiid nu ahte gordnegubát dahje šaddi gordni dahje juo oppa bealdu buollá, de dola cahkkeheaddji galgá addit dievas buhtadusa.
7Jos muhtin addá nubbái ruđa dahje gálvvu vuorkái, ja dat dasto suoláduvvo dan olbmá viesus, de suola, jos gávnnahallá, galgá addit das guovttegeardásaš buhtadusa. 8Jos suola ii gávnnahala, de dálu isida galgá doalvut Ipmila ovdii vuordnut ahte son ii leat duohtadan nuppi opmodaga. 9Juohke suolaáššis, juogo dat leažžá vuoksá, ásen, sávza, bivttas dahje mii ihkinassii mii lea leamaš massojuvvon ja man muhtun cealká iežas opmodahkan, de dan guovtti olbmo ášši galgá boahtit Ipmila ovdii. Dat gean Ipmil dubme sivalažžan, galgá addit nubbái guovttegeardásaš buhtadusa. 10Go soamis addá ásena, vuovssá, sávzza dahje eará ealli nuppi olbmo háldui, ja dat jápmá dahje lápmašuvvá dahje suoláduvvo almmá geange oainnekeahttá, 11de dalle dat gean hálddus ealli lei, galgá vuordnut Hearrá ovddas ahte son ii leat duohtadan nuppi opmodaga. Eaiggát galgá dohkkehit váli, iige nubbi dárbbaš máksit buhtadusa. 12Muhto jos muhtin suoláda sus dan ealli, de son galgá addit buhtadusa eaiggádii. 13Jos ealli lea gaikkoduvvon, de son galgá buktit ráppi duođaštussan; gaikkoduvvon ealli son ii dárbbaš buhttet. 14Jos muhtin luoikkaha nuppis ealli, ja dat lápmašuvvá dahje jápmá go eaiggát ii leat das, de luoikkaheaddji galgá máksit das dievas hatti. 15Muhto jos eaiggát ieš lea das, de luoikkaheaddji ii dárbbaš máksit. Jos ealli lei láigohuvvon, de eaiggát galgá oažžut láiggu.
16Jos muhtin olmmái fille nieidda gii ii leat lohpádaddan, ja veallá suinna, de son galgá máksit moarsehatti ja váldit su áhkkán. 17Jos áhčči biehttala addimis nieiddas sutnje, de fillejeaddji galgá máksit dan silbameari mii vástida nieidda moarsehatti.
18Don it oaččo diktit noaidenissona eallit.
19Juohkehaš gii veallá omiiguin, galgá ráŋggáštuvvot jápmimiin.
20Dat gii oaffaruššá eará ipmiliidda iige aivvefal Hearrái, galgá vihahuvvot duššadeapmái.
21Don it oaččo givssidit itge soardit vierrása, danin go dii iežage leiddet vierrásat Egyptas. 22Dii ehpet oaččo soardit leaskkaid ehpetge oarbásiid. 23Jos soardibehtet sin, ja sii čurvot munnje, de mun vissásit gulan sin čuorvuma. 24Mu vašši buollá, ja mun sorbmen din mihkiin, nu ahte din áhkát šaddet leaskan ja din mánát oarbbisin.
25Jos lonet ruđa mu álbmoga váivvášii gii lea du luhtte, de it oaččo leat goardu. It oaččo váldit sus reanttu. 26Jos leat váldán lagamuččat biktasa pántan, de galggat máhcahit dan sutnje ovdal go beaivváš luoitáda, 27danne go dat lea su áidna govččas maid son atná suodjin. Man vuolde son muđui veallášii? Jos son čuorvu munnje, de mun gulan su, dasgo mun lean váibmoláđis.
28It oaččo bilkidit Ipmila itge garuhit iežat álbmoga oaivámučča. 29Ale ájahala addimis munnje oasi gordnešattustat ja viidnešattustat. Atte munnje vuosttašriegádeaddji iežat bártniin. 30Nu galggat dahkat maiddái iežat stuorraomiiguin ja smávvaomiiguin: Daid vuosttašriegádeaddji oažžu leat čieža beaivvi eatnis luhtte, muhto gávccát beaivvi galggat addit dan munnje. 31Lehket mu bassi álbmot. Allet bora gaikkoduvvon ealli bierggu, muhto bálkestehket dan beatnagiidda.
